Deallusrwydd Artiffisial gyda Blwyddyn ar Leoliad Proffesiynol (MSc)

Sut y caf fy addysgu?

Mae gan yr Ysgol Cyfrifiadureg a Gwybodeg ddiwylliant ymchwil cryf a gweithredol sy'n llywio ac yn arwain ein haddysgu. Rydym wedi ymrwymo i ddarparu addysgu o'r safon uchaf i fyfyrwyr.

Defnyddir ystod amrywiol o arddulliau addysgu a dysgu drwy gydol y MSc Deallusrwydd Artiffisial gyda Blwyddyn ar Leoliad Proffesiynol. Cyflwynir modiwlau drwy gyfres o sesiynau cyswllt, sy'n cynnwys darlithoedd, seminarau, gweithdai, tiwtorialau a dosbarthiadau labordy fel sy'n briodol i'ch rhaglen, gan ddefnyddio cymysgedd o addysgu ar-lein ac addysgu ar y campws. Gallai'r rhain gynnwys:

• sesiynau addysgu wyneb yn wyneb (e.e. darlithoedd, dosbarthiadau ymarfer, arddangosiadau)
• adnoddau ar-lein rydych chi'n gweithio drwyddynt ar eich cyflymder eich hun (e.e. fideos, adnoddau gwe, e-lyfrau, cwisiau)
• sesiynau rhyngweithiol ar-lein i weithio gyda myfyrwyr a staff eraill (e.e. trafodaethau, ffrydio cyflwyniadau yn fyw, codio byw, cyfarfodydd tîm)
• sesiynau grŵp bach wyneb yn wyneb (e.e. dosbarthiadau cymorth, sesiynau adborth)

Bydd gan y mwyafrif o'ch modiwlau a addysgir wybodaeth bellach i chi ei hastudio a bydd disgwyl i chi weithio drwy hyn yn eich amser eich hun, yn unol â'r arweiniad gan y darlithydd ar gyfer y modiwl hwnnw. Darperir dysgu a chymorth pellach drwy Learning Central (Amgylchedd Dysgu Rhithwir Prifysgol Caerdydd) 

Byddwch hefyd yn ymgymryd â phrosiect ac astudiaeth annibynnol i’ch galluogi i gwblhau eich traethawd estynedig.  Gallwch awgrymu testun ar gyfer eich traethawd eich hun, neu gallwch ei ddewis o restr o opsiynau a gynigiwyd gan staff academaidd a phartneriaid diwydiannol, yn adlewyrchu eu diddordebau cyfredol. 

Sut y caf fy asesu?

Asesir y modiwlau a addysgir o fewn y rhaglen drwy ystod o asesiadau, sydd fel arfer yn cynnwys arholiadau a gwaith cwrs, megis adroddiadau ysgrifenedig, portffolios, asesiadau wedi'u hamseru, traethodau estynedig, aseiniadau ymarferol a chyflwyniadau llafar. 

Gallai adborth ar waith cwrs gael ei roi ar ffurf sylwadau ysgrifenedig ar waith a gyflwynir, atebion 'enghreifftiol' a/neu drafodaeth mewn sesiynau cyswllt.

Caiff y lleoliad ei asesu drwy bortffolio o waith gan gynnwys gwerthusiadau gan y cyflogwr, dogfennau mapio SFIA, adroddiad drafft ac adroddiad terfynol. Bydd hyn yn dangos sut rydych wedi datblygu eich sgiliau tra roeddech ar leoliad. 

Bydd y traethawd hir yn galluogi myfyrwyr i ddangos eu gallu i ddefnyddio ac adeiladu ar wybodaeth a sgiliau a enillwyd er mwyn dangos sgiliau meddwl yn feirniadol a syniadau gwreiddiol yn seiliedig ar gyfnod o astudio a dysgu annibynnol. 

Sut y caf fy nghefnogi?

Mae'r Ysgol yn ymfalchïo ei bod yn cynnig strwythur cymorth cynhwysfawr i sicrhau cydberthynasau cadarnhaol rhwng myfyrwyr a staff. Bydd gennych chi aelod o staff i weithredu fel tiwtor personol i chi, a fydd yn gweithredu fel pwynt cyswllt i gynghori ar faterion academaidd a phersonol mewn modd anffurfiol a chyfrinachol.  

Mae'r cwrs yn defnyddio Canol Dysgu Rhith-amgylchedd Dysgu (VLE) Prifysgol Caerdydd i ddarparu deunyddiau cwrs, a darperir gwybodaeth ychwanegol ar-lein. 

