Gofal Critigol (MSc)

Sut y caf fy addysgu?

Mae ystod eang o arddulliau addysgu a dysgu yn cael eu defnyddio drwy gydol y cwrs, a gyflwynir drwy fformat e-ddysgu ar amgylchedd dysgu rhithwir Prifysgol Caerdydd, Dysgu Canolog™. Mae'r cwrs yn cynnwys modiwlau gorfodol gyda rhai yn cynnwys is-bynciau lle mae gan fyfyrwyr ddewis.

Defnyddir amrywiaeth o gyfryngau i gyflwyno'r cynnwys:

• Modiwlau ar-lein, rhyngweithiol
• Cyflwyniadau PowerPoint wedi’u trosleisio
• Dolenni i adnoddau eraill ar-lein
• Cyflwyniadau
• Gweminarau/Sesiynau tiwtorial

Y myfyriwr fydd yn dewis asesiadau modiwl a phynciau traethawd hir, ond mae'n rhaid i dîm y rhaglen eu cymeradwyo.

I raddau helaeth, bydd astudiaethau ar lefel traethawd hir MSc yn golygu astudiaeth ac ymchwil annibynnol dan arweiniad, gan ddefnyddio’r cyfleusterau dysgu ac ymchwil helaeth sydd ar gael.  Bydd goruchwyliwr prosiect yn cael ei ddynodi i’ch cefnogi a’ch cynghori ar ymchwilio i bwnc eich traethawd hir penodol a’i ysgrifennu.  

Sut y caf fy asesu?

Mae'r asesiadau wedi'u dewis i sicrhau bod y deilliannau dysgu yn cael eu profi'n briodol ac yn rhoi cyfle i fyfyrwyr ddangos eu bod wedi eu bodloni.  Bydd dulliau asesu modiwlau penodol ar gyfer pob modiwl yn cael eu pennu gan y Bwrdd Astudiaethau perthnasol ac mae eu manylion ar gael yn y Disgrifiad o’r Modiwl perthnasol.

Defnyddir amrywiaeth o ddulliau asesu ffurfiannol a chrynodol, fel:

• Trafodaethau Grŵp
• Aseiniad Ysgrifenedig a chynlluniau/drafftiau
• Cwestiynau Amlddewis
• Gwaith Grŵp ar blatfformau ar-lein (e.e. Microsoft Teams)
• Myfyrdodau

Bydd y modiwl traethawd hir yn cael ei asesu’n gyfan gwbl ar sail y traethawd hir terfynol. Bydd y disgwyliadau ar gyfer fformat, cyflwyno a marcio'r traethawd hir yn dilyn y Rheoliadau Asesu cyfredol, a ategir lle bo'n briodol gyda gofynion ychwanegol y Rhaglen/Ysgol/Coleg ac unrhyw ofynion penodol sy'n deillio o natur y prosiect a gynhaliwyd.

Sut y caf fy nghefnogi?

Caiff Tiwtor Personol ei neilltuo i bob myfyriwr i gael cymorth a chefnogaeth gydag anghenion academaidd a bugeiliol, a bydd yn cysylltu'n rheolaidd i drafod cynnydd a chynnig cyngor ac arweiniad fel bo angen. 

Bydd tiwtorialau grŵp rhithwir ar gyfer pob modiwl. Darperir cymorth ar-lein drwy fyrddau trafod e.e. i drafod cynnwys modiwlau, syniadau asesu, datblygu asesiadau, materion clinigol. Anogir myfyrwyr i gyfrannu’n rheolaidd i'r byrddau trafod ar Dysgu Canolog, lle cânt eu cefnogi gan dîm y rhaglen a phanel o arbenigwyr clinigol. Bydd myfyrwyr yn gallu cynllunio a myfyrio ar yr hyn maent wedi’i ddysgu mewn modiwlau ac asesiadau unigol, drwy eu myfyrio personol (gellir tynnu hwn i'w gynnwys mewn Portffolios Proffesiynol/dilysu proffesiynol, ail-ddilysu).

Caiff goruchwyliwr ei neilltuo i chi yn ystod cyfnod y traethawd hir. Bydd yn rhoi adborth ysgrifenedig ar fersiynau drafft o’r traethawd hir, ac yn rhoi cyfle i chi drafod unrhyw ymholiadau sydd ganddyn nhw.

Adborth

Er mwyn helpu myfyrwyr a'u harwain gyda'r gwaith o gynllunio, ysgrifennu a datblygu asesiadau, bydd adborth ffurfiannol yn cael ei roi drwy ddulliau electronig ac ysgrifenedig, mewn da bryd. Bydd adborth crynodol helaeth ar asesu yn cael ei gyflwyno o fewn yr amserlen a bennir gan y Brifysgol a bydd myfyrwyr yn cael gwybod sut i gael gafael at yr adborth hwn.

