Llenyddiaeth Saesneg (MA)

Sut y caf fy addysgu?

Mae'r holl addysgu'n digwydd drwy seminarau a gweithdai, sydd wedi'u strwythuro ar sail cyfranogiad myfyrwyr, ac maen nhw'n cynnwys cyfleoedd i gyflwyno eich gwaith. Mae pob modiwl yn cynnwys seminar dwy awr o hyd bob wythnos.

Mae'r addysgu yn y modiwlau dewisol yn seiliedig ar destunau ac ar archwilio cysyniadau o amrywiaeth o safbwyntiau llenyddol, hanesyddol a damcaniaethol ym maes eang Llenyddiaeth Saesneg.

Mae'r gweithgareddau dysgu'n amrywio o fodiwl i fodiwl fel y bo'n briodol ond byddant yn cynnwys gweithgareddau fel trafodaethau rhyngweithiol o destunau/pynciau wedi'u paratoi ac, mewn rhai achosion, cyflwyniadau wedi'u harwain gan fyfyrwyr.

Fe’ch anogir yn gryf i wneud yn fawr o’n hadnoddau llyfrgell rhagorol, a disgwylir i chi wneud gwaith paratoi, er enghraifft drwy ddarllen yn eang er mwyn gallu cymryd rhan lawn. 

Sut y caf fy asesu?

Caiff y cam a addysgir ei asesu drwy ystod o ddulliau sydd wedi’u dylunio i ddatblygu eich gallu i gyflwyno eich syniadau eich hun wrth siarad ac ysgrifennu’n ffurfiol. Mae hyn yn cynnwys traethodau, cyflwyniadau ar lafar (sy'n ffurfiannol yn bennaf ac yn anelu at egluro eich syniadau traethawd cyn yr asesiad crynodol), a mathau eraill o asesu sydd wedi'u dylunio i wella eich sgiliau ymchwil a chyfathrebu; er enghraifft prosiect sy'n caniatáu chi i archwilio mathau o gyfathrebu fel cyflwyniadau wedi'u recordio (traethawd fideo); blog, wici, ffrwd cyfryngau cymdeithasol, cyflwyniad ar wefan, neu bodlediad. Caiff rhai modiwlau a addysgir eu hasesu ar sail un darn hir (4,000 o eiriau) o waith er mwyn eich helpu i baratoi ar gyfer cam traethawd hir y rhaglen.

Mae’r cam traethawd hir yn cael ei arholi drwy draethawd hir rhwng 15,000 a 16,000 o eiriau. Datblygir y traethawd hir trwy gyfarfodydd ffurfiol gyda’ch goruchwyliwr, sy’n darparu adborth ar adrannau drafft ac yn trafod syniadau rydych chi’n eu cyflwyno yn y cyfarfodydd.

Mae cyfleoedd asesu ffurfiannol ym mhob modiwl; fe’ch anogir hefyd i drafod syniadau ar gyfer eich gwaith a asesir gydag arweinydd y modiwl neu’r goruchwyliwr.

Sut y caf fy nghefnogi?

Bydd tiwtor personol yn cael ei neilltuo i chi. Byddwch yn cwrdd â'r tiwtor unwaith y semester o leiaf, a bydd yn eich helpu i fyfyrio ar eich gwaith ac yn rhoi cyngor i chi, gan gynnwys eich cyfeirio at y cymorth sydd ar gael mewn cysylltiad â thechnegau astudio neu wasanaethau cymorth i fyfyrwyr yn y Brifysgol. Mae'r cyfarfodydd ffurfiol â'ch tiwtor personol wedi'u dylunio i lunio strategaethau cadarn i'ch helpu i wireddu eich potensial academaidd a phroffesiynol. Eich tiwtor personol yw eich pwynt cyswllt cyntaf os byddwch yn cael unrhyw anawsterau yn ystod eich astudiaethau. Gall myfyrwyr sy'n siarad Cymraeg ofyn am diwtor personol sy'n siarad Cymraeg.

Mae arweinwyr modiwlau ar gael yn ystod eu horiau swyddfa neu drwy apwyntiad er mwyn trafod unrhyw faterion sy'n ymwneud yn benodol â'u modiwlau. Fe'ch anogir i drafod pynciau a deunydd darllen ar gyfer eich asesiadau gyda'ch arweinwyr modiwl yn y lle cyntaf.

