Graddedigion iau yn dathlu llwyddiant Prifysgol Plant Caerdydd

Mae Canolfan Bywyd y Myfyrwyr ym Mhrifysgol Caerdydd wedi cynnal seremoni raddio wahanol i’r arfer – un ar gyfer plant o bob rhan o'r ddinas.

Mae Canolfan Bywyd y Myfyrwyr ym Mhrifysgol Caerdydd wedi cynnal seremoni raddio wahanol i’r arfer – un ar gyfer plant o bob rhan o'r ddinas.

Roedd disgyblion o naw ysgol gynradd wedi gwisgo mewn capiau a gynau traddodiadol i ddathlu eu cyflawniadau a'u graddio o gynllun sydd wedi'i gynllunio i annog a datblygu cariad at ddysgu. Mae'r bobl ifanc bellach yn raddedigion Pasbort i'r Ddinas – Prifysgol Plant Caerdydd, menter mewn partneriaeth â Chyngor Caerdydd, sy'n darparu cyfleoedd allgyrsiol i blant astudio pynciau gwahanol, dysgu sgiliau newydd a chodi dyheadau.

Y llynedd, rhoddodd y cynllun peilot a ddarparwyd gan ystod o bartneriaid ledled y ddinas fynediad i dros 400 o blant i gyfoeth o weithgareddau dysgu diddorol gan gynnwys celf a cherddoriaeth, hanes, gwyddoniaeth, technoleg, peirianneg a mathemateg yn ogystal â chyrsiau dylunio diwylliannol a graffeg. Wrth i blant gymryd rhan, mae eu gweithgareddau'n cyfrannu at 'Basbort i Ddysgu' ac, yn y pen draw, i seremoni raddio diwedd blwyddyn, a fynychir gan yr 20% uchaf o gyfranogwyr ym mhob ysgol.

Cynhaliwyd Pasbort i'r Ddinas eleni – cynhaliwyd seremoni raddio Prifysgol Plant Caerdydd yng Nghanolfan Bywyd y Myfyrwyr ar 22 Mehefin ar gyfer dros 150 o blant o ysgolion cynradd sy'n cymryd rhan o Butetown, Tremorfa, Trelái, Llanedern a Threganna yn ogystal â 10 o blant eraill a ymunodd â'r cynllun yn annibynnol ar eu hysgolion – yng nghwmni eu teuluoedd balch. Derbyniodd pob un o'r graddedigion fathodyn anrhydedd ac ysgwyd llaw gan academyddion blaenllaw Prifysgol Caerdydd ochr yn ochr â neges fideo llongyfarch annisgwyl gan y cyflwynydd radio a theledu, Jason Mohammad, a fagwyd yn Nhrelái.

Dywedodd Kim Fisher, Pennaeth Ysgol Gynradd Windsor Clive yn Nhrelái, "Cafodd ein plant a'u teuluoedd ddiwrnod gwych yn y seremoni raddio. Mae eu cyfranogiad wedi codi dyheadau ar gyfer ein teuluoedd ac wedi rhoi ymdeimlad o bwrpas a chyflawniad iddynt. Rydym yn ddiolchgar iawn i'r brifysgol a'r Pasbort i'r Ddinas am eu gwahoddiad caredig."

Dywedodd Claire Morgan, Dirprwy Is-Ganghellor Addysg a Phrofiad Myfyrwyr: "Rydym yn cydnabod y rôl bwysig sydd gan Brifysgol Caerdydd i'w chwarae wrth gefnogi ac ysbrydoli pobl ifanc o'n cymunedau amrywiol i ehangu eu dysgu a helpu i gyflawni eu gwir botensial. Mae'r ystod eang o weithgareddau dysgu rydym wedi'u cyflwyno drwy gydol y flwyddyn nid yn unig yn cefnogi athrawon i gyflwyno'r Cwricwlwm newydd i Gymru, ond mae'n darparu cyfleoedd unigryw i blant ddatblygu eu gwybodaeth, eu profiadau a'u sgiliau a allai eu harwain un diwrnod i astudio yn y brifysgol."

Dywedodd y Cynghorydd Sarah Merry, Dirprwy Arweinydd Cyngor Caerdydd a'r Aelod Cabinet dros Addysg: "Rwy'n falch iawn bod yr ysgolion yn parhau i groesawu'r cynllun mor galonnog. Mae sicrhau bod Caerdydd yn lle gwych i dyfu i fyny yn parhau i fod yn uchel ar ein hagenda. Trwy wneud y defnydd gorau o adnoddau'r ddinas a'r cyfleoedd gwych sydd ar gael drwy ein partneriaeth â Phrifysgol Caerdydd, rydym yn gallu ymgysylltu â phlant a phobl ifanc trwy ystod hynod amrywiol o ddarpariaeth dysgu a lles, rhai pethau na fuasent, o bosib, yn gallu cael mynediad atynt fel arfer.”

Roedd yr adborth ar ddigwyddiad graddio Prifysgol Plant a dderbyniwyd gan y plant ac aelodau'r teulu, athrawon a phartneriaid yn hynod gadarnhaol. Dywedodd 92% o rieni eu bod am i'w plentyn fynd i'r brifysgol - ac o hyn, roedd 40% wedi newid eu meddyliau o na i ie o ganlyniad uniongyrchol i'r graddio a chyfranogiad eu plant yn y cynllun.

Rydym yn edrych ymlaen yn fawr at weld rhai o'r plant hynny a raddiodd o Brifysgol Plant Caerdydd yn dychwelyd atom yn y dyfodol i raddio fel oedolion o Brifysgol Caerdydd.