Rydyn ni’n grŵp amlddisgyblaethol sy'n meithrin gwydnwch yn erbyn peryglon amgylcheddol drwy ymchwil, addysg a phartneriaethau sy'n cyd-fynd â Fframwaith Sendai y Cenhedloedd Unedig.

Mae ein hymchwil yn chwarae rhan sylfaenol yn y gwaith o feithrin gwydnwch yn erbyn peryglon naturiol. Ein nod yw lleihau ac atal y risgiau sy'n gysylltiedig â thrychinebau amgylcheddol, gan gefnogi Fframwaith Sendai y Cenhedloedd Unedig ar gyfer Lleihau’r Risg o Drychinebau a chytundebau cysylltiedig.

Drwy wneud ymchwil, addysgu ac ymgysylltu, rydyn ni’n helpu i wella sut mae rheoli’r risg o drychinebau (gan gynnwys sut mae lleihau, rhagweld, atal a bod yn barod i ymateb i’r risg, ymateb i argyfyngau, ailadeiladu ac adfer ac addasu i newid yn yr hinsawdd).

Rydyn ni’n ceisio sicrhau dealltwriaeth integredig o bob agwedd ar risg (h.y. perygl, cysylltiad). Rydyn ni’n gwneud y gwaith hwn yn lleol yng Nghymru, yn genedlaethol yn y DU a hefyd yn rhyngwladol. Rydyn ni’n mynd ati i weithio mewn disgyblaethau gwahanol, a hynny drwy bartneriaethau ag ysgolion eraill ym Mhrifysgol Caerdydd a sefydliadau ledled y byd.

Rydyn ni’n canolbwyntio ar y broses, yn defnyddio ein harbenigedd mewn mathau amrywiol o beryglon ac yn canolbwyntio mwyfwy ar drychinebau sy’n digwydd yn olynol. Rydyn ni’n rhoi sylw i gyfnodau amser dynol a daearegol ac yn astudio pethau o bob maint, boed ar raddfa ficrosgopig neu ar raddfa gyfandirol. Rydyn ni’n astudio systemau artraeth ac alltraeth a’r ffordd y maen nhw’n gweithio gyda’i gilydd. Rydyn ni’n cymryd gwybodaeth o gofnodion daearegol, hanesyddol a chyfrannol ac yn defnyddio ystod o dechnegau monitro a dadansoddi uwch.