Gallwch gwrdd â Chyfarwyddwr y Rhaglen Llenyddiaeth Saesneg MA i drafod eich cynnydd ac unrhyw anawsterau rydych yn eu cael.

Gellir trafod cynlluniau traethawd a chynigion ar gyfer y traethawd hir drwy gydol y rhaglen, a darperir adborth ysgrifenedig ar asesiadau ffurfiannol a chrynodol er mwyn i chi ddatblygu asesiadau dilynol yng ngoleuni eich adborth. Mae modd cael adborth pellach ar eich cynnydd yn ystod trafodaethau seminar ac yn y gynhadledd i fyfyrwyr.

Byddwch hefyd yn cael goruchwyliaeth un-i-un tra byddwch chi’n gweithio ar eich traethawd hir ar ôl i chi gwblhau cam a addysgir yr MA. Cefnogir y traethawd hir hefyd gan y modiwlau ymchwil a chyfathrebu craidd sy’n rhedeg drwy gydol y cam a addysgir.

Mae cymorth sgiliau ysgrifennu ar gael i bob myfyriwr gan y staff academaidd a thrwy Ganolfan Datblygu Ysgrifennu yr Ysgol.

Mae'r cymorth gyrfaoedd yn cynnwys cyfarfodydd un-i-un i gael cyngor ar gynllunio gyrfa, a gwybodaeth am gyfleoedd lleoliad. 

Tu hwnt i’r Ysgol, mae’r Brifysgol yn cynnig ystod o ddigwyddiadau a gwasanaethau cymorth sy’n eich helpu i gynllunio’ch gyrfa, rheoli eich iechyd meddwl, emosiynol, a chorfforol, yn rhoi cyngor i chi ar faterion ariannol, ac yn rhoi mynediad at gymorth yn ymwneud ag anableddau a dyslecsia. Lleolir y gwasanaethau hyn yng Nghanolfan Bywyd Myfyrwyr y brifysgol.

Pa sgiliau y byddaf yn eu hymarfer a’u datblygu?

Mae Deilliannau Dysgu’r rhaglen yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

Erbyn diwedd y rhaglen, byddwch yn gallu:

Gwybodaeth a Dealltwriaeth(GD):

• Deall yn systematig y perthnasoedd rhwng testunau llenyddol a'u cyd-destunau diwylliannol, hanesyddol ac esthetig.
• Gwybodaeth feirniadol o ymchwil gyfoes ac ymchwil berthnasol arall yn y ddisgyblaeth.
• Deall yn systematig y perthnasoedd rhwng llenyddiaeth a ffurfiau diwylliannol eraill, fel ffilm, celf, a diwylliannau materol/digidol.

Sgiliau Deallusol:

• Archwilio a dehongli testunau o amrywiaeth o ffynonellau yn gynhwysfawr, gan ddangos ymwybyddiaeth feirniadol o broblemau cyfoes a/neu wybodaeth newydd yn y ddisgyblaeth.
• Datblygu ymchwil wreiddiol sy'n soffistigedig feirniadol ac yn hunanymwybodol.
• Cyfleu dehongliadau yn gywir ar gyfer cynulleidfa arbenigol.

Sgiliau Ymarferol Proffesiynol:

• Rheoli gwybodaeth o amrywiol ffynonellau wrth ddelio â materion cymhleth yn systematig ac yn greadigol.
• Cyfathrebu syniadau cymhleth wedi'u hymchwilio'n annibynnol yn glir i gynulleidfaoedd arbenigol neu anarbenigol.
• Asesu a datrys problemau'n annibynnol, gan ystyried barn pobl eraill mewn ffordd systematig a gwerthusol.

Sgiliau Trosglwyddadwy/Allweddol:

• Datblygu menter drwy gymryd cyfrifoldeb a rheoli amser ar dasg ymchwil fawr.
• Cyfathrebu'n berswadiol, gan gyfleu syniadau academaidd uwch a dadleuon technegol i gynulleidfaoedd arbenigol neu anarbenigol a hynny drwy ddefnyddio technegau ysgrifenedig neu lafar.
• Asesu’n feirniadol y wybodaeth a geir er mwyn datblygu a chyfleu dealltwriaeth newydd gymhleth.
• Meithrin mentergarwch a chyfrifoldeb personol wrth ddysgu’n annibynnol ac olrhain datblygiad proffesiynol parhaus.