Cyflwyniad i Ddermoscopi Gwallt ac Ewinedd (ar-lein)

Dull diagnostig anymwthiol a ddefnyddir yn eang yw dermoscopi sy'n helpu i wneud diagnosis o gyflyrau croen dermatolegol ac atodion croen.

Mae Dermoscopi gwallt ac ewinedd, a gaiff hefyd ei alw'n "Trichoscopy" ac "Onychoscopy”, yn faes newydd sy'n datblygu ym maes Dermoscopi sydd wedi helpu i wneud diagnosis o glwyfau ewinedd â phigment a rhai heb bigment a nifer o gyflyrau'r gwallt a chroen y pen.

Ar gyfer pwy mae hwn

Mae'r cwrs ar-lein hwn sy’n para 16 wythnos yn benodol ar gyfer meddygon sy'n ymwneud â gofalu am gleifion dermatoleg sydd â chlwyfau gwallt ac ewinedd, ac sydd am ddysgu rhagor am ddermoscopi atodion croen i wella eu sgiliau diagnosis o ran anhwylderau gwallt ac ewinedd.  Mae'r cwrs hefyd ar gyfer nyrsys arbenigol sy'n gweithio mewn clinigau croen, yn amodol ar gymhwyster priodol.

Rydyn ni wedi strwythuro’r cwrs hwn i'ch galluogi i weithio drwyddo yn eich amser eich hun.  Mae dwy ddarlith fyw dewisol wedi'u hamserlennu; mae'r rhain yn cael eu recordio er mwyn i chi allu eu gwylio ar adeg sy'n gyfleus i chi.

Beth fyddwch yn ei ddysgu

Nod y rhaglen hon yw datblygu'r gallu i ddefnyddio dermatosgop i wneud y canlynol:

• deall nodweddion Trichoscopig arferol croen y pen a gwallt
• deall nodweddion Onychoscopig arferol ewinedd
• gwahaniaethu rhwng gwahanol fathau o alopesia nad ydynt yn rhai creithiol
• gwahaniaethu rhwng gwahanol fathau o alopesia creithiol
• helpu i wneud diagnosis o gyflyrau gwallt a chroen y pen ar unigolion y mae croen eu pen â phigment
• gwahaniaethu rhwng anhwylderau ewinedd trawmatig, heintus a llidiol
• gwahaniaethu rhwng tiwmorau ewinedd diniwed a niweidiol
• helpu i wneud diagnosis o rai o glwyfau ewinedd â phigment

Pynciau dan sylw

Mae wyth pwnc wedi cael eu hysgrifennu gan ddermatolegwyr blaenllaw ym maes dermoscopi. Disgwylir i gyfranogwyr gwblhau pwnc bob pythefnos.

Mae nodweddion y cwrs yn cynnwys y canlynol:

• deunyddiau pwnc manwl gyda ffotograffau achosion go iawn
• cwisiau modiwl (sy'n rhoi adborth ar unwaith am berfformiad) ar gyfer pob modiwl
• darlithoedd arbenigol rhyngweithiol byw yn defnyddio meddalwedd Adobe Connect©
• fforymau trafodaeth grŵp a arweinir gan diwtoriaid arbenigol
• anogir dysgu cydweithredol yn gryf
• bydd cyfranogwyr yn gallu trafod achosion heriol neu ddiddorol y byddant yn dod ar eu traws yn eu hymarfer eu hunain (argymhellir iddynt ddefnyddio camera)
• bydd tiwtoriaid hefyd yn rhannu achosion i'w trafod o'u clinigau
• nod fforymau yw galluogi myfyrwyr i ddysgu o'i gilydd a chael adborth gan diwtoriaid

Mae pob pwnc yn cynnwys cyfres o gwestiynau amlddewis. Mae'n rhaid i gyfranogwyr gwblhau'r cwestiynau cyn symud ymlaen i'r pwnc nesaf. Bydd y cyfranogwyr sy'n bodloni'r gofynion hyn yn gymwys ar gyfer yr arholiad terfynol.

Ar ddiwedd y cwrs, bydd arholiad ar-lein yn darparu sail ar gyfer yr asesiad crynodol. Bydd cyfranogwyr sy'n llwyddo i gwblhau'r arholiad terfynu yn derbyn tystysgrif cwblhau.

Noder mai amserlen dros dro yw hwn a gallai gael ei newid. Bydd dwy ddarlith fyw yn cael eu hychwanegu'n nes at y dyddiad dechrau.

Meini prawf cymhwysedd

Rhaid i ymgeiswyr fodloni'r holl feini prawf canlynol i gael eu hystyried yn gymwys ar gyfer y cwrs hwn:

• meddu ar radd feddygol
• gweld cleifion sydd â chlwyfau croen yn rheolaidd
• meddu ar allu rhagorol yn yr iaith Saesneg
• berchen cyfrifiadur, neu gyda mynediad at un, gyda chyswllt gwe cyflymder uchel

Nid oes angen i chi fod wedi cwblhau cwrs dermatoleg neu ddermoscopi'n flaenorol, ond bydd angen rhywfaint o wybodaeth am ddermatoleg er mwyn cyfranogi'n effeithiol.

Offer

Argymhellir mynediad at ddermatosgop yn gryf er mwyn cymryd rhan yn y cwrs hwn. Argymhellir mynediad at gamera hefyd i rannu eich delweddau dermatoscopig â'r gymuned ar-lein ond nid yw hyn yn hanfodol.

Manteision

Cwrs cwbl ar-lein yw hwn, sy'n cael ei gynnal dros 16 wythnos, gydag asesiadau ar-lein.

• dysgu’n hyblyg, yn eich amser eich hun.
• cewch gipolwg ar y technegau diweddaraf gan arbenigwyr rhyngwladol ym maes trichoscopy ac onychoscopy, sy'n ysgrifennu'r pynciau ar gyfer y cwrs hwn.
• profiad o ddarlithoedd arbenigol rhyngweithiol byw.
• gweithio a dysgu ar y cyd gyda'ch cyfoedion o bob cwr o'r byd mewn fforymau trafodaeth grŵp dan arweiniad tiwtoriaid arbenigol