Cynlluniau pro bono

Dan arweiniad David Keane, Rheolwr Lleoliadau

Gan weithio gydag Age Cymru a’r bartneriaeth HOPE (Helping Others Participate and Engage) mae’r cynllun hwn yn cynnig cymorth eiriolaeth lefel isel i bobl hŷn a’u gofalwyr.

Fel rhan o’r rôl wirfoddol hon, bydd myfyrwyr yn cefnogi pobl hŷn neu eu gofalwyr i ddeall eu hawliau a gwneud penderfyniadau gwybodus, yn rhoi llais iddyn nhw ac, yn y pen draw, yn eu grymuso i eirioli drostyn nhw eu hunain. Mae Eiriolwyr Gwirfoddol Annibynnol yr elusen yn cefnogi pobl hŷn gydag ystod o faterion eiriolaeth lefel isel - o’u helpu i wneud cwynion ffurfiol, i’w cefnogi i ddod o hyd i lety sy’n addas iddyn nhw - does dim dau achos yr un fath. Mae myfyrwyr yn cael eu hyfforddi yn y rôl eiriolaeth a'r sgiliau sydd eu hangen a chânt gefnogaeth gan oruchwyliwr trwy gydol eu gwaith achos. Mae myfyrwyr yn meithrin perthynas gyda’r cleientiaid, yn adeiladu cynlluniau gweithredu ar y cyd, yn cofnodi nodiadau achos ac yn cysylltu â sefydliadau trydydd parti.

Partneriaeth y Celfyddydau (TAP)

Dan arweiniad Dr Barbara Hughes-Moore

Mae'r cynllun hwn yn bartneriaeth rhwng Ysgol y Gyfraith a Gwleidyddiaeth a nifer o theatrau/sefydliadau celfyddydol sydd wedi cynnwys Theatr y Sherman, Coleg Brenhinol Cerdd a Drama Cymru, Cwmni Sirens, Hijinx, ac Omidaze/The Democracy Box. Mae hefyd yn cael ei gefnogi gan Get the Chance a Tempo Time Credits.

Fel aelod o Bartneriaeth y Celfyddydau (TAP), gall myfyrwyr yn dysgu am sut mae'r gyfraith yn gweithio'n benodol yn sector y celfyddydau. Mae myfyrwyr yn ymgymryd â lleoliad proffesiynol gydag un o'n sefydliadau partner, yn cysgodi arweinwyr y diwydiant ac yn datblygu sgiliau cyflogadwyedd mewn ysgrifennu, cyflwyno a chydweithio. Yn rhyngweithiol ac ymarferol, bydd natur y lleoliadau yn amrywio a gall gynnwys cynnal ymchwil gyfreithiol, drafftio dogfennau polisi, allgymorth cymunedol, a datblygu prosiectau creadigol a gweithdai ar y gyfraith a'r celfyddydau.

Bydd y cyfle profiad anffurfiol hwn yn galluogi myfyrwyr i ehangu eu persbectif o beth yw 'cyfraith' a sut mae'n gweithredu yn y byd go iawn.  Wrth wirfoddoli ar y cynllun y gobaith yw y bydd myfyrwyr yn meithrin rhwydwaith proffesiynol a fydd yn ymestyn trwy gydol a thu hwnt i'w gradd.

Mae TAP yn seiliedig ar ein haddysgu yn y Gyfraith a Llenyddiaeth, un o fodiwlau dewisol y drydedd flwyddyn sy'n helpu myfyrwyr i ddod yn ddarllenwyr gwell, awduron cryfach, a chyfathrebwyr hyderus. Gall myfyrwyr ddewis dilyn y modiwl a'r cynllun pro bono ar wahân, neu gyda'i gilydd

Dan arweiniad Julie Price a Hannah Marchant

Mae negodi’n rhan o’n bywydau bob dydd, ac mae modd dysgu sgiliau allweddol, sy’n ddefnyddiol mewn unrhyw yrfa yn y dyfodol.

Mae’r rhaglen hon yn gysylltiedig â’r Gystadleuaeth Negodi (ryng-)genedlaethol, a gaiff ei noddi yn y DU gan y Ganolfan ar gyfer Datrys Anghydfodau (CEDR) yn Llundain. Rydyn ni’n defnyddio ein rhaglen hyfforddi i ddewis dau dîm o fyfyrwyr sy’n cynrychioli Ysgol y Gyfraith a Gwleidyddiaeth yn rowndiau rhanbarthol cystadleuaeth Cymru a Lloegr, gan fynd ymlaen o bosibl at y rownd derfynol yn Llundain.

