Llenyddiaeth Saesneg (MA)

Sut y caf fy addysgu?

Mae'r holl addysgu'n digwydd drwy seminarau a gweithdai sydd wedi'u strwythuro ar sail cyfranogiad myfyrwyr, ac maen nhw'n cynnwys cyfleoedd i gyflwyno eich gwaith. Mae pob modiwl yn cynnwys seminar dwy awr o hyd bob wythnos.

Mae'r addysgu yn y modiwlau dewisol yn seiliedig ar destunau ac ar archwilio cysyniadau a syniadau o amrywiaeth o safbwyntiau llenyddol, hanesyddol a damcaniaethol ym maes eang llenyddiaeth Saesneg.

Mae'r gweithgareddau dysgu'n amrywio o fodiwl i fodiwl fel y bo'n briodol ond byddant yn cynnwys gweithgareddau fel trafodaethau rhyngweithiol o destunau/pynciau wedi'u paratoi ac, mewn rhai achosion, cyflwyniadau wedi'u harwain gan fyfyrwyr.

Fe’ch anogir yn gryf i wneud yn fawr o’n hadnoddau llyfrgell rhagorol, a disgwylir i chi wneud gwaith paratoi, er enghraifft drwy ddarllen yn eang er mwyn gallu cymryd rhan lawn. 

Sut y caf fy asesu?

Caiff y cam a addysgir ei asesu drwy ystod o ddulliau sydd wedi’u dylunio i ddatblygu eich gallu i gyflwyno eich syniadau eich hun wrth siarad ac ysgrifennu’n ffurfiol. Mae hyn yn cynnwys traethodau, cyflwyniadau ar lafar (sy'n ffurfiannol yn bennaf ac yn anelu at egluro eich syniadau traethawd cyn yr asesiad crynodol), a mathau eraill o asesu sydd wedi'u dylunio i wella eich sgiliau ymchwil a chyfathrebu; er enghraifft prosiect sy'n caniatáu chi i archwilio mathau o gyfathrebu fel cyflwyniadau wedi'u recordio (traethawd fideo); blog, wici, ffrwd cyfryngau cymdeithasol, cyflwyniad ar wefan, neu bodlediad. Caiff rhai modiwlau a addysgir eu hasesu ar sail un darn hir (4,000 o eiriau) o waith er mwyn eich helpu i baratoi ar gyfer cam traethawd hir y rhaglen.

Mae’r cam traethawd hir yn cael ei arholi drwy draethawd hir rhwng 15,000 a 16,000 o eiriau. Datblygir y traethawd hir trwy gyfarfodydd ffurfiol gyda’ch goruchwyliwr, sy’n darparu adborth ar adrannau drafft ac yn trafod syniadau rydych chi’n eu cyflwyno yn y cyfarfodydd.

Mae cyfleoedd asesu ffurfiannol ym mhob modiwl; fe’ch anogir hefyd i drafod syniadau ar gyfer eich gwaith a asesir gydag arweinydd y modiwl neu’r goruchwyliwr.

Sut y caf fy nghefnogi?

Mae graddedigion y radd MA Llenyddiaeth Saesneg yn gyfathrebwyr cydweithredol ac effeithiol sy’n gallu dangos uniondeb, dibynadwyedd a chymhwysedd personol a phroffesiynol.

Byddwch yn datblygu arbenigedd mewn ymagweddau sefydledig a datblygol tuag at ymchwil y dyniaethau tra hefyd yn paratoi ar gyfer cyflogaeth yn y dyfodol. Bydd eich sgiliau ysgrifennu, cyflwyno ac ymchwil yn cael eu gwella i gefnogi eich datblygiad proffesiynol, a byddwch yn ennill ystod o sgiliau hanfodol sy'n ofynnol ar gyfer astudiaeth ôl-raddedig lwyddiannus ym maes llenyddiaeth, yn ogystal ag amrywiaeth o yrfaoedd anacademaidd a chyhoeddus yn y dyfodol. 

Byddwch yn dysgu sut i gyfleu eich ymchwil yn effeithiol ac yn broffesiynol ar draws ystod o blatfformau a chyfryngau, a sut i gyflwyno eich syniadau mewn ffordd a fydd yn apelio at wahanol fathau o gynulleidfaoedd. Mae hyn yn ddelfrydol ar gyfer llawer o swyddi a gyrfaoedd.

