Er y gall iechyd plentyn ddylanwadu ar eu canlyniadau addysgol, mae’r hyn sy’n digwydd mewn ysgolion yn debygol o gael effaith ar reoli iechyd. At hynny, mae ffactorau eraill megis teuluoedd yn effeithio ar ganlyniadau addysg ac iechyd.

Mae archwilio a mesur pwysigrwydd yr effeithiau gwahanol hyn yn her sy'n gofyn am ymagwedd amlddisgyblaethol a chydweithredol at ymchwil.

Yma ym Mhrifysgol Caerdydd, rydym ni’n gweithio gyda’r Banc Data Diogel ar gyfer Cysylltiadau Gwybodaeth Ddienw (Secure Anonymised Information Linkage neu SAIL) ym Mhrifysgol Abertawe ar gyfer cysylltiadau data newydd a’r Ganolfan ar gyfer Modelu Aml-lefel ym Mhrifysgol Bryste ar gyfer arloesiadau methodolegol er mwyn helpu i ddeall y prosesau hyn yn well.

Prosiectau

Cost bersonol cyflyrau iechyd yn ystod plentyndod

Dim ond hyn a hyn o dystiolaeth sydd ar gael o sut mae plant â chyflyrau cronig fel diabetes, epilepsi ac asthma’n dod ymlaen mewn meysydd y tu hwnt i iechyd. Mae hyn yn rhannol oherwydd yr heriau sy’n gysylltiedig â chyfuno data gweinyddol.

Er mwyn mynd i'r afael â hyn ar gyfer diabetes, bu i ni weithio gyda’r Archwiliad Diabetes Pediatrig Cenedlaethol a’r Archwiliad Diabetes Cenedlaethol ar gyfer oedolion, ar y cyd â’r Awdurdod Safonau Addysg Uwch a Llywodraeth Cymru, i lifo a chysylltu’r setiau data hyn ar iechyd ac addysg ar gyfer Cymru.

Rhagor o wybodaeth am y prosiect hwn

STEADFAST: Deilliannau addysg ymhlith pobl ifanc â diabetes: llywodraethu ac ymwneud arloesol i gefnogi ymddiriedaeth y cyhoedd

Mae gan tua 40,000 o blant a phobl ifanc yn y DU ddiabetes (diabetes math 1 yn bennaf), ac mae mwy a mwy o bobl ifanc yn cael diagnosis ohono. Mae dulliau gwael o reoli’r cyflwr yn y tymor hir yn arwain at gymhlethdodau difrifol, sy’n gallu cael effaith sylweddol ar ansawdd bywyd a chostau’r GIG.

Mae gan bedair gwlad gartref y DU gyfrifoldeb statudol i gefnogi addysg pobl ifanc â chyflyrau iechyd, ond mae’r sail dystiolaeth i ddatblygu a gwerthuso ymyriadau’n dal i fod yn wan.

Rhagor o wybodaeth am y prosiect hwn

Ymchwilio i'r rhyngberthynas rhwng diabetes a chyflawniad addysgol plant

Bydd plentyn â diabetes yn dysgu sut i hunan-reoli lefel y glwcos yn ei waed. Bydd ansawdd y dulliau hunan-reoli hyn yn cael effaith uniongyrchol ar ei iechyd, a all gael effaith ar ganlyniadau addysgol (gan gynnwys presenoldeb a chyflawniad). Gall hyn, yn ei dro, gael effaith ar y dulliau hunan-reoli a chanlyniadau iechyd eraill.

Nod cyffredinol yr ymchwil yw gwella ein dealltwriaeth o’r rhyngwyneb rhwng canlyniadau iechyd a chanlyniadau addysgol i blant â diabetes.

Rhagor o wybodaeth am y prosiect hwn

Datblygu set ddata sy’n barod ar gyfer ymchwil a fydd yn cysylltu data ar blant a phobl ifanc yn Llundain sy’n cael ei gadw gan awdurdodau lleol a darparwyr gofal iechyd

Mae gwasanaethau gofal cymdeithasol, addysg ac iechyd i blant a phobl ifanc yn Lloegr yn wynebu heriau difrifol. Y tu hwnt i achosion proffil uchel o farwolaethau osgoadwy ymhlith plant, amcangyfrifir mai £23 biliwn y flwyddyn yw cost gymdeithasol canlyniadau gwael ymhlith plant yn y system gofal.

O ordewdra i farwolaeth, mae canlyniadau iechyd plant yn waeth nag ydynt mewn llawer o wledydd tebyg yn Ewrop. Mae llawer o blant wedi colli cyfnodau estynedig o amser o’r ysgol ac wedi cwympo ar ei hôl hi yn ystod pandemig COVID-19.

Rhagor o wybodaeth am y prosiect hwn

Gwaith Polisi a Seneddol

Mae tîm y prosiect wedi cyflwyno tystiolaeth i'r ymgyngoriadau a’r ymchwiliadau canlynol gan Lywodraeth y DU a Llywodraeth Cymru:

1. Cais am dystiolaeth ar gyfer Adolygiad y Comisiynydd Plant ynghylch y Teulu (Mai 2022)
2. Llywodraeth Cymru - Ymchwiliad y Pwyllgor Plant, Pobl Ifanc ac Addysg i Absenoldeb Disgyblion (Mehefin 2022)
3. Adolygiad ynghylch Anghenion Addysgol Arbennig ac Anableddau (SEND) yr Adran Addysg: Right support, right place, right time (Gorffennaf 2022)
4. Ymgynghoriad yr Adran Addysg 'Modernising school attendance and admission registers and setting national thresholds for legal intervention' (Gorffennaf 2022)
5. Ymgynghoriad Ofsted a’r Comisiwn Ansawdd Gofal - 'Dull newydd o gynnal Arolygiadau Ardal o Anghenion Addysgol Arbennig ac Anableddau (AAAA) (Medi 2022)
6. Ymchwiliad Pwyllgor Dethol Addysg ar 'Absenoldeb a chefnogaeth barhaus i ddisgyblion difreintiedig' (Chwefror 2023)
7. Ymchwiliad Pwyllgor Plant, Pobl Ifanc ac Addysg Senedd Cymru i 'A oes gan blant a phobl ifanc anabl fynediad cyfartal at addysg a gofal plant?' (Medi 2023)

I gael rhagor o wybodaeth cysylltwch â: frenchr3@caerdydd.ac.uk