Storfa Ddiogelu Cymru

Storfa ddigidol yw Storfa Ddiogelu Cymru, sy’n dod ag adolygiadau diogelu a gynhaliwyd yng Nghymru ers 2008 at ei gilydd mewn un lle.

Gall adolygiad o farwolaeth neu ddigwyddiad diogelu difrifol fod yn ffynhonnell bwysig o ddysgu i weithwyr proffesiynol mewn amrywiaeth o asiantaethau. Fel arfer, dogfennau mawr yw adolygiadau, sy’n cynnwys llawer o dudalennau o wybodaeth fanwl a gafwyd gan y gwahanol asiantaethau a fu’n ymwneud â’r achos, manylion cyfweliadau â’r rhai dan sylw, ac adroddiadau perthnasol eraill. Mae’r prosiect hwn yn dod â sgiliau o feysydd y gwyddorau cymdeithasol a chyfrifiadureg ynghyd i greu un storfa chwiliadwy o wybodaeth ddiogelu, a hynny gan ddefnyddio technoleg prosesu iaith naturiol a phrosesau codio ansoddol i dynnu themâu ac allweddeiriau.

Mathau o adolygiadau yn y storfa:

• Adolygiadau Lladdiadau Domestig
• Adolygiadau Lladdiadau Iechyd Meddwl
• Adolygiadau Ymarfer Oedolion
• Adolygiadau Ymarfer Plant

O 2024 ymlaen, bydd Adolygiad Diogelu Unedig Sengl yn disodli’r mathau o adolygiadau a nodir uchod, gan ddod yn dempled ar gyfer pob adolygiad diogelu a gaiff ei gynnal yng Nghymru yn y dyfodol. Wrth i Adolygiadau Diogelu Unedig Sengl gael eu cyhoeddi, byddan nhw’n cael eu lanlwytho i’r storfa, a bydd modd chwilio amdanyn nhw.

Diogelu defnyddwyr y Storfa

• Asiantaethau megis yr heddlu, gwasanaethau cymdeithasol, awdurdodau lleol
• Unigolion sy'n ymwneud â diogelu
• Cadeiryddion a’r rhai sy’n adolygu adolygiadau diogelu
• Ymchwilwyr academaidd

Pwysigrwydd Storfa Ddiogelu Cymru

Ar hyn o bryd, nid oes unrhyw storfa arall ar gael sy’n dod â’r gwahanol fathau o adolygiadau hanesyddol at ei gilydd neu sy’n gwneud y cynnwys yn chwiliadwy yn ôl allweddair neu thema. Mae’r storfa’n cael ei hariannu gan Lywodraeth Cymru er mwyn cynorthwyo dysgu cyflymach, a bydd yn rhan allweddol o’r broses Adolygiadau Diogelu Unedig Sengl newydd. Bydd y storfa’n gwneud y canlynol:

• Sicrhau bod adroddiadau ar gael i ddefnyddwyr cofrestredig mewn un lle
• Hwyluso mwy o atebolrwydd am weithredu argymhellion
• Helpu gweithwyr diogelu proffesiynol ac asiantaethau i roi dysgu ar waith yn gyflymach yn lleol, yn rhanbarthol ac yn genedlaethol
• Rhoi tystiolaeth i lywio hyfforddiant a gwella ymarfer proffesiynol

Cefndir y prosiect

Yn 2018, cafodd dau adroddiad ar sail tystiolaeth eu cyhoeddi : un dadansoddiad academaidd o farwolaeth wedi’i arwain gan yr Athro Amanda Robinson, a dadansoddiad o safbwyntiau ymarferwyr diogelu wedi’i arwain gan y Prif Gwnstabl Cynorthwyol Liane James ar ran Llywodraeth Cymru. Dadansoddodd y ddau adroddiad dirwedd yr adolygiad diogelu presennol yng Nghymru, yn ogystal â sampl o Adolygiadau Lladdiadau Domestig, Adolygiadau Lladdiadau Iechyd Meddwl, Adolygiadau Ymarfer Oedolion ac Adolygiadau Ymarfer Plant. Tynnodd yr adroddiadau sylw at yr angen am gydgysylltu, cydweithredu, cyfathrebu a llywodraethu gwell wrth gynnal adolygiadau, ac mae’r broses Adolygiadau Diogelu Unedig Sengl newydd yn seiliedig ar yr argymhellion yn y ddau ohonyn nhw. Ar ôl i’r adroddiadau gan Robinson a James gael eu cyhoeddi, cafodd Prifysgol Caerdydd ei chomisiynu i ddatblygu Storfa Ddiogelu Cymru.

Partneriaid

Mae prosiect Storfa Ddiogelu Cymru’n rhan o’r broses Adolygiadau Diogelu Unedig Sengl, ac mae’n cael ei ariannu gan Lywodraeth Cymru.

Project Lead

Key Contacts