Pa sgiliau y byddaf yn eu hymarfer a’u datblygu?

Drwy gymryd rhan lawn yn y rhaglen lefel Meistr hon, cewch gyfle i ennill cyfoeth o wybodaeth a sgiliau a galluoedd y gallwch eu defnyddio mewn unrhyw leoliad gofal acíwt neu gritigol proffesiynol.  Yn ogystal â dealltwriaeth gysyniadol well o wybodaeth, ystyriaethau a dulliau cyfredol, byddwch yn ymarfer ac yn datblygu sgiliau dadansoddi beirniadol, cymhwyso meddygaeth yn seiliedig ar dystiolaeth ac ymdrin â materion cymhleth yn systematig ac yn greadigol. 

Drwy'r elfennau sy'n canolbwyntio ar ymchwil, byddwch yn datblygu a gwella sgiliau adolygu llenyddiaeth, gwerthuso beirniadol, cynllunio ymchwil, methodolegau ymchwil, casglu data, dadansoddi data ac egwyddorion ymchwil.

Ar ôl cwblhau'r rhaglen yn llwyddiannus, byddwch yn gallu:

Gwybodaeth a Dealltwriaeth:

• Cymhwyso rhesymu clinigol mewn amrywiaeth o gyd-destunau clinigol gofal acíwt a chritigol.
• Cymhwyso a dangos penderfyniadau effeithiol a barn glinigol yn feirniadol i asesu, cynllunio, gweithredu ymyriadau therapiwtig sy'n seiliedig ar dystiolaeth.
• Archwilio a gwerthuso ystyriaethau ymarfer cyfoes ehangach gan gynnwys gwella ansawdd, arweinyddiaeth, diogelwch cleifion, ystyriaethau moesegol a phroffesiynol sy'n effeithio ar ofal critigol ac yn hwyluso gwella clinigol.  
• Mynegi ymwybyddiaeth o gyd-destunau cymdeithasol a chymunedol yn y maes clinigol.
• Defnyddio gwybodaeth ryngbroffesiynol sy'n seiliedig ar dystiolaeth a dealltwriaeth o ofal y claf difrifol wael i gefnogi unrhyw fentrau clinigol ac addysgol.

Sgiliau Deallusol:

• Herio dulliau traddodiadol o reoli cleifion cyn, yn ystod ac ar ôl gofal critigol.
• Defnyddio sgiliau wrth chwilio'r llenyddiaeth yn systematig i lywio ymarfer.
• Gwerthuso ac integreiddio gwybodaeth am agweddau amlddimensiwn gofal acíwt a chritigol o wahanol ddisgyblaethau, er mwyn ymdrin â gofal a rheolaeth o safbwynt bioseicoogymdeithasol.
• Cydgrynhoi gwybodaeth a dealltwriaeth, cyfosod a dod i gasgliadau yn absenoldeb data cyflawn.
• Cynhyrchu adolygiadau ar sail tystiolaeth sy'n llywio gofal i’r claf sy'n ddifrifol wael.

Sgiliau Ymarferol Proffesiynol:

• Defnyddio amrywiaeth o fethodolegau ymchwil yn hyderus a dangos llythrennedd TG trwy raglenni a chymwysiadau amrywiol.
• Cyfleu gwybodaeth gymhleth i'r gymuned gofal critigol i lywio a helpu ymarfer sy'n seiliedig ar dystiolaeth.
• Dangos arweinyddiaeth mewn perthynas â newid clinigol, ansawdd a diogelwch a gofal clinigol gyda phersbectif beirniadol yn seiliedig ar allu gwell fel ymarferydd myfyriol i ddefnyddio data, adnoddau a chanllawiau mewn modd arloesol, cynaliadwy ac adeiladol. 
• Dangos sgiliau trefnu, menter, gwreiddioldeb a gwneud penderfyniadau annibynnol. 
• Cymhwyso'r sgiliau a ddysgwyd i ddangos cyflogadwyedd.

Sgiliau Trosglwyddadwy/Allweddol:

• Dangos y galluoedd deallusol sydd eu hangen i allu cyflawni ymchwil ar lefel Meistr.
• Mynegi'r wybodaeth a'r galluoedd deallusol sydd eu hangen i arwain a datblygu gofal yn seiliedig ar dystiolaeth i bobl sy'n ddifrifol wael.
• Nodi meysydd ar gyfer gwelliannau ansawdd mewn gofal a chyfrannu atynt, a rhoi damcaniaethau ar waith yn ymarferol.
• Cydweithio mewn tîm rhyngbroffesiynol rhyngwladol, a dangos arweinyddiaeth a chrebwyll wrth ymdrin yn systematig â materion cymhleth. 
• Dangos galluoedd datrys problemau a gwneud penderfyniadau.