Ysgrifennu Creadigol (MA)

Sut y caf fy addysgu?

Mae ein haddysgu’n gyfuniad o ddarlithoedd, seminarau, gweithdai, sesiynau un-i-un gyda thiwtor, cyflwyniadau gwadd a phaneli, a digwyddiadau arddangos. Bydd gennych gyfle hefyd i fynd ar encil ysgrifennu ac i symposiwm diwydiannau creadigol.

Drwy gydol eich astudiaethau, bydd disgwyl i chi ddarllen a dadansoddi amrywiaeth o destunau beirniadol a llenyddol, darllen ac asesu gwaith cyfoedion, a datblygu sgiliau ysgrifennu hunan-fyfyriol.  Wrth i'ch dysgu ddatblygu byddwch yn symud o ystyried y grefft yn eang i ganolbwyntio'n fwy penodol ar eich maes/meysydd genre.

Bydd y gweithgareddau dysgu penodol yn amrywio o fodiwl i fodiwl ond gallant gynnwys ymarferion ysgrifennu, darllen beirniadol, dadansoddi'r grefft, cyflwyno gwaith beirniadol a chreadigol i bobl eraill, a gweithgareddau addysgu. Yn y modiwlau seiliedig ar weithdai, bydd disgwyl i chi ddarllen a gwerthuso gwaith eich cyfoedion, a rhoi adborth penodol ac adeiladol mewn amgylchedd grŵp cefnogol.

Gwybodaeth ychwanegol

Fel rhan o'r rhaglen, cynhelir sesiynau Meic Agored yn rheolaidd drwy gydol y flwyddyn academaidd. Mae'r rhain yn cynnwys awdur proffesiynol gwadd yn aml, ac yn rhoi cyfle i chi gyflwyno eich gwaith i gynulleidfa. Cynhelir y sesiynau hyn gyda’r nos fel arfer, mewn lleoliad cyhoeddus yn y ddinas. Mae’r sesiynau gyda’r nos yn rhai dewisol a ni chânt eu hasesu (ond cewch eich annog yn gryf i fynychu), ac maen nhw’n ddull ffurfiannol o baratoi ar gyfer cyflwyniad a gaiff ei asesu.

Mae’r Encil i Ysgrifenwyr Creadigol blynyddol yn digwydd ddechrau fis Rhagfyr fel arfer, ac mae’r costau wedi’u cynnwys yn rhan o ffi’r cwrs. Mae'r encil yn cynnwys cyfuniad o seminarau, gweithdai a digwyddiadau arddangos, yn ogystal ag amser wedi'i neilltuo ar gyfer ysgrifennu, darllen a myfyrio.

Bob blwyddyn, ar ddiwedd semester y gwanwyn, rydyn ni’n anelu at gynnal Symposiwm blynyddol y Diwydiannau Creadigol, sy'n cynnwys siaradwyr gwadd, trafodaethau panel, a chyflwyniadau gan weithwyr proffesiynol yn y diwydiant: awduron, golygyddion, asiantiaid a/neu gyhoeddwyr. 

Sut y caf fy asesu?

Bydd y dulliau asesu'n amrywio rhwng modiwlau. Yn y modiwlau a addysgir, gallai'r asesu gynnwys y canlynol, ond nid yw hon yn rhestr hollgynhwysfawr: portffolios o waith creadigol, traethodau academaidd, traethodau myfyriol, cyfnodolion, sylwebaethau beirniadol, blogiau fideo a/neu gyflwyniadau.  Dull asesu Cam 2 yw portffolio estynedig o waith sy'n cynnwys cyfuniad o ysgrifennu creadigol a beirniadol.

Yn aml (ond nid bob amser) rydyn ni’n asesu ein modiwlau ar ddiwedd yr addysgu gydag un darn o waith, oherwydd natur ysgrifennu creadigol fel disgyblaeth: mae angen i chi gael cyfle i arbrofi gyda’ch gwaith a rhoi cynnig ar bethau yn ffurfiannol gyda chefnogaeth staff yn ystod y semester, heb boeni am gael eich asesu’n grynodol yn rhy fuan.

Sut y caf fy nghefnogi?

Bydd tiwtor personol yn cael ei neilltuo i chi ar gyfer eich astudiaethau. Bydd ar gael i drafod eich cynnydd academaidd cyffredinol a'ch profiad fel myfyriwr. Byddwch hefyd yn cael cyfle i gwrdd â thiwtoriaid eich modiwlau i drafod agweddau penodol ar y modiwlau hynny. Ar gyfer rhai modiwlau – ac yn ystod Cam 2 y rhaglen yn benodol – bydd goruchwyliwr yn cael ei neilltuo i chi, a fydd yn trafod eich ysgrifennu a'ch cynnydd gyda chi drwy diwtorialau un-i-un.

