Biowybodeg ac Genomeg Cymhwysol (MSc)

Sut y caf fy addysgu?

Mae'r rhaglen yn cael ei chyflwyno fel dysgu wyneb yn wyneb. Fe welwch ddeunyddiau’r cwrs, dolenni i ddeunyddiau ac asesiadau cysylltiedig ar Amgylchedd Dysgu Rhithwir Prifysgol Caerdydd, Dysgu Canolog.

Dull cyflwyno:

• Bydd pob Modiwl a addysgir yn cael ei gyflwyno drwy fodel ystafell ddosbarth ar gyfer grwpiau bach (llai na 20 o gyfranogwyr ym mhob sesiwn).
• Bydd disgwyl i chi ymrwymo tua 200 awr o ymdrech fesul modiwl; byddwch yn derbyn tua 60 awr o gyswllt wyneb yn wyneb fel rhan o hyn. Cyflwynir hyn drwy tua 20 o sesiynau addysgu. Bydd pob sesiwn addysgu yn para 3 awr a bydd egwyliau priodol.
• Bydd sesiynau addysgu yn cynnwys cyfuniad o elfennau fel theori (dysgu ar blackboard), gwaith ymarferol ar gyfrifiadur, gwaith grŵp a thiwtorial. Er mwyn cyflawni deilliannau dysgu ar gyfer cwrs sy'n seiliedig ar fiowybodeg, rydyn ni’n credu nad yw’n ddefnyddiol cyflwyno llawer o sesiynau ""darlithoedd yn unig"" yn aml iawn. Credwn y byddwch yn dysgu drwy gymhwyso a rhyngweithio. Fodd bynnag, lle bo'n briodol, bydd rhywfaint o theori yn cael ei gyflwyno fel darlithoedd.
• Cynhelir pob sesiwn ar amrywiaeth o ffurfiau, ond y strwythur cyffredinol fydd cyflawni 2-3 o ddeilliannau dysgu allweddol fesul sesiwn drwy gyflwyniad i gysyniadau allweddol, cyfleu gwybodaeth gyfredol berthnasol a dod i gysylltiad â methodoleg a chymhwyso ymchwil.
• Yn y sesiynau addysgu, byddwn yn rhoi adborth ar asesiadau ffurfiannol a chynnwys y cwrs. Yn yr elfennau hyn, byddwch yn cael y cyfle i drafod themâu neu bynciau, i atgyfnerthu eich gwaith dysgu unigol a chael adborth arno ac i ddatblygu sgiliau cyflwyno llafar. Bydd sgiliau cyfathrebu yn cael eu datblygu mewn tiwtorialau, lle byddwch yn gwneud cyfraniadau unigol i astudiaethau grŵp; er enghraifft, drwy grynhoi asesiad ffurfiannol neu ddeilliannau sesiynau grŵp.
• Byddwch yn ymarfer ac yn datblygu theori, sgiliau deallusol, gwaith tîm a chyflwyno drwy gymryd rhan mewn gweithgareddau dysgu amrywiol. Mae’r rhain yn cynnwys datrys problemau biowybodeg, trafodaethau mewn grwpiau bach, cyflwyniadau llafar, tasgau ymchwil annibynnol ac aseiniadau ysgrifenedig.
• Gallwch gael eich addysgu ochr yn ochr â myfyrwyr o Raglenni eraill, gan gynnwys yr MSc mewn Biowybodeg ac Epidemioleg Genetig yn ogystal â myfyrwyr sy'n ymgymryd â Datblygiad Proffesiynol Parhaus (DPP).

Sut y caf fy asesu?

