Deunyddiau Cyflwr Solid
Mae’r Ysgol Cemeg wedi datblygu cryfder penodol mewn Cemeg Deunyddiau a Chyflwr Solid, gyda grŵp ymchwil pwrpasol i’r maes cyffrous hwn o astudiaeth. Fel rhan o’r rhaglen Cemeg (PhD/MPhil), gall myfyrwyr gynnal eu hymchwil yn y grŵp hwn.
Mae gan waith ymchwil ym maes Cemeg Deunyddiau ran hanfodol i chwarae yn cynnig atebion i heriau cymdeithasol o bwys, gan gynnwys chwilio am ffynonellau ynni newydd a chynaliadwy, mynd i'r afael â'r argyfwng hinsawdd, a datblygu deunyddiau newydd at ddibenion meddygol a fferyllol uwch. Mae gan Ysgol Cemeg Prifysgol Caerdydd gryfderau ymchwil hir-sefydlog ym maes Cemeg Deunyddiau, sy'n cynnwys elfennau sylfaenol a chymwysedig yn y maes, a charfan egnïol o fyfyrwyr ymchwil ôl-raddedig sy’n cynnal prosiectau ymchwil yn y grŵp hwn.
Mae gwaith ymchwil cyfredol ym maes Cemeg Deunyddiau yn seiliedig ar dair thema eang:
- datblygu a gwella agweddau newydd ar dechnegau arbrofol er mwyn ymchwilio i briodweddau deunyddiau
- defnyddio ystod o ddulliau arbrofol a chyfrifiadol o'r radd flaenaf i ddeall priodweddau sylfaenol deunyddiau
- dylunio deunyddiau a phrosesau newydd i'w defnyddio mewn deunyddiau uwch.
Mae myfyrwyr sy'n astudio graddau ymchwil ôl-raddedig mewn Cemeg Deunyddiau yn ennill amrywiaeth eang o sgiliau, sydd fel arfer yn cynnwys profiad mewn ystod o fethodolegau arbrofol at ddibenion paratoi a nodweddu deunyddiau, arbenigedd mewn technegau (arbrofol a/neu gyfrifiadurol) er mwyn cael gwybodaeth manwl o nodweddion sylfaenol y deunyddiau, a hyfforddiant i ddefnyddio strategaethau i lunio deunyddiau newydd ar gyfer deunyddiau penodol.
Cyswllt
Cyswllt/Cysylltiadau Gweinyddol
Dr Ben Ward
Administrative contact
Dyma enghreifftiau o gyfeiriad ymchwil presennol penodol o fewn y themâu hyn:
- Datblygu a defnyddio technegau er mwyn penderfynu ar strwythur deunyddiau organig (gan gynnwys deunyddiau biolegol a fferyllol) gan ddefnyddio data diffreithiant powdrau
- Gwella strategaethau NMR cyflwr solet newyddyn y fan a’r lle i fonitro esblygiad prosesau crisialu dros amser.
- Ymchwilio i briodweddau strwythurol deunyddiau anisotropig gan ddefnyddio technegau paladr pelydr-x polar, gan gynnwys y dechneg delweddu deublygiant pelydr-x newydd.
- Datblygu dulliau diffreithiant pelydr-x (yn enwedig o ran Ffotogrisialograffeg) er mwyn mesur priodweddau strwythurol dros amser, dros gyfnodau sy'n amrywio o funudau i bicoeiliadau.
- Dealltwriaeth sylfaenol o gynhyrchu cynyrfonau/cynhyrchu gwefrau a chludiant mewn cydosodiad moleciwlaidd
- Creu cydosodiad uwchfoleciwlaidd gweithredol at ddefnydd fel Ffotosensiteiddyddion/ffotocatalyddion rhydocs organig, ffosfforau organig tymheredd yr ystafell, a deunyddiau mandyllog ffwythiannol.
- Dyluniad a phriodweddau deunyddiau fferodrydanol sy’n ymatebol i olau ar gyfer defnyddio ynni’r haul a ffotoswitshys at ddibenion cymwysiadau ynni pyrodrydanol
- Datblygu dulliau ffurfio yn seiliedig ar systemau coloidaidd (emylsiynau, microemylsiynau, ac arwynebyddion cynaliadwy)
- Sefydlu priodweddau strwythurol macromoleciwlau mewn hydoddiant gan ddefnyddio technegau gwasgaru niwtronau â phelydr-X
- Datblygu technolegau datblygedig ar gyfer systemau cyflwyno cyffuriau ac ar gyfer pydru plastigau
- Cymhwyso dulliau cyfrifiadurol uwch i ddeall priodweddau deunyddiau solet, gan gynnwys ffenomenau sylfaenol (cyfnodau trosiadau, polymorffedd, niwcleiddio crisialau) ac agweddau cymhwysol (deunyddiau thermodrydanol, deunyddiau batri, a deunyddiau ar gyfer storio nwy)
Mae nifer o'r prosiectau ymchwil hyn yn cynnwys gweithio ar y cyd ag ymchwilwyr mewn disgyblaethau eraill (gan gynnwys y biowyddorau, ffiseg, peirianneg, meddygaeth a deintyddiaeth) o sefydliadau yn y DU a thramor, yn ogystal â chydweithio gydag ymchwilwyr mewn ystod o sectorau diwydiannol. Mae sawl prosiect ymchwil yn elwa'n sylweddol o ddefnyddio technegau arbrofol o'r radd flaenaf mewn cyfleusterau cenedlaethol a rhyngwladol, gan gynnwys cyfleusterau technegau ymbelydredd syncrotonau, pelydrau niwtron, a sbectrosgopeg NMR cyflwr solid a hynod uchel.
Mae goruchwylwyr ymchwil ôl-raddedig sy'n gweithio yn y maes hwn yn cynnwys
Prosiectau
Mae gennym restr helaeth o brosiectau ymchwil y mae goruchwylwyr yn gweithio arnynt ar hyn o bryd ac rydym yn croesawu ymgeiswyr sydd â diddordeb yn y prosiectau hyn.
Mae angen i unrhyw un sy’n dymuno cyflwyno cais ar gyfer y prosiectau hyn fod wedi sicrhau cyllid drostynt eu hunain. Gallai hyn fod gan noddwyr allanol, benthyciadau i fyfyrwyr neu drwy hunan-ariannu.
Yn ogystal â hyn, mae gennym ystod o brosiectau ymchwil â chyllid allanol. Sicrhewch eich bod yn bodloni’r meini prawf cymhwystra penodol o ran cyllid cyn gwneud cais.
Mae croeso ichi gysylltu â'r academyddion yn uniongyrchol i gael sgwrs anffurfiol neu ragor o wybodaeth
Dylid cyflwyno cais drwy wasanaeth gwneud ceisiadau Prifysgol Caerdydd. Nodwch deitl a goruchwyliwr y prosiect ar eich cais.
Arian
Gallwch chwilio am ysgoloriaeth neu gael rhagor o wybodaeth am gyllid.
Ffioedd dysgu
Myfyrwyr o'r DU
Mynnwch y wybodaeth ddiweddaraf am ffioedd ôl-raddedigion.
Myfyrwyr o'r UE, AEE a'r Swistir
Mynnwch y wybodaeth ddiweddaraf am ffioedd ôl-raddedigion.
Myfyrwyr o weddill y byd (rhyngwladol)
Gwybodaeth am y Rhaglen
I gael gwybodaeth am strwythur y rhaglen, gofynion mynediad a sut i wneud cais ewch i’r rhaglen Cemeg.
Gweld y Rhaglen
