Peirianneg Fecanyddol Uwch (MSc)

Sut y caf fy addysgu?

Defnyddir ystod eang o arddulliau a mecanweithiau addysgu i ddarparu'r deunydd amrywiol sy'n llunio cwricwlwm y rhaglen. Bydd disgwyl i chi fynychu darlithoedd a chymryd rhan mewn dosbarthiadau tiwtorial. Rhaid i bob myfyriwr gwblhau 120 o gredydau yng Ngham 1 er mwyn symud ymlaen i'r traethawd hir, a bryd hynny bydd goruchwyliwr yn cael ei ddyrannu i’r myfyrwyr o blith y staff addysgu. Fel arfer, dewisir pynciau traethawd hir o amrywiaeth o deitlau prosiect a gynigir gan staff academaidd, fel arfer mewn meysydd o ddiddordeb ymchwil cyfredol, er eich bod yn cael eich annog i gyflwyno eich syniadau prosiect eich hun.

Sut y caf fy asesu?

Asesir y gwaith o ddatblygu deilliannau dysgu yn y modiwlau yn yr ystafell ddosbarth drwy arholiadau'r Brifysgol ym mis Ionawr a Mai/Mehefin. Bydd asesiad sy'n seiliedig ar arholiadau yn bennaf yn cael ei ddefnyddio mewn wyth modiwl (80 credyd) a gymerir yng Ngham 1 y rhaglen. Mae'r cydbwysedd rhwng arholiadau a gwaith cwrs yn dibynnu ar y modiwlau a ddewisir. Mae’r hyn sy'n cyfateb i hyd at chwe chredyd ar gael mewn elfennau gwaith cwrs mewn modiwlau unigol, yn ogystal â dwy astudiaeth achos modiwl dwbl (40 credyd).

Mae angen cwblhau Cam 2 yn llwyddiannus, sef y Traethawd Hir, a chael marc o 50% neu uwch er mwyn cael MSc. Gellir dyfarnu Rhagoriaeth i ymgeiswyr sy’n cael marc o 70% ar gyfartaledd. Gellir dyfarnu Teilyngdod i ymgeiswyr sy’n cael marc o 60% ar gyfartaledd. Gall ymgeiswyr nad ydyn nhw’n llwyddo i ennill cymhwyster MSc gael Diploma Ôl-raddedig Addysg Uwch ar gyfer y 120 credyd yng Ngham 1. Gall ymgeiswyr nad ydyn nhw’n llwyddo i gwblhau’r 120 credyd angenrheidiol ar gyfer Cam 1 fod yn gymwys ar gyfer dyfarniad Tystysgrif Ôl-raddedig Addysg Uwch am gyflawni o leiaf 60 credyd.

Sut y caf fy nghefnogi?

Bydd Dysgu Canolog, amgylchedd dysgu rhithwir Prifysgol Caerdydd, yn cael ei ddefnyddio'n helaeth i gyfathrebu â myfyrwyr, cefnogi darlithoedd a darparu deunyddiau cyffredinol rhaglenni, fel rhestrau darllen a disgrifiadau o’r modiwlau. Gellir ei ddefnyddio hefyd i roi adborth.

Bydd tiwtor personol yn cael ei neilltuo i chi er mwyn eich helpu gyda chynnydd academaidd a chymorth bugeiliol pan fo angen. Bydd y tiwtor personol yn cwrdd â chi yn gynnar yn y rhaglen, ac yn ôl yr angen wedi hynny. Ar gyfer cam y traethawd hir, byddwch yn cael goruchwyliwr yn y maes ymchwil perthnasol, a dylech ddisgwyl cwrdd â’r goruchwyliwr yn rheolaidd. Yn ogystal â'r ystod eang o wasanaethau cymorth sy’n cael eu darparu’n ganolog gan Brifysgol Caerdydd, bydd myfyrwyr ag anghenion penodol yn cael eu cefnogi yn ôl yr angen.

Adborth

Byddwch yn derbyn adborth ysgrifenedig ar gyfer aseiniadau gwaith cwrs ysgrifenedig, ac adborth llafar ar gyfer cyflwyniadau a asesir.

Pa sgiliau y byddaf yn eu hymarfer a’u datblygu?