Adborth Ffurfiannol

Mae adborth ffurfiannol yn adborth nad yw'n cyfrannu at gynnydd na phenderfyniadau dosbarthiad gradd. Nod adborth ffurfiannol yw gwella eich dealltwriaeth a'ch dysgu cyn i chi gwblhau eich asesiad crynodol. Yn fwy penodol, mae adborth ffurfiannol yn eich helpu i wneud y canlynol:

• canfod eich cryfderau a’ch gwendidau a thargedu meysydd y mae angen gweithio arnyn nhw;
• helpu staff i’ch cefnogi a rhoi sylw i'r problemau a ganfuwyd - gan alluogi strategaethau wedi'u targedu i gael eu datblygu er mwyn i chi wella.
• Mae gofyn ymarfer er mwyn datblygu sgiliau ym maes gwyddorau data. Rydych chi'n dysgu drwy eich llwyddiannau a'ch methiannau. Byddwch yn derbyn cwestiynau a thasgau byr fel rhan o'r sesiynau addysgu. Bydd y tasgau ffurfiannol hyn yn helpu i atgyfnerthu eich dysgu ac yn rhoi adborth defnyddiol i gydlynwyr y cwrs ynghylch ble gallwn wella a chanolbwyntio adnoddau. Er na fydd marciau ffurfiannol yn cyfrannu at benderfyniadau ynghylch cynnydd na ddosbarthiad gradd, bydd buddsoddi’n briodol yn y tasgau hyn yn helpu gydag elfennau crynodol y Modiwl.

Adborth Crynodol

• Adborth sy'n cyfrannu at benderfyniadau ynghylch cynnydd neu ddosbarthiad gradd yw adborth crynodol. Nod asesu crynodol yw rhoi syniad o i ba raddau rydych wedi llwyddo i gyflawni deilliannau dysgu bwriadedig Modiwl a bydd yn eich galluogi i nodi unrhyw gamau sydd eu hangen i wella. Er mwyn cynnal cysondeb a safonau, mae marcwyr asesiadau yn defnyddio cynllun marcio wedi'i ddiffinio ymlaen llaw ar gyfer pob aseiniad. Dylai'r holl adborth gael ei gysylltu’n uniongyrchol â meini prawf asesu/graddio’r modiwl.
• Mae'r dulliau adborth rydyn ni’n eu ffafrio yn cynnwys gwaith cwrs a chyflwyniadau. Yn gyffredinol, bydd myfyrwyr yn derbyn dwy elfen gwaith cwrs; papur adolygu wedi’i lywio gan theori (e.e. traethawd ""cymharu a chyferbynnu""), a phrosiect ymchwil cymhwysol. Bydd gofyn i fyfyrwyr gyflwyno canfyddiadau eu hymchwil i'w cyfoedion a'u harholwyr fel rhan o'r asesiad crynodol.
• Bydd adborth ffurfiannol yn cael ei gyfleu i fyfyrwyr yn electronig ac yn ysgrifenedig yn brydlon. Bydd adborth ychwanegol yn cael ei ddarparu i'r grŵp fel rhan o gydrannau tiwtorial y sesiynau addysgu. Darperir adborth crynodol ar asesiadau o fewn yr amserlen a nodir gan y Brifysgol.

Y Strategaeth Asesu Gyffredinol

Bydd y strategaeth asesu a fydd yn cael ei rhoi ar waith yn gwerthuso;

• Gwybodaeth a Dealltwriaeth: Bydd gwaith cwrs yn cynnwys dadansoddi data, adolygiadau ac ymarferion rhaglennu a bydd y rhain yn cael eu hasesu drwy adroddiadau ysgrifenedig.
• Sgiliau deallusol: Asesir sgiliau deallusol drwy ymarferion/aseiniadau sy'n seiliedig ar broblemau, ac adroddiadau astudiaethau achos. Caiff eich dealltwriaeth o’r deunydd ei werthuso drwy gyflwyniad hefyd. Lle bo'n berthnasol, caiff y sgiliau hyn eu hasesu drwy'r traethawd hir, cyfweliad prosiect ymchwil ac adolygiad beirniadol.
• Sgiliau ymarferol: Yn gyffredinol, asesir sgiliau ymarferol drwy aseiniadau ymarferol. Lle bo'n berthnasol, bydd angen dangos y sgiliau hyn yn y traethawd hir, y prosiect ymchwil a'r adolygiad beirniadol. Bydd asesiad o sgiliau ymarferol o'r fath yn cael ei gynnwys yn y radd derfynol ar gyfer y traethawd hir.
• Sgiliau trosglwyddadwy/allweddol: Asesir sgiliau cyfathrebu ysgrifenedig drwy ysgrifennu adroddiadau a'r traethawd hir (lle bo hynny'n berthnasol). Bydd cyflwyniadau llafar yn rhan o'r asesiad ar gyfer rhai modiwlau a bydd sgiliau gweithio mewn tîm yn cael eu hasesu yn ystod yr aseiniad ar y cyd.
• Traethawd Hir MSc: Bydd cam y traethawd hir yn cael ei asesu ar sail y traethawd hir terfynol. Neilltuir 60 credyd ar gyfer y traethawd hir ac, ar y cyd â'r cam(au) a addysgir, bydd yn cael ei bwysoli 50% ar gyfer cyfrifo'ch marc terfynol. Bydd y disgwyliadau ar gyfer fformat, cyflwyno a marcio'r traethawd hir yn dilyn Rheoliadau Asesu’r Senedd, a ategir lle bo'n briodol gyda gofynion ychwanegol y Rhaglen/Ysgol/Coleg ac unrhyw ofynion penodol sy'n deillio o natur y prosiect a gynhaliwyd. Byddwn yn rhoi canllawiau i'r myfyrwyr ar sut bydd asesiadau'n cael eu gwneud ar gyfer eu traethodau hir.

