Prifysgol Caerdydd yn ganolog i ddyluniad medal
22 Medi 2017
![Half Marathon medal with Main Building](https://cardiff.imgix.net/__data/assets/image/0004/941017/Half-Marathon-medal-with-Main-Building.jpg?w=570&h=321&fit=crop&q=60&auto=format)
Bydd y medal a roddir i’r rhai sy’n gorffen Hanner Marathon Caerdydd/Prifysgol Caerdydd 2017 yn dathlu partneriaeth Prifysgol Caerdydd â’r digwyddiad torfol mwyaf yng Nghymru.
Bydd y Brifysgol yn parhau fel noddwr teitl tan o leiaf 2020 ar ôl ymrwymo i dair blynedd ychwanegol. Bydd cyfanswm o 25,000 o redwyr yn anelu at groesi’r llinell derfyn ar 1 Hydref, lle byddant yn derbyn medal goffaol newydd sbon sy’n anrhydeddu’r berthynas weithiol.
Mae’r Prif Adeilad, a godwyd bron i 100 mlynedd yn ôl, yng nghanol y ddinas, yn ganolog yn y dyluniad newydd. Dyfernir y fedal foglynnog i bawb sy’n gorffen wedi iddynt daclo cwrs cyflym, gwastad, eiconig Hanner Marathon Caerdydd sydd y mwyaf hyd yma.
Dywedodd Prif Weithredwr Run 4 Wales, Matt Newman: “Mae ein partneriaeth â Phrifysgol Caerdydd wedi ffynnu ers Pencampwriaethau Hanner Marathon y Byd IAAF y llynedd a Hanner Marathon Caerdydd 2016. Rydym yn edrych ymlaen at barhau â’r berthynas hyd at 2020 o leiaf...”
“Sefydliad addysg mwyaf blaenllaw Cymru yw Prifysgol Caerdydd sydd yn adnabyddus ledled y byd am ei hymchwil arloesol a’r profiad mae’n ei gynnig i fyfyrwyr. Digwyddiad torfol mwyaf Cymru yw Hanner Marathon Caerdydd, a bydd ein partneriaeth â Phrifysgol fwyaf blaenllaw y wlad yn helpu i’r digwyddiad dyfu’n fwy byth.”
“Mae Run 4 Wales wedi ymrwymo i wella iechyd a lles y genedl yn ogystal ag ymgysylltu a rhoi rhywbeth yn ôl i'r gymuned leol. Prifysgol Caerdydd yw'r partner delfrydol i'n helpu ni i ddatblygu yn y meysydd yma.”
Mae Prifysgol Caerdydd yn gwneud y mwyaf o’i pherthynas â’r hanner marathon ail fwyaf yn y DU er mwyn cefnogi ei hymchwil. Mae’n annog myfyrwyr, staff a chyn-fyfyrwyr i godi arian tuag at ymchwil iechyd allweddol.
#TîmCaerdydd
![#TeamCardiff runners](https://cardiff.imgix.net/__data/assets/image/0007/681910/MH_210916_Cardiff_Uni_27.jpg?w=575&ar=16:9)
Bydd pob ceiniog o'r arian y bydd rhedwyr #TîmCaerdydd y Brifysgol yn ei godi yn mynd tuag at ymchwil ym meysydd canser, niwrowyddoniaeth, ac iechyd meddwl. Bydd dros 300 o leoedd rhedeg ar gael yn rhad ac am ddim i redwyr sy'n datgan eu bwriad i godi arian dros yr achos hwn.
Dywedodd yr Athro Colin Riordan, Is-Ganghellor Prifysgol Caerdydd: “Pleser o’r mwyaf yw parhau i fod yn rhan o’r digwyddiad poblogaidd iawn hwn sy’n chwarae rôl mor bwysig yn hybu ffordd iachus o fyw yn ein cymunedau...”
![](https://cardiff.imgix.net/__data/assets/image/0018/530901/VC-Prof.-Colin-Riordan-Square.jpg?w=100&h=100&auto=format&crop=faces&fit=crop)
“Mae’r hyfforddiant a’r ymrwymiad sy’n ofynnol i sicrhau medal yn anferthol, felly rydym yn falch y bydd delwedd o’n Prif Adeilad ar y fedal y bydd y rhedwyr yn ei gwisgo er mwyn dathlu eu llwyddiant.”
“Mae’r Prif Adeilad yn ganolog i’r Brifysgol ac yn dirnod sy’n annwyl gan fyfyrwyr, staff a dinasyddion fel ei gilydd.”
Bydd y ras ddydd Sul 1 Hydref, ac mae pob tocyn wedi’i werthu. Am ragor o wybodaeth ynghylch cymryd rhan fel gwyliwr neu wirfoddolwr, ewch i www.cardiffhalfmarathon.ac.uk.