Ymchwil

Personoli triniaethau canser

Mae canser yn faes gweithgarwch pwysig yn ein grŵp ymchwil. Mae gennym raglen barhaus o ymchwil lwyddiannus a ariennir yn allanol ym maes delweddu canser, personoli triniaethau a dadansoddi canlyniadau triniaeth.

Yn ogystal â datblygiad parhaus technegau datblygedig ar gyfer dadansoddi delweddau a data, rydyn ni’n adeiladu seilwaith TG ac algorithmau safonedig y gellir eu cynnwys mewn unrhyw broses hyfforddi a dilysu dysgu peirianyddol. Fel rhan o’r prosiect 'Datrysiadau AI ar gyfer Radiotherapi Personoledig' (ASPIRE), mae Life Imaging and Data Analytics (LIDA), Ymddiriedolaeth GIG Felindre a’r Intel Corporation yn gweithio ar brosiect sydd â'r nod o hyfforddi a dilysu meddalwedd AI ar gyfer darlunio meintiau tiwmor yn awtomataidd ar gyfryngau delweddu anatomegol a swyddogaethol.

Rydyn ni hefyd yn datblygu llif gwaith radiotherapi cwbl awtomataidd (o segmentu awtomataidd yn seiliedig ar AI i gynllunio awtomataidd yn seiliedig ar AI), ac yn datblygu system cefnogi penderfyniadau i glinigwyr ei defnyddio mewn ymarfer clinigol. Gan fod angen setiau data mawr o ystod eang o boblogaethau gwahanol sy'n cynrychioli’r amrywiaeth yn y boblogaeth gyfan o gleifion canser i ddysgu modelau rhagfynegi, rydyn ni’n defnyddio dull dysgu cyfunol a gynlluniwyd i fynd i'r afael â ffiniau moesegol a chyfreithiol a chyfyngu ar effaith cydweithrediad preifatrwydd data rhwng sefydliadau ymchwil.

Rydyn ni’n rhan o’r prosiectau Theragnosteg Drwy Gymorth Cyfrifiadur Ewropeaidd (EuroCAT) a'r Gymuned mewn Oncoleg ar gyfer Dysgu Cyflym (CORAL).

Cysylltwch â'r Athro Emiliano Spezi am ragor o wybodaeth.

Asesiadau clinigol sensitif, gwrthrychol a chyson ar gyfer clefydau niwroddirywiol

Mae clefyd niwroddirywiol yn derm cyffredinol am ystod o gyflyrau, sy'n effeithio'n bennaf ar y niwronau yn yr ymennydd dynol. Mae enghreifftiau o glefydau niwroddirywiol yn cynnwys clefyd Parkinson, clefyd Alzheimer, a chlefyd Huntington. Ar hyn o bryd mae clefydau niwroddirywiol yn gyflyrau gwanychol na ellir eu gwella sy'n arwain at ddirywiad cynyddol a/neu farwolaeth celloedd nerfol. Mae hyn yn achosi problemau gyda symudiad (atacsia), neu weithrediad meddyliol (dementia).

Mewn ymarfer clinigol, mae'r clefydau hyn a'u symptomau’n cael eu hasesu gan ddefnyddio nifer o brofion arbennig, fel yr Archwiliad Cyflwr Meddyliol Bach (MMSE) a’r Prawf Darlunio Cloc (CDT) ar gyfer dementia neu’r Raddfa Sgorio Clefyd Huntington (Parkinson) Unedig (UH(P)DRS) ar gyfer clefyd Huntington (Parkinson).

Yn draddodiadol, caiff y profion hyn eu gweinyddu gan glinigwyr arbenigol a’u hasesu ar sail arsylwadau, felly mae'r asesiadau wedi’u cyfyngu gan amrywioldeb rhwng sgorwyr ac o fewn sgorwyr unigol, tuedd oddrychol a chynllun categorïau. Ar yr un pryd, mae ’na ymchwil barhaus ar driniaethau mwy effeithiol ar gyfer clefydau o'r fath, ac felly mae angen datblygu dulliau asesu mwy sensitif, cyson a gwrthrychol ar gyfer clefydau.

Mae hwn yn gydweithrediad parhaus rhwng yr Ysgol Meddygaeth a'r Ysgol Peirianneg.