Rydyn ni wedi ymrwymo i gydraddoldeb i’r Gymraeg a’r Saesneg ac os ydych yn siarad Cymraeg cewch ofyn am gael Tiwtor Personol sy’n siarad Cymraeg, ac ymgymryd â’ch asesiadau drwy gyfrwng y Gymraeg.

Sut y caf fy nghefnogi?

Fel rhan o'r broses ymsefydlu, rydyn ni’n cynnal sesiwn groesawu 2 awr i bob myfyriwr - er mwyn i chi gael cwrdd â'ch cydfyfyrwyr, rheolwyr y cwrs a'r tîm addysgu. Rydyn ni hefyd yn darparu sesiwn ymsefydlu sy'n ymwneud â thiwtora a gwasanaethau ac adnoddau llyfrgell. Bydd pob myfyriwr yn cael llawlyfr myfyrwyr cyfredol, a fydd yn cael ei ddarparu yn fformat priodol y coleg.

Mae system diwtora personol yno i’ch tywys drwy'r cwrs er mwyn hybu llwyddiant academaidd a llesiant a datblygiad personol. Ar ddechrau'r cwrs byddwch yn cyfarfod â'ch Tiwtor Personol i ganfod a thrafod y meysydd rydych chi’n credu mae gennych gryfderau a gwendidau ynddyn nhw (gan ddefnyddio'r atebion i’r holiadur cyn y cwrs fel man cychwyn ar gyfer trafodaeth). Bydd hyn yn cwmpasu’r meysydd astudio, gallu yn y Saesneg a phrofiad blaenorol mewn arholiadau.

Bydd gwahaniaethau dysgu penodol, anabledd a/neu gyflyrau meddygol yn cael eu nodi a bydd Cyfarwyddwr y Rhaglen yn dilyn gweithdrefnau a chanllawiau'r Brifysgol ar hyn. Rydyn ni wedi ymrwymo i gydraddoldeb ar gyfer y Gymraeg a'r Saesneg ac os ydych yn siarad Cymraeg gallwch ofyn am gael Tiwtor Personol sy’n siarad Cymraeg.

O safbwynt academaidd, mae eich tiwtor yno i roi arweiniad ar unrhyw faterion/cwestiynau academaidd cyffredinol sy'n codi o'r cwrs ac i’ch annog i fwrw ymlaen â dysgu hunangyfeiriedig. Nid darllen na marcio fersiynau drafft o’ch aseiniadau yw rôl y tiwtor, ond gall drafod unrhyw bwnc a allai fod yn heriol i chi. Rhoddir adborth manwl gan Dîm y Modiwl i fyfyrwyr unwaith y bydd aseiniad wedi'i farcio. Mae croeso i chi drafod yr adborth hwn â'ch tiwtor

Yn ystod cam traethawd hir y cwrs MSc, bydd goruchwyliwr traethawd hir yn cael ei neilltuo i bob myfyriwr a fydd yn arwain eu gwaith cynllunio ac yn eu cynghori wrth iddyn nhw gwblhau eu prosiectau.