A. Gwybodaeth a Dealltwriaeth

Ar ôl cwblhau'r Rhaglen yn llwyddiannus bydd disgwyl i chi fod yn gallu:

• Deall theorïau, egwyddorion gwyddonol a chysyniadau yng nghyd-destun uwch-beirianneg fecanyddol, gan gefnogi'r broses o gymhwyso’r canlynol yn effeithiol - gwyddoniaeth peirianneg, mathemateg a disgyblaethau eraill sydd eu hangen ar gyfer datrys problemau uwch-beirianneg.
• Deall cyfyngiadau gwybodaeth a thechnolegau cyfredol a'r angen i gael gwybodaeth newydd drwy astudio mwy mewn ymateb i dechnolegau newydd ac sy’n dod i’r amlwg ac anghenion cymdeithas.
• Deall rôl gwaith prosiect unigol a gwaith prosiect tîm yng nghyd-destun peirianneg fecanyddol broffesiynol.
• Datblygu sgiliau rheoli prosiect sy'n briodol ar gyfer gyrfa mewn peirianneg a deall sut i gymhwyso'r sgiliau hyn mewn amgylchedd masnachol a/neu ymchwil.
• Galluogi’r broses o ddadansoddi gwybodaeth yn feirniadol, gan gynnwys llenyddiaeth gyfredol i gefnogi'r gwaith o nodi bylchau mewn gwybodaeth a allai arwain at arloesi a datblygiadau ym maes uwch-beirianneg fecanyddol.
• Bod yn ymwybodol o'r cyfrifoldebau sydd gan beirianwyr proffesiynol i gymdeithas.

B. Sgiliau Deallusol

Ar ôl cwblhau'r Rhaglen yn llwyddiannus bydd disgwyl i chi fod yn gallu:

• Defnyddio gwybodaeth a dulliau gwyddonol, sy'n seiliedig ar dystiolaeth, wrth asesu a datrys heriau peirianneg fecanyddol, yn aml heb fawr o wybodaeth ac o bosibl, gwybodaeth anghyson.
• Delio â materion cymhleth yn systematig ac yn greadigol.
• Dangos gwreiddioldeb wrth fynd i'r afael â phroblemau cyfarwydd ac anghyfarwydd gan ddefnyddio arloesedd priodol ac addasu dulliau.
• Ymgymryd â phrosiect ymchwil sylweddol mewn maes uwch-beirianneg fecanyddol sy'n cynnwys gwreiddioldeb wrth gymhwyso gwybodaeth.
• Casglu, gwerthuso, cyfosod a dehongli data ansoddol a meintiol mewn amrywiaeth o ffyrdd; a chanfod ffyrdd o gael data newydd pan fo angen.
• Ystyried, cynllunio, gweithredu a chyfleu canlyniadau darn manwl estynedig o waith prosiect grŵp.
• Cynnal dadl feirniadol, yn ysgrifenedig a thrwy gyflwyniadau.

C. Sgiliau Ymarferol

Ar ôl cwblhau'r Rhaglen yn llwyddiannus bydd disgwyl i chi fod yn gallu:

• Defnyddio dulliau mathemategol ac arbrofol priodol ar gyfer modelu a dadansoddi problemau peirianneg fecanyddol.
• Mentro a chymryd cyfrifoldeb personol wrth gwblhau prosiect grŵp, gan ystyried cyfyngiadau fel amser, cost, iechyd a diogelwch yn ogystal â materion peirianneg fecanyddol penodol.
• Cyflawni prosiect mawr yn llwyddiannus, gan ystyried cyfyngiadau fel amser, cost, iechyd a diogelwch yn ogystal â materion peirianneg fecanyddol penodol.

D. Sgiliau Trosglwyddadwy

Ar ôl cwblhau'r Rhaglen yn llwyddiannus bydd disgwyl i chi fod yn gallu:

• Trin, cyflwyno ac adrodd ar ddata mewn amrywiaeth o ffyrdd.
• Rheoli adnoddau ac amser.
• Cyfleu syniadau, egwyddorion a theorïau'n effeithiol drwy ddulliau llafar, ysgrifenedig a chorfforol neu ymarferol.
• Llunio adolygiad cryno o lenyddiaeth.
• Defnyddio offer technoleg gwybodaeth a chyfathrebu (TGCh) yn effeithiol.
• Gweithio'n effeithiol mewn grŵp tuag at gyflawni nodau a thargedau penodol.