Dan arweiniad David Keane, Rheolwr Lleoliadau

Mae Canolfannau Cyswllt Plant yn helpu plant a rhieni drwy gynnig amgylchedd diogel, cyfforddus a naturiol i ffwrdd o sefyllfaoedd o wrthdaro, fel y gall plant weld y rhiant nad yw’n byw gyda nhw, neu aelodau agos eraill o’r teulu, fel nain a thaid.

Mae Canolfannau Cyswllt Plant yn rhoi’r cyfle i’n myfyrwyr wirfoddoli mewn canolfannau lle gallant ddatblygu dealltwriaeth a gwybodaeth am Gyfraith Teulu, a’r system gyfreithiol bresennol ar gyfer teuluoedd yn y DU.

Dan arweiniad Jason Tucker

Yn gyffredinol, nid oes cymorth cyfreithiol ar gael ar gyfer achosion cyfraith breifat sy’n ymwneud â phlant. Mae hyn yn golygu pan fydd teulu’n chwalu, mae’n rhaid i rieni un ai dalu am gyngor cyfreithiol preifat, neu gynrychioli eu hunain (fel ymgyfreithwyr drostyn nhw eu hunain).

Gall llywio proses y llys fod yn frawychus iawn, yn enwedig pan nad oes gennych ddim profiad o achosion cyfreithiol. Prosiect addysg gyfreithiol gyhoeddus yw clinig FLASH, lle mae myfyrwyr yn rhoi gwybodaeth i aelodau’r cyhoedd i’w galluogi i ddeall ac ymdrin yn well ag achosion llys yn ymwneud ag anghydfodau am drefniadau gofalu am blentyn.

Mae myfyrwyr yn dysgu am y Ddeddf Plant, y Rhaglen Trefniadau Plant, Gorfodaeth ac Apeliadau ac yn datblygu sgiliau ysgrifennu ac ymchwil gyfreithiol ymarferol.

Dan arweiniad Holly Greenwood a  Huw Pritchard

Mae The Justice Gap yn gylchgrawn ar-lein clodwiw sy’n trafod y gyfraith a chyfiawnder a’r gwahaniaeth rhwng y ddau.

Mewn cydweithrediad â Phrifysgol Caerdydd, Prifysgol Manceinion, Prifysgol Glasgow a Choleg Prifysgol Llundain (UCL), mae’r cylchgrawn yn cynnal cynllun gohebwyr gwirfoddol sydd ar agor i fyfyrwyr y gyfraith sydd â diddordeb mewn newyddiaduraeth ac ymrwymiad i hawliau dynol.

Yn dilyn cais llwyddiannus, mae myfyrwyr yn derbyn hyfforddiant mewn ysgrifennu newyddion a sgiliau newyddiadurol ac yn cael y cyfle i gyfrannu at y safle fel gohebwyr Justice Gap, gan ysgrifennu newyddion yn ogystal ag erthyglau nodwedd ac ymchwiliadau.

Nod The Justice Gap yw ehangu’r drafodaeth am y gyfraith a chyfiawnder a chynnwys lleisiau a safbwyntiau nad ydynt yn cael eu clywed fel arfer.

Dan arweiniad David Keane, Rheolwr Lleoliadau

Rydyn ni'n cefnogi Clinig Cyfraith Cyflogaeth Speakeasy, clinig arbenigol yng Nghaerdydd.

Mae ein myfyrwyr yn cysgodi cyfreithwyr cyflogaeth sy'n rhoi cyngor cyfreithiol ar gyflogaeth a gwahaniaethu i rai o'r bobl fwyaf agored i niwed ar draws y ddinas gan gynnwys:

• y rhai a ddiswyddwyd yn ddiweddar
• y di-waith
• unigolion sy'n wynebu diswyddiadau neu gamau disgyblu/ymchwiliad
• cyflogeion y gwahaniaethir yn eu herbyn yn eu gweithleoedd
• unigolion sy'n delio â pheidio â thalu cyflogau.