Mae cyfleoedd helaeth i gael adborth ffurfiannol drwy gydol y cwrs, yn enwedig yn y modiwlau seiliedig ar weithdai lle byddwch yn rhannu eich cynnydd eich hun ac yn cael gwerthusiadau a chyngor adeiladol gan eich cyfoedion a'ch tiwtoriaid. Asesiad crynodol yw pen llanw pob modiwl. Yn ogystal â'r marc (lle bo'n berthnasol), bydd tiwtor y modiwl yn darparu adborth manwl ar yr asesiadau hyn.

Mae arweinwyr modiwlau ar gael yn ystod eu horiau swyddfa neu drwy apwyntiad er mwyn trafod unrhyw faterion sy'n ymwneud yn benodol â'u modiwlau. Fe'ch anogir i drafod pynciau a deunydd darllen ar gyfer eich asesiadau gyda'ch arweinwyr modiwl yn y lle cyntaf.

Gallwch gwrdd â Chyfarwyddwr y Rhaglen MA Ysgrifennu Creadigol i drafod eich cynnydd ac unrhyw anawsterau rydych yn eu cael.

Mae cymorth sgiliau ysgrifennu ar gael i bob myfyriwr gan y staff academaidd a thrwy Ganolfan Datblygu Ysgrifennu yr Ysgol.

Mae'r cymorth gyrfaoedd yn cynnwys cyfarfodydd un-i-un i gael cyngor ar gynllunio gyrfa, a gwybodaeth am gyfleoedd lleoliad. 

Tu hwnt i’r Ysgol, mae’r Brifysgol yn cynnig ystod o ddigwyddiadau a gwasanaethau cymorth sy’n eich helpu i gynllunio’ch gyrfa, rheoli eich iechyd meddwl, emosiynol, a chorfforol, yn rhoi cyngor i chi ar faterion ariannol, ac yn rhoi mynediad at gymorth yn ymwneud ag anableddau a dyslecsia. Lleolir y gwasanaethau hyn yng Nghanolfan Bywyd Myfyrwyr y brifysgol.

Pa sgiliau y byddaf yn eu hymarfer a’u datblygu?

Mae Deilliannau Dysgu’r rhaglen yn disgrifio'r hyn y byddwch wedi’i gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

Erbyn diwedd y rhaglen, byddwch yn gallu:

Gwybodaeth a Dealltwriaeth(GD):

• Deall yn systematig brosesau creadigol awduron cyhoeddedig ac awduron sydd wedi ennill eu plwyf – rhai cyfoes a rhai o'r gorffennol
• Deall agweddau allweddol ar ddamcaniaeth ac ymarfer ysgrifennu creadigol.
• Deall yn gynhwysfawr y defnydd o lais, safbwynt, cymeriadau, lleoliad, plot a themâu mewn gwaith creadigol.

Sgiliau Deallusol:

• Gwerthuso dulliau ysgrifennu, arddulliau, genres, a thechnegau penodol, gydag ymwybyddiaeth o broblemau cyfoes a mewnwelediadau newydd yn y maes.
• Asesu’n feirniadol gryfderau a gwendidau gwaith ysgrifennu eraill a’i fethodolegau.
• Asesu a gwerthuso’n feirniadol eich methodolegau ysgrifennu eich hun a sut defnyddir technegau ymchwil ac ymholi sefydledig i greu a dehongli gwybodaeth yn nisgyblaeth ysgrifennu creadigol.

Sgiliau Ymarferol Proffesiynol:

• Cynhyrchu a datblygu gweithiau creadigol gyda dealltwriaeth gynhwysfawr o dechnegau perthnasol.
• Datblygu a chynnal ymchwil i ddylanwadu ar ysgrifennu creadigol a/neu i gynnal dadl feirniadol gymhleth.
• Deall yn systematig safonau a chonfensiynau'r diwydiannau creadigol.
• Cyfleu gwybodaeth a syniadau yn glir ac yn broffesiynol, gan gymhwyso gwybodaeth a sgiliau uwch.

Sgiliau Trosglwyddadwy/Allweddol:

• Datblygu, golygu a diwygio ysgrifennu creadigol a/neu feirniadol.
• Datblygu menter drwy gymryd cyfrifoldeb a rheoli amser ar dasg ymchwil fawr.
• Dangos meddwl/sgiliau datrys problemau creadigol a gwreiddiol.
• Cyfathrebu’n berswadiol, gan gyfleu syniadau academaidd uwch a dadleuon technegol i gynulleidfaoedd arbenigol ac anarbenigol, gan ddefnyddio technegau ysgrifenedig neu lafar.