Dadansoddeg Busnes (MSc)

Sut y caf fy addysgu?

Mae dull dysgu gweithredol wedi’i ymgorffori yn y rhaglen. Credwn fod dysgu effeithiol wedi’i seilio ar ddau beth – cymryd rhan mewn profiadau amrywiol, a’r ffordd rydych yn gwneud synnwyr o’r profiadau hynny, yn unigol ac ar y cyd ag eraill. 

Mae pob pwnc yn cynnwys amrywiol weithgareddau megis trafod y damcaniaethau mwyaf datblygedig sydd ar gael, astudiaethau achos, fideos, heriau tîm bach, - oll wedi'u cynllunio i gyflwyno syniadau newydd a datblygu eich dealltwriaeth.

Mae'r rhaglen wedi'i chynllunio i feithrin eich gallu a'ch proffil fel arbenigwr dadansoddeg busnes. Byddwch yn cydweithio â myfyrwyr eraill i ddatblygu dirnadaeth newydd o natur ytestun mewn amrywiol gyd-destunau; cewch eich annog i weithio'n unigol ac ar y cyd mewn timau amrywiol i ystyried ystod o ddulliau ac arferion damcaniaethol amgen.

Mae rhoi’r hyn a ddysgwyd o’r newydd ar waith yn bwysig hefyd. Byddwch yn integreiddio ac yn cymhwyso dealltwriaethau newydd, ynghyd â sgiliau dadansoddi newydd, mewn tasgau ymarferol sydd wedi’u hymgorffori ym mhob pwnc dysgu, ac mewn gweithgareddau gwaith cwrs ffurfiol.

Sut y caf fy asesu?

Mae strwythur modiwlaidd y rhaglen yn cynnig digon o gyfleoedd i chi fyfyrio ar eich dysgu a'ch datblygiad yn ffurfiol ac yn anffurfiol. Ym mhob modiwl, mae gweithgareddau byr ar gyfer adolygu gwybodaeth a medrau fel y gallwch chi gadw llygad ar eich cynnydd a gwella’ch ffordd o ddysgu. Bydd hynny’n cryfhau’ch hyder ac yn gwella eich ffordd o drin a thrafod gorchwylion asesu ffurfiol.

Mae amrywiaeth o dasgau asesu ffurfiol yn rhoi cyfle i ystyried cysyniadau a modelau mewn ffyrdd creadigol ac ymarferol. Bydd y rhain yn cynnwys cyflwyniadau ar ffurf poster, astudiaethau achos, cyflwyniadau grŵp, adroddiadau a fideos. Byddwch yn gweithio'n unigol ac yn rhan o dîm, yn union fel y byddech chi yn y gweithle.

Sut y caf fy nghefnogi?

Mae’r Brifysgol yn cynnig llawer o gymorth i ôl-raddedigion, gan gynnwys: 

Dysgu Canolog

Dysgu Canolog yw ein amgylchedd dysgu rhithwir  Cyhoeddir deunyddiau pob rhaglen a modiwl yno ar gyfer sylw myfyrwyr cyn darlithoedd, yn eu hystod ac wedyn.

Llyfrgelloedd

Mae dros 1.1 miliwn o lyfrau printiedig yn ein llyfrgelloedd ar draws y campws. Bydd dros 1.5 miliwn o lyfrau ar-lein, cyfnodolion, adnoddau a chronfeydd data ar gael i chi, hefyd.

System y Tiwtoriaid Personol

Byddwch yn cael tiwtor personol. Bydd eich tiwtor personol yw goruchwylio’ch dysgu a’ch profiad addysgol. Os cewch unrhyw anawsterau, bydd eich tiwtor personol ar gael i wrando a chynnig arweiniad proffesiynol, os oes modd, neu eich cyfeirio at ffynhonnell addas fydd yn gallu rhoi cymorth i chi.

