Sioe Deithiol 'Stand Up Be Counted' Sky News

Bydd barn myfyrwyr wrth wraidd darllediadau Sky News dros gyfnod yr etholiad

Rhoddir cyfle i fyfyrwyr Prifysgol Caerdydd leisio eu barn ar y materion sydd o bwys iddynt i'r genedl, fel rhan o fenter Sky News i geisio rhoi llais i bobl ifanc wrth roi sylw i etholiad 2015.

Bydd stiwdio arbennig yn ymweld â'r Brifysgol heddiw fel rhan o ymgyrch 'Stand Up Be Counted' y darlledwr. Nod yr ymgyrch yw annog pobl ifanc i ymgysylltu â gwleidyddiaeth yn y cyfnod cyn yr Etholiad Cyffredinol ym mis Mai.

Bydd eitemau'n cael eu darlledu'n fyw drwy gydol y dydd, a bydd y stiwdio'n rhoi cyfle i fyfyrwyr recordio fideos sy'n eu galluogi i ddweud eu dweud o flaen cynulleidfa fawr ar draws pob un o lwyfannau Sky. Bydd y stiwdio hefyd yn ganolbwynt i'r sylw ehangach a roddir i'r Etholiad Cyffredinol gan Sky News.

Mae Caerdydd yn un o 11 o leoliadau yn y DU y bydd y stiwdio ryngweithiol yn ymweld â nhw fel rhan o ymgyrch sy'n canolbwyntio ar etholaethau allweddol yn y DU cyn yr etholiad.

Bydd bwth tynnu lluniau yn y stiwdio hefyd, lle gall pobl ifanc rannu eu lluniau ar y cyfryngau cymdeithasol gyda'r hashnod #SUBCTour. Bydd offer awtociw yno hefyd, fel bod myfyrwyr yn gallu rhoi cynnig ar gyflwyno ar y teledu.

Dywedodd Elliott Howells, Llywydd Undeb y Myfyrwyr: "Mae annog myfyrwyr i ddangos diddordeb yn yr Etholiad Cyffredinol wedi bod yn flaenoriaeth bersonol i mi a'r sefydliad eleni. Rwyf yn hynod falch o'r hyn yr ydym wedi'i gyflawni hyd yma, gyda'n hymgyrch i annog pleidleiswyr i gofrestru, a'r ddadl wleidyddol a gynhelir yr wythnos nesaf. Mae cael sioe deithiol Sky ar gampws y Brifysgol yn gyffrous iawn! Mae'n ddigwyddiad gwych i'w ychwanegu at ein catalog o ddigwyddiadau sy'n ymwneud â'r Etholiad Cyffredinol ac mae'n sicr o fod yn boblogaidd ymysg y myfyrwyr. Mae'r rhagdybiaeth nad oes ots gan bobl ifanc am yr etholiad yn gelwydd noeth, ac mae'r ymgysylltiad gwleidyddol a welaf ymhlith ein myfyrwyr yn galonogol iawn."

Meddai John Ryley, Pennaeth Sky News: "Mae'r daith hon yn gyfle cyffrous iawn i bobl ifanc gymryd rhan yn Stand Up Be Counted ar lefel ranbarthol. Bydd yn dod â phrofiad unigryw at garreg drws pobl a allai deimlo eu bod wedi'u hymddieithrio oddi wrth y pleidiau gwleidyddol ac addewidion eu hymgyrchoedd. Rydym yn gobeithio y bydd y daith yn helpu i roi llais i fwy o bobl ifanc cyn yr Etholiad Cyffredinol, a bydd ein holl ymdrechion yn mynd tuag at gryfhau'r llais hwnnw."

Bydd y stiwdio symudol gyferbyn ag Undeb y Myfyrwyr rhwng 10am a 5pm ddydd Gwener 24 Ebrill.