Bydd yr holl addysgu yn digwydd yng Nghaerdydd ac felly byddwch yn gallu manteisio ar bopeth sydd gan Gaerdydd i'w gynnig, o ran y brifysgol (llyfrgelloedd, neuaddau preswyl, Undeb y Myfyrwyr ac ati) a'r ddinas ehangach. 

  At hynny, byddwch yn gallu defnyddio'r ystod lawn o wasanaethau a ddarperir gan Wasanaeth Cymorth i Fyfyrwyr y brifysgol: http://www.cardiff.ac.uk/studentsupport/ 

Mae myfyrwyr yn gyfrifol am ddod o hyd i'w lleoliadau eu hunain, ond bydd Swyddog Lleoliadau'r Ysgol yn hysbysu myfyrwyr am gyfleoedd addas ar gyfer lleoliad. Bydd cyfres o weithdai, cyflwyniadau a digwyddiadau rhwydweithio yn cael eu trefnu yn ystod y flwyddyn i’ch helpu i ddod o hyd i leoliad addas. Yn ystod y lleoliad cewch eich cefnogi gan oruchwyliwr academaidd a fydd yn monitro eich cynnydd ac yn eich cynghori chi a'ch goruchwyliwr yn y gwaith ar asesu'r lleoliad. 

Adborth: 

Caiff myfyrwyr lawer o gyfleoedd am adborth yn ystod y sesiynau cyswllt.

Mae gan yr Ysgol banel myfyrwyr/staff hefyd sy’n cynnwys cynrychiolwyr a etholir gan y myfyrwyr a staff addysgu sy’n cyfarfod i drafod materion academaidd. Yn ogystal â gwaith y panel, rhoddir cyfle i bob myfyriwr gwblhau holiaduron adborth ar ddiwedd semester yr hydref a semester y gwanwyn. Mae’r dulliau hyn yn galluogi’r Ysgol i adolygu cyrsiau yn rheolaidd ac er mwyn sicrhau ein bod yn rhoi’r ddarpariaeth orau posibl i’n myfyrwyr, a gyflwynir mewn ffordd gyson, ar draws pob un o’n graddau.

Pa sgiliau y byddaf yn eu hymarfer a’u datblygu?

Mae deilliannau dysgu’r rhaglen hon i’w gweld isod:

Ar ôl cwblhau'r rhaglen yn llwyddiannus byddwch yn gallu:

Gwybodaeth a dealltwriaeth:

1. Dealltwriaeth o bwysigrwydd sut mae data'n cael ei gynrychioli ar gyfer llwyddiant dulliau deallusrwydd artiffisial
2. Gwybodaeth am y cysyniadau a'r algorithmau allweddol sy'n sail i ddulliau deallusrwydd artiffisial
3. Dealltwriaeth o nodweddion damcaniaethol gwahanol ddulliau deallusrwydd artiffisial
4. Dealltwriaeth o sut mae dulliau deallusrwydd artiffisial yn dylanwadu ar lwyddiant tasg benodol a'r gallu i ragweld hynny

Sgiliau Deallusol:

1. Y gallu i weithredu a gwerthuso dulliau deallusrwydd artiffisial i ddatrys tasg benodol
2. Y gallu i esbonio a chyfleu'r egwyddorion sylfaenol sy'n sail i ddulliau deallusrwydd artiffisial cyffredin
3. Arfarniad beirniadol o'r goblygiadau moesegol a'r risgiau cymdeithasol sy'n gysylltiedig â defnyddio dulliau deallusrwydd artiffisial

Sgiliau Ymarferol Proffesiynol:

1. Y gallu i ffurfioli problemau'r byd go iawn mewn perthynas â dulliau deallusrwydd artiffisial a ddewiswyd
2. Y gallu i ddewis dull deallusrwydd artiffisial priodol (a strategaeth cyn prosesu data os oes angen) i fynd i'r afael ag anghenion lleoliad cymhwyso penodol
3. Cymhwysedd wrth weithredu dulliau deallusrwydd artiffisial, gan fanteisio ar lyfrgelloedd presennol lle bo'n briodol
4. Dangos cymhwysedd fel gweithiwr proffesiynol TG fel rhan o'r Flwyddyn ar Leoliad Proffesiynol. 

Sgiliau Trosglwyddadwy/Allweddol:

1. Arfarnu beirniadol o'ch gwaith eich hun a gwaith eraill drwy ddulliau ysgrifenedig a llafar
2. Cyfathrebu clir ac effeithlon ynghylch syniadau, egwyddorion a damcaniaethau cymhleth drwy ddulliau llafar, ysgrifenedig ac ymarferol, i amrywiaeth o gynulleidfaoedd
3. Gwerthfawrogi cyfleoedd ar gyfer datblygu gyrfa
4. Gallu i astudio’n annibynnol, a myfyrio’n feirniadol.