Cysylltwch â Dr Yulia Hicks am ragor o wybodaeth.

Prosesu signalau ar gyfer monitro iechyd a chwaraeon

Rydyn ni’n datblygu algorithmau datblygedig ar gyfer prosesu signalau ac ymasio data ar gyfer dadansoddi’r data a geir drwy amrywiaeth o ddyfeisiau, fel ffonau symudol, camerâu fideo, unedau mesur inertiol (IMU) ac unedau electromyograffi (EMG) ar gyfer monitro chwaraeon ac iechyd. Mae'r data’n cael ei ddadansoddi a darperir adborth priodol i'r pwnc a gweithwyr meddygol proffesiynol er mwyn monitro cyflwr y claf a datblygu triniaeth bersonoledig sy'n briodol i’r cyflwr. Mae'r cymwysiadau hyd yn hyn wedi cynnwys clefyd Huntington a phoen yn rhan isaf y cefn.

Ffrwyth cydweithrediad â’r Ysgol Meddygaeth a'r Ysgol Gwyddorau Gofal Iechyd yw’r ymchwil hwn.

Cysylltwch â Dr Yulia Hicks am ragor o wybodaeth.

Esbonio modelau dysgu dwfn ar gyfer adnabod gweithredoedd a gweithgarwch dynol

Mae poblogrwydd gwyliadwriaeth fideo a'r cynnydd helaeth mewn cynnwys fideo ar y we yn golygu mai fideo yw un o'r adnoddau data sy'n tyfu gyflymaf. Mewn fideos o'r fath, gellir dadlau mai bodau dynol yw'r pynciau mwyaf diddorol.

Mae dulliau dysgu dwfn wedi bod yn llwyddiannus mewn llawer o feysydd golwg cyfrifiadurol, gan gynnwys adnabod gweithredoedd a gweithgarwch dynol. Fodd bynnag, er mwyn bod yn hyderus wrth ragfynegi, mae angen i'w penderfyniadau fod yn dryloyw ac yn esboniadwy. Nod y prosiect hwn yw datblygu algorithmau a all esbonio'r penderfyniadau a wneir gan y dulliau dysgu dwfn, yn benodol pan gânt eu cymhwyso i adnabod gweithgarwch dynol.

Ffrwyth cydweithrediad â'r Ysgol Cyfrifiadureg a Gwybodeg yw’r ymchwil hwn.

Cysylltwch â Dr Yulia Hicks am ragor o wybodaeth.

Biofecaneg meinwe feddal

Rydyn ni’n canolbwyntio ar ddeall a chynnal strwythur a swyddogaeth meinwe feddal, gyda ffocws sylweddol ar ddeall a lleihau canlyniadau gwrthdrawiadau pen is-gyfergydiol.

Yn ddiweddar, mae effaith gronnus gwrthdrawiadau pen is-gyfergydiol ar draws chwaraeon elît, gan gynnwys pêl-droed Americanaidd, wedi cael tipyn o sylw. Rydyn ni’n gweithio ochr yn ochr â diwydiannau perthnasol i ddatblygu deunyddiau helmed newydd gyda’r nod o leihau effaith y gwrthdrawiadau hyn, tra'n dal i gynnig amddiffyniad yn erbyn anafiadau difrifol i'r ymennydd o ganlyniad i wrthdrawiadau grym uwch.

Mae ein dull gweithredu’n canolbwyntio ar fanteisio ar y rhyddid dylunio a'r dewisiadau deunyddiau a geir drwy weithgynhyrchu adiol sy'n seiliedig ar ffilamentau. Yn ddiweddar, rydyn ni wedi denu cyllid gan y rhaglenni ymchwil HeadHealthTech yn yr Unol Daleithiau a KESS II yng Nghymru, ac rydyn ni’n parhau i weithio ochr yn ochr â gweithgynhyrchwyr helmedau blaenllaw. Rydyn ni’n cydweithredu'n genedlaethol ac yn rhyngwladol gyda phrifysgolion, clinigwyr a diwydiant i gyflymu ein cynnydd a sicrhau llwybrau effeithlon i wireddu ein canfyddiadau newydd.

Cysylltwch â Dr Peter Theobald am ragor o wybodaeth.