Yn ystod eich astudiaethau, byddwch wedi elwa ar gyfleoedd ymarferol i drafod, dadlau ac ystyried barn pobl eraill. Bydd hyn yn eich helpu i ddatblygu eich sgiliau cyfathrebu, gweithio mewn tîm a meddwl yn feirniadol. Yn y cyfamser, bydd cynllunio ac ysgrifennu'r traethawd hir terfynol yn gwella eich gallu i ysgogi'ch hun, cwrdd â chyfrifoldebau y cytunwyd arnynt, a chyfathrebu'n effeithiol mewn darn estynedig o ymchwil annibynnol.

Byddwch yn elwa ar gefnogaeth a gwasanaethau gyrfaoedd a gynigir gan y Brifysgol a byddwch hefyd yn gallu mynd i symposiwm Diwrnod y Diwydiant Ysgrifennu Creadigol, sy'n sbardun proffesiynol ardderchog i'r rhai sy'n ystyried gyrfa ym maes cyhoeddi neu ysgrifennu. 

Mae astudiaeth ôl-raddedig mewn llenyddiaeth Saesneg yn borth i lawer o yrfaoedd yn y byd academaidd a thu hwnt. Fe welwch ein graddedigion mewn ystod syfrdanol o swyddi a sectorau, o’r sector cyhoeddus i’r sector preifat. Mae ein cyn-fyfyrwyr yn gwneud eu marc mewn meysydd sy’n cynnwys y byd academaidd, addysg gynradd ac uwchradd, newyddiaduraeth, cyhoeddi, gwaith archifo a llyfrgell, y Gwasanaeth Sifil, gweinyddu'r celfyddydau, a'r diwydiannau creadigol.

Pa sgiliau y byddaf yn eu hymarfer a’u datblygu?

Mae Deilliannau Dysgu’r rhaglen yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

Erbyn diwedd y rhaglen, byddwch yn gallu:

Gwybodaeth a Dealltwriaeth(GD):

• Deall yn systematig y perthnasoedd rhwng testunau llenyddol a'u cyd-destunau diwylliannol, hanesyddol ac esthetig.
• Gwybodaeth feirniadol o ymchwil gyfoes ac ymchwil berthnasol arall yn y ddisgyblaeth.
• Deall yn systematig y perthnasoedd rhwng llenyddiaeth a ffurfiau diwylliannol eraill, fel ffilm, celf, a diwylliannau materol/digidol.

Sgiliau Deallusol:

• Archwilio a dehongli testunau o amrywiaeth o ffynonellau yn gynhwysfawr, gan ddangos ymwybyddiaeth feirniadol o broblemau cyfoes a/neu wybodaeth newydd yn y ddisgyblaeth.
• Datblygu ymchwil wreiddiol sy'n soffistigedig feirniadol ac yn hunanymwybodol.
• Cyfleu dehongliadau yn gywir ar gyfer cynulleidfa arbenigol.

Sgiliau Ymarferol Proffesiynol:

• Rheoli gwybodaeth o amrywiol ffynonellau wrth ddelio â materion cymhleth yn systematig ac yn greadigol.
• Cyfathrebu syniadau cymhleth wedi'u hymchwilio'n annibynnol yn glir i gynulleidfaoedd arbenigol neu anarbenigol.
• Asesu a datrys problemau'n annibynnol, gan ystyried barn pobl eraill mewn ffordd systematig a gwerthusol.

Sgiliau Trosglwyddadwy/Allweddol:

• Datblygu menter drwy gymryd cyfrifoldeb a rheoli amser ar dasg ymchwil fawr.
• Cyfathrebu'n berswadiol, gan gyfleu syniadau academaidd uwch a dadleuon technegol i gynulleidfaoedd arbenigol neu anarbenigol a hynny drwy ddefnyddio technegau ysgrifenedig neu lafar.
• Asesu’n feirniadol y wybodaeth a geir er mwyn datblygu a chyfleu dealltwriaeth newydd gymhleth.
• Meithrin mentergarwch a chyfrifoldeb personol wrth ddysgu’n annibynnol ac olrhain datblygiad proffesiynol parhaus.