Peirianneg Sero Net (MSc)

Sut y caf fy addysgu?

Mae’r Ysgol Peirianneg wedi cael ei chydnabod yn rhyngwladol am ei rhagoriaeth ymchwil, sy’n trosi i ddiwylliant addysgu cryf a gweithgar sy’n cael ei arwain gan ymchwil. Mae eich profiad dysgu wrth wraidd y rhaglen, ac rydyn ni wedi creu ymagwedd ysbrydoledig i gyflawni amgylchedd deinamig a heriol, sy’n seiliedig ar addysg wyneb yn wyneb o ansawdd uchel ar sail problem, gwaith grŵp wedi’i arwain gan ddylunio, ac ymchwil flaengar.

Darperir modiwlau drwy gyfres o ddarlithoedd wyneb yn wyneb, tiwtorialau, gweithdai neu seminarau, yn ogystal â gweithgareddau grŵp wedi’u harwain gan ymchwil a dylunio. Darperir adnoddau dysgu ategol hefyd i gynorthwyo â dysgu myfyrwyr ac i ddarparu gweithgareddau ymestynnol.

Mae modiwlau unigol yn cynnig rhagor o wybodaeth am sut i astudio ac arweiniad ar adnoddau dysgu a chefnogaeth bellach.

Yn ogystal â gweithgareddau unigol, mae dysgu ar y cyd yn agwedd bwysig ar y rhaglen hon, yn enwedig wrth gydweithio mewn grwpiau amlddisgyblaethol. Darperir cymorth uniongyrchol gyda chyfranogiad tîm effeithiol, gan ddatblygu deinameg grŵp ac adolygu cyfraniad cymheiriaid.

Sut y caf fy asesu?

Bydd modiwlau’n cael eu hasesu un ai drwy waith cwrs, cyflwyniadau, arholiadau neu gyfuniad o’r rhain. Byddwch yn cael eich asesu drwy ystod o ddulliau sydd wedi’u dylunio i wella eich profiad dysgu ac i brofi eich sgiliau a’ch gwybodaeth. Fel arfer, mae’r rhain yn cynnwys arholiadau llyfr agored a chaeedig, aseiniadau ysgrifenedig, profion yn y dosbarth, a gweithgareddau ffurfiannol cysylltiedig gan gynnwys adolygu cymheiriaid, myfyrio a chyflwyniadau.

Mae’r asesiadau wedi’u dylunio i adlewyrchu perthnasedd ymarferol orau ac i fod yn ddilys, gan ddangos tystiolaeth o gyflawni’r deilliannau dysgu.

Mae adborth yn rhan hanfodol o’ch profiad dysgu, a bydd yn cael ei ddarparu yn ystod cyfnod eich astudiaethau. Bydd gan bob modiwl fecanweithiau adborth i’ch cynorthwyo â’ch dysgu a’ch datblygiad. Bydd gan asesiadau ffurfiannol adborth sy’n cynorthwyo â datblygu eich gwybodaeth, eich dealltwriaeth a’ch sgiliau. Bydd adborth yn dilyn asesiadau crynodol yn amlinellu’r dystiolaeth a ddefnyddiwyd i farcio eich gwaith yn erbyn meini prawf a osodwyd ac yn rhoi sylwadau adeiladol tuag at ddatblygu eich gwybodaeth, eich dealltwriaeth a’ch sgiliau ar gyfer y dyfodol.

Sut y caf fy nghefnogi?

Byddwch yn cael tiwtor personol wedi’i ddynodi i chi i’ch cynorthwyo â’ch cynnydd academaidd ac i gynnig cymorth bugeiliol mewn modd anffurfiol a chyfrinachol. Rydyn ni’n ymfalchïo yn y ffaith ein bod yn cynnig amgylchedd gwresog a chroesawgar i bawb.

Bydd eich tiwtor personol yn eich gweld yn rheolaidd yn ystod y rhaglen. Ar y cam traethawd hir, bydd goruchwyliwr yn cael ei ddynodi i chi yn ogystal â mentor diwydiannol yn eich maes arbenigol os oes angen, a bydd disgwyl i chi gwrdd â nhw’n rheolaidd.

Yn ogystal â’r ystod eang o wasanaethau cymorth a ddarperir yn ganolog gan Brifysgol Caerdydd, bydd Uwch Diwtor Personol ar gael i’ch helpu ac i gynghori ar unrhyw faterion personol sy’n codi.

Bydd Dysgu Canolog, sef amgylchedd dysgu rhithwir Prifysgol Caerdydd, yn cael ei ddefnyddio’n helaeth i gyfathrebu ac i’ch cefnogi, gan ddarparu a rhannu cynnwys cwrs ac adnoddau cyffredinol y rhaglen. Gellir ei ddefnyddio hefyd ar gyfer asesiadau hunan-brofi ac i roi adborth.

Er mwyn cefnogi cefndiroedd amrywiol myfyrwyr, bydd adnoddau penodol yn cael eu darparu i sgaffaldio eich dysgu yn ôl yr angen. Gallai hyn gynnwys deunydd sy’n rhagofyniad cyn dechrau’r rhaglen, cynnwys wedi’i deilwra ar gyfer unigolion, a mentora staff/myfyrwyr.

