Rydyn ni’n ymchwilio i ddatblygiadau ac effeithiau newid yn yr hinsawdd, yn ogystal ag astudio sut a pham mae newidiadau yn digwydd yn y system hinsawdd.

Mae newid yn yr hinsawdd yn effeithio ar bob agwedd ar yr amgylchedd byd-eang rydyn ni’n byw ynddo. Mae tymheredd cynyddol, codiad yn lefel y môr, sychder, llifogydd, sifftiau ecosystem, a digwyddiadau tywydd eithafol i gyd yn nodweddion yr 21ain Ganrif o newid hinsawdd y mae cymunedau’n ei brofi ar hyn o bryd. Mae ein hamgylchedd newidiol yn effeithio ar lawer o’r adnoddau a’r gwasanaethau yr ydyn ni’n eu gwerthfawrogi fwyaf fel cymdeithas: trafnidiaeth, bywyd gwyllt, amaethyddiaeth bwyd, ecosystemau, dŵr, ynni ac iechyd dynol.

Gan ddod â thîm amrywiol o wyddonwyr cydweithredol a rhyngddisgyblaethol ynghyd i fynd i’r afael â’r cwestiynau a’r problemau mwyaf sy’n gysylltiedig â newid yn yr hinsawdd, rydyn ni’n chwilio am atebion i’r argyfwng hinsawdd. Rydyn ni’n gweithio ar draws tri phrif faes:

• arsylwadau a dealltwriaeth sylfaenol o newidiadau yn y system hinsawdd, sut a pham y mae newid yn yr hinsawdd yn digwydd neu wedi gwneud hynny yn y gorffennol
• y datblygiadau corfforol a dynol sy’n achosi newid yn yr hinsawdd
• effeithiau newid hinsawdd, gan gynnwys effeithiau newid hinsawdd ar y blaned ac ar bobl.

Mae ein cryfder cyfunol yn ein gallu i weld a deall newid yn yr hinsawdd ar draws sawl graddfa ofodol ac amserol. Trwy ein hymchwil rydyn ni’n defnyddio sgiliau i ddatrys cofnod palaeoclimatolegol y blaned a hanes geomorffolegol arwyneb y Ddaear. Rydyn ni’n gwneud arsylwadau hanesyddol a modern allweddol, ac yn cynnig data i gyfyngu a gwneud rhagamcanion o newidiadau yn System y Ddaear yn y dyfodol.

Mae ein hymchwil yn cynnwys sawl thema gan gynnwys:

• cynhyrchu cofnodion aml-ddirprwy o newid hinsawdd yn y gorffennol
• ymchwilio i newidiadau yn y cryosffer a’r cynnydd yn lefel y môr
• cynrychioli prosesau allweddol (e.e. llwch ac erydiad, arwyneb dŵr a dŵr daear) mewn modelau arwyneb tir
• sensitifrwydd adnoddau dŵr i hinsawdd sy’n newid
• a risg hinsawdd a gwydnwch.

Ein nod yn y pen draw yw bod ein hymchwil yn llywio polisi a chynllunio, gan helpu i lunio’r ymateb byd-eang i newid yn yr hinsawdd, ar lefelau lleol (e.e. Caerdydd Un Blaned) ac ar y llwyfan byd-eang Panel Rhynglywodraethol ar Newid Hinsawdd (IPCC).