Pa sgiliau y byddaf yn eu hymarfer a’u datblygu?

Ar ôl cwblhau’r Rhaglen, byddwch yn gallu dangos y canlynol:

• dealltwriaeth systematig o egwyddorion ystadegau, biowyddorau a chyfrifiadureg sy'n sail i epidemioleg genetig a biowybodeg;
• gwybodaeth am feddalwedd a chronfeydd data biowybodeg cyfredol a sut maen nhw’n cael eu defnyddio i ddatrys problemau biowybodeg yn y maes ac yn eu hymchwil eu hunain;
• ymwybyddiaeth dda, dealltwriaeth a gwerthfawrogiad beirniadol o'r amrywiaeth eang o ddulliau ystadegol sydd ar gael i ddadansoddi data genetig, gan werthfawrogi'r materion sy'n gysylltiedig â dyluniad astudiaethau;
• gwybodaeth am feddalwedd ystadegol a ddefnyddir i ddadansoddi data omigau a'r sefyllfaoedd lle dylid/na ddylid defnyddio'r pecynnau;
• cynnwys gwybodaeth a dealltwriaeth y byddwch yn eu meithrin gyda sgiliau ymarferol, gan arwain at ddull cadarn o ddatrys problemau;
• cyfosod gwybodaeth o amrywiaeth o ffynonellau sydd ar flaen y gad o ran Genomeg a Biowybodeg;
• gwerthuso gwahanol ddulliau o ddatrys problemau yn feirniadol a dangos eu perthnasedd, eu cryfderau a'u gwendidau;
• ffurfio damcaniaethau a defnyddio sgiliau dadansoddi i brofi'r damcaniaethau hyn. Dehongli'r canlyniadau a gwneud penderfyniadau yng ngoleuni'r holl wybodaeth sydd ar gael a hynny weithiau mewn sefyllfaoedd cymhleth ac anrhagweladwy;
• cynnal darn o waith ymchwil gwreiddiol neu adolygiad beirniadol lled-annibynnol sy'n dangos eich bod yn mentro, yn cymryd cyfrifoldeb am gynllunio a chyflawni tasgau, ac yn mynd i'r afael â phroblemau ymchwil ac yn eu datrys;
• y gallu i asesu'r math cywir o ddadansoddiad ar gyfer set ddata a'i gyflawni gan ddefnyddio pecyn cyfrifiadurol priodol;
• cymhwysedd wrth gael gafael ar offer biowybodeg a'u defnyddio o amrywiaeth o ffynonellau;
• sgiliau rhaglennu cyfrifiadurol a chymhwysedd mewn dylunio rhaglenni da;
• y gallu i ddylunio, gweithredu a dadansoddi algorithmau ar gyfer rhaglenni biowybodeg;
• y gallu i gynhyrchu adroddiadau astudiaethau achos ar bynciau pwysig ym meysydd biowybodeg a bioystadegau;
• sgiliau ymchwil cymwys, fel chwiliadau llenyddiaeth;
• gweithio'n annibynnol, rheoli ei amser ei hun a chymryd cyfrifoldeb am y dysgu sy'n ofynnol ar gyfer datblygiad proffesiynol parhaus;
• rhaid rheoli tasgau unigol a phrosiectau ar raddfa fwy gan nodi a datrys rhwystrau posibl;
• gweithio fel aelod o dimau rhyngddisgyblaethol, gan nodi cryfderau a gwendidau unigolion a dyrannu gwaith yn unol â hynny i gyflawni amcanion y tîm;
• gallu defnyddio technoleg gwybodaeth, fel ebost, prosesyddion geiriau, offer meddalwedd a'r we fyd-eang;
• trosglwyddo sgiliau a chysyniadau cyfrifiadurol i becynnau/ieithoedd/cronfeydd data anghyfarwydd wedi hynny;
• cyflwyno gwybodaeth, dealltwriaeth a dadleuon gan ddefnyddio dulliau cyfathrebu effeithiol (ysgrifenedig a llafar) a bod yn ymwybodol o'r gynulleidfa darged.