Pa sgiliau y byddaf yn eu hymarfer a’u datblygu?

Mae deilliannau dysgu’r rhaglen hon yn disgrifio'r hyn y byddwch chi wedi’i gyflawni erbyn diwedd y rhaglen ym Mhrifysgol Caerdydd ac yn nodi'r wybodaeth a'r medrau fydd ganddoch chi. Maen nhw’n eich helpu i ddeall faint mae disgwyl i chi ei wneud, hefyd.

Erbyn diwedd y rhaglen, byddwch chi’n gallu:

Gwybodaeth a Dealltwriaeth:

GD 1 Gwerthuso’r defnydd o ddealltwriaeth newydd a phresennol o uwch egwyddorion peirianneg mewn perthynas â datgarboneiddio mewn disgyblaethau peirianneg perthnasol, a chymhwyso hynny i broblemau dilys a wynebir ym maes ymchwil a diwydiant drwy ddefnyddio theorïau allweddol.

GD 2 Creu datrysiadau peirianneg drwy ddealltwriaeth gynhwysfawr o egwyddorion a theorïau sylfaenol i heriau go iawn ymmaes peirianneg.

GD 3 Nodi rôl peirianneg sero net o fewn yr argyfwng newid hinsawdd a chreu ymatebion i heriau peirianneg o fewn cyd-destun cymdeithasol ehangach.

GD 4 Ffurfio ymagweddau tuag at ddatgarboneiddio o fewn disgyblaethau penodol a’r gymdeithas ehangach a chynnig llwybrau ar gyfer eu gweithredu.

GD 5 Gweithredu’n annibynnol wrth wneud penderfyniadau hollbwysig.

Sgiliau deallusol:

SD 1 Datblygu datrysiadau peirianneg arloesol i fynd i’r afael â gweithredu newid tuag at greu cymdeithas wedi’i datgarboneiddio.

SD 2 Datrys heriau peirianneg y mae angen gwybodaeth a dealltwriaeth drylwyr a chynhwysfawr o egwyddorion ac arferion sylfaenol peirianneg arnynt.

SD 3 Cydweithio gyda disgyblaethau peirianneg a gwyddonol eraill a meysydd cysylltiedig i greu ymagwedd gyfannol tuag at daclo heriau newid hinsawdd.

SD 4 Gwerthuso ac amddiffyn eich datrysiadau peirianneg o fewn cyd-destun ymchwil a diwydiannol, yn ogystal ag ar draws effaith gymdeithasol ehangach.

SD 5 Gwerthfawrogi tuedd ragdybiedig o fewn arferion peirianneg a chymdeithas tuag at newid hinsawdd, ac asesu data ac ymagweddau tuag at ddatgarboneiddio yn feirniadol yn seiliedig ar ymchwil drylwyr a chynnal prosesau dilysu.

Sgiliau ymarferol proffesiynol:

SY 1 Dechrau prosiectau peirianneg gan fynd i’r afael â chynaliadwyedd a datgarboneiddio.

SY 2 Datblygu a gweithredu datrysiadau gan ddefnyddio ystod o sgiliau peirianneg, egwyddorion sylfaenol a phrosesau.

SY 3 Adolygu’n feirniadol y fframwaith o ofynion cyfreithiol a llywodraeth perthnasol i gyflymu gweithrediad datrysiadau sero net.

SY 4 Cyfrannu’n gadarnhaol ac yn effeithiol wrth weithio mewn tîm a gallu cyfathrebu syniadau cymhleth yn effeithiol i gynulleidfaoedd amrywiol.

SY 5 Nodi, diffinio a dadansoddi materion a syniadau cymhleth, gan arfer barn feirniadol wrth werthuso ffynonellau gwybodaeth.

SY 6 Cyflwyno, gwerthuso’n feirniadol ac adrodd yn annibynnol ar ganfyddiadau a ddaw o’r traethawd hir yn erbyn yr amcanion a nodwyd.

Sgiliau trosglwyddadwy/allweddol:

SA 1 Defnyddio ystod o sgiliau gan gynnwys datrys problemau, cyfathrebu, gwaith tîm, adalw gwybodaeth, sgiliau technoleg gwybodaeth, hunan-ddysgu, myfyrio, a datblygu gyrfa.

SA 2 Casglu, gwerthuso, cyfosod a dehongli data ansoddol a meintiol mewn amrywiaeth o ffyrdd, gan ganfod ffyrdd o gael data newydd pan fo angen.

SA 3 Llunio, cynllunio, gweithredu a chyfathrebu canlyniadau prosiect neu waith ymchwil sylweddol sy’n cynnwys gwreiddioldeb ar gymhwyso gwybodaeth a barn feirniadol o safbwynt peirianneg.

SA 4 Gwerthfawrogi agweddau allweddol ar yr Argyfwng Hinsawdd a Nodau Datblygu Cynaliadwy’r Cenhedloedd Unedig, gan nodi eu perthnasedd wrth lunio ymateb o safbwynt peirianneg.

SA 5 Mynd ati’n bwrpasol i fyfyrio ar eu hastudiaethau, eu cyflawniadau a’u hunaniaeth.