Cyrsiau rhan amser i oedolion

Cyflwyno Biofoeseg

• Ydy hi’n bosib i rywun gael pump o rieni?
• A ddylai ein disgynyddion fod yn annynol?
• Ydy 'gadael rhywun i farw' yn well nag ewthanasia?
• Ydy niwroamrywiaeth yn cael ei gamddosbarthu’n anabledd?
• Beth sy'n gwahaniaethu anghydymffurfiaeth a gwallgofrwydd?
• Sut mae gormes yn dylanwadu ar brofiadau o salwch meddwl?

Mae’r modiwl hwn yn edrych ar heriau moesegol mewn meddygaeth, geneteg a niwrowyddoniaeth.

Nid oes angen unrhyw wybodaeth flaenorol am athroniaeth.

Dysgu ac addysgu

Cyflwynir y modiwl drwy ddeg sesiwn 2 awr, a fydd yn cynnwys gweithdai, trafodaethau dosbarth, gwaith grŵp bach, a sesiynau dadlau.

Byddwn ni’n trafod cwestiynau sy'n ymwneud â biofoeseg, cymdeithas a'r wladwriaeth. Bydd y drafodaeth yn cael ei llywio, fel y bo'n briodol, gan athroniaeth glasurol a chyfoes, gan gynnwys dulliau ffeministaidd, gwaith empeiraidd yn y gwyddorau dynol, achosion gwirioneddol a damcaniaethol, polisi cyhoeddus a'r gyfraith.

Gallai’r pynciau gynnwys:

• Personoldeb
• Iechyd
• Fframweithiau Moesegol
• Gormes
• Biofoeseg Fyd-eang
• Bod yn rhiant/ Plentyndod
• Bodau'r Dyfodol
• Agwedd dadol
• Meddyliau

Gwaith cwrs ac asesu

I ddyfarnu credydau, bydd rhaid i ni gael tystiolaeth o’r wybodaeth a’r sgiliau rydych chi wedi’u hennill neu eu gwella. Dylai rhywfaint o’r dystiolaeth fod ar ffurf y gallwn ei rhoi gerbron arholwyr allanol, er mwyn i ni allu bod yn hollol siŵr bod safonau wedi’u bodloni ar draws yr holl gyrsiau a phynciau.

Elfen bwysicaf y broses asesu yw y dylai gyfoethogi’ch dysg. Mae ein dulliau’n ceisio rhoi hyder i chi, ac rydyn ni’n gwneud ein gorau glas i ddyfeisio ffyrdd o asesu sy’n ddifyr ac yn addas i oedolion prysur.

Ar gyfer y cwrs hwn, byddwch chi’n gwneud y canlynol: ymarfer llunio cwestiwn byr (5%), astudiaeth achos (20%) a phapur (75%). Bydd hyn i gyd tua 1,700 – 2,000 o eiriau.

Deunydd darllen awgrymedig

Byddwch chi’n cael awgrymiadau darllen cynhwysfawr cyn i'r cwrs ddechrau.

Cyfleusterau llyfrgell a chyfrifiadura

Fel myfyriwr ar y cwrs hwn, mae gennych hawl i ymuno â llyfrgell a chyfleusterau cyfrifiadurol y Brifysgol a’u defnyddio. Rhagor o wybodaeth am ddefnyddio’r cyfleusterau hyn.

Hygyrchedd

Ein nod yw sicrhau mynediad i bawb. Rydym yn anelu at roi cyngor cyfrinachol a gwasanaeth cefnogol i unrhyw fyfyriwr sydd â chyflwr meddygol hir dymor, anabledd neu anhawster dysgu penodol. Gallwn gynnig cyngor un i un am anabledd a threfnu ymweliadau cyn cofrestru, cysylltu gyda thiwtoriaid a darlithwyr, trefnu deunydd mewn fformatau eraill, rheoli trefniadau cyrsiau hygyrch a threfniadau asesiadau, benthyg offer a sgrinio ar gyfer dyslecsia.