Ar ben hynny, mae ein timau Bywyd Myfyrwyr yn cynnig cyfres o wasanaethau cymorth. Mae'r gwasanaethau hyn wedi'u lleoli yn adeilad pwrpasol Canolfan Bywyd y Myfyrwyr ac yn cynnwys: Cyngor ac Arian, Dyfodol Myfyrwyr ar gyfer cymorth gyrfaoedd, gwasanaethau Cwnsela, Iechyd a Lles, y Gwasanaeth Anabledd Myfyrwyr gan gynnwys cymorth dyslecsia, Sgiliau Astudio Academaidd a Mentora Myfyrwyr.

Pa sgiliau y byddaf yn eu hymarfer a’u datblygu?

Mae'r Deilliannau Dysgu ar gyfer y Rhaglen hon yn disgrifio'r hyn y byddwch yn ei gyflawni erbyn diwedd eich rhaglen ym Mhrifysgol Caerdydd, ac yn nodi'r wybodaeth a'r sgiliau y byddwch yn eu datblygu. Byddant hefyd yn eich helpu i ddeall yr hyn a ddisgwylir gennych.

O gwblhau’r Rhaglen yn llwyddiannus, byddwch yn gallu gwneud y canlynol:

Gwybodaeth a Dealltwriaeth:

• Dangos dealltwriaeth systematig o'r cysylltiadau rhwng theori, egwyddorion ac ymarfer dadansoddeg busnes.
• Cynnal gwerthusiad beirniadol o faterion cyfoes ym maes dadansoddeg busnes drwy ddefnyddio ymchwil gyfredol a nodi’r goblygiadau posibl i ymchwil ac arferion yn y dyfodol.
• Asesu perthnasedd cysyniadau damcaniaethol modern yn feirniadol yng nghyd-destun yr amgylchedd busnes deinamig cyfoes.
• Cymhwyso ymchwil a gwybodaeth broffesiynol berthnasol i ddatrys senarios busnes byd go iawn.
• Cymhwyso a gwerthuso'n feirniadol atebion dadansoddol megis dadansoddeg data mawr a dysgu peirianyddol ar gyfer cymwysiadau busnes.

Sgiliau Deallusol:

• Diffinio problem fusnes neu ymchwil yn glir.
• Gwerthuso a dewis methodoleg ymchwil briodol a rheoli prosiect ymchwil yn effeithiol, gan gynnwys dadansoddi, rheoli amser ac adnoddau.
• Dewis offerynnau priodol i ymchwilio i broblemau busnes neu broblemau sy’n seiliedig ar ymchwil.
• Dadansoddi’n feirniadol safbwyntiau cyferbyniol a thystiolaeth ategol, eu cyfosod a’u gwerthuso.
• Creu dealltwriaeth ar sail data a’i chyfleu er mwyn llywio strategaethau a phenderfyniadau busnes.

Sgiliau Ymarferol Proffesiynol:

• Dadansoddi data busnes, asesu sefyllfaoedd cyfredol a rhagweld tueddiadau'r dyfodol.
• Dethol a holi cronfeydd data priodol a phecynnau meddalwedd perthnasol.
• Datblygu sgiliau dadansoddi data sy'n hanfodol ar gyfer meithrin a chyflawni datrysiadau busnes cynaliadwy.
• Cymhwyso gwybodaeth berthnasol er mwyn gwneud penderfyniadau dydd i ddydd yn effeithiol.

Sgiliau Trosglwyddadwy/Allweddol:

• Dangos annibyniaeth wrth werthuso allbynnau pecynnau dadansoddol a'u cymhwyso i ddatrys problemau busnes cymhleth.
• Cyfathrebu â chynulleidfaoedd amryfal trwy nifer o gyfryngau.
• Herio tybiaethau ar sail tystiolaeth gadarn.
• Gweithio’n annibynnol/cydweithio.
• Ymgorffori atebolrwydd moesegol hollbwysig mewn perthynas ag ef ei hun, pobl eraill, a'r gymuned academaidd/ymarfer.