Rhedeg gyda Byddin Alfie (Alfie's Army)
23 Mehefin 2017
![Gareth Thomas speaking to crowd](https://cardiff.imgix.net/__data/assets/image/0008/792233/Gareth-Thomas-speaking-to-crowd.jpg?w=570&h=321&fit=crop&q=60&auto=format)
Mae arwr rygbi Cymru, Gareth 'Alfie' Thomas wedi rhoi her i ddau grŵp o redwyr ifanc amhrofiadol - Prifysgol Caerdydd sydd wedi dod â'r timau hyn ynghyd - i gwblhau Hanner Marathon Caerdydd/Prifysgol Caerdydd.
Bydd y ddau grŵp yn rhedeg fel rhan o fyddin Alfie, sy'n cynnwys o 100 o bobl. Byddant yn cael eu hyfforddi, eu cefnogi ac yn cael cyngor gan Alfie ei hun cyn y ras ddydd Sul, 1 Hydref – mewn 100 diwrnod.
Bydd rhedwyr Alfie, grŵp o bobl ifanc rhwng 17 ac 21, yn dilyn 'Alfie's Angels' y llynedd, sef grŵp o fenywod a oedd yn rhedwyr amhrofiadol.
Bydd dau o grwpiau Byddin Alfie yn cael eu ffilmio wrth hyfforddi ar gyfer cyfres 'Alfie's Army' ar BBC1 Cymru.
![Gareth Thomas in crowd with hands in the air](https://cardiff.imgix.net/__data/assets/image/0010/792244/Gareth-Thomas-in-crowd-with-hands-in-the-air.jpg?w=575&ar=16:9)
Bydd yr ymgeiswyr llwyddiannus eraill - gan gynnwys y ddau dîm o Brifysgol Caerdydd - yn cael cofrestru'n rhad ac am ddim i wneud y ras. Byddant hefyd yn cael rhaglen hyfforddi fanwl, a'r cyfle i gwrdd â'r dyn ei hun mewn sawl digwyddiad.
Mae'r ddau dîm o'r Brifysgol yn cynnwys myfyrwyr sy'n hyrwyddo lles ymysg eu cyfoedion, a grŵp o wirfoddolwyr o fforwm ieuenctid yn Grangetown a gefnogir gan brosiect ymgysylltu Porth Cymunedol y Brifysgol.
“Gwella iechyd”
![Gareth Thomas with two young runners](https://cardiff.imgix.net/__data/assets/image/0004/792283/Gareth-Thomas-with-two-young-runners.jpg?w=575&ar=16:9)
Dywedodd Annabelle Hook, myfyriwr meddygol a chapten tîm hyrwyddwyr lles y myfyrwyr ei bod hi'n edrych ymlaen at fod yn rhan o Hanner Marathon Caerdydd/Prifysgol Caerdydd, sef ail hanner marathon mwyaf y DU.
“Rwy'n teimlo fy mod yn gorfod gwneud hyn fel myfyriwr yng Nghaerdydd. Mae pawb yn sôn cymaint amdano, ac mae cynifer o bobl yn cymryd rhan, mae awydd arnaf redeg unwaith i gael y profiad. Hefyd, mae'n wych anelu at rywbeth ar gyfer gwella iechyd,” dywedodd.
Dywedodd Ali Abdi, Rheolwr Partneriaethau'r Porth Cymunedol, a helpodd i ddod â'r tîm o wirfoddolwyr ar gyfer Fforwm Ieuenctid Grangetown at ei gilydd: “Mae Hanner Marathon Caerdydd/Prifysgol Caerdydd yn ddigwyddiad arbennig sy'n annog pobl i fyw bywydau iach a chorfforol...”
![](https://cardiff.imgix.net/__data/assets/image/0020/2720711/Ali.jpg?w=100&h=100&auto=format&crop=faces&fit=crop)
“Mae'n wych bod y Brifysgol yn cefnogi'r ras, ac rwy'n edrych ymlaen at weld ein gwirfoddolwyr o'r fforwm ieuenctid yn wynebu'r her ac yn cwblhau'r hanner marathon.”
Dywedodd Gareth Thomas y byddai'r her o baratoi 100 o bobl ifanc rhwng 17 a 21 oed ar gyfer Hanner Marathon Caerdydd yn “anoddach nag unrhyw broses yr ydym wedi ei gwneud o'r blaen, ond bydd yn fwy buddiol ar y diwedd.”
Ychwanegodd: “Bydd ganddynt allu a lefelau naturiol o ffitrwydd, ond mae ffyrdd llai iach o fyw yn fwy deniadol iddyn nhw yn ôl pob tebyg...”
“Eu hannog i fynd allan i redeg yn hytrach na threulio amser ar y cyfryngau cymdeithasol neu fynd i bartïon yw’r her.”
Ddydd Sadwrn diwethaf, rhoddodd cyn-seren Cymru a'r Llewod ddiwrnod i'w gofio i'r rhedwyr newydd wrth fynd â nhw ar eu sesiwn hyfforddi gyntaf o gwmpas Pentref Chwaraeon Prifysgol Caerdydd yn Nhal-y-bont, ac ar hyd Taith Taf.
Prifysgol Caerdydd yw prif noddwr Hanner Marathon Caerdydd, ac mae'n ategu'r bartneriaeth a oedd gennym â Hanner Marathon y Byd IAAF a gynhaliwyd yng Nghaerdydd fis Mawrth y llynedd. Ymysg y rhedwyr yr oedd y pencampwr Olympaidd dwbl, Mo Farah.
Mae'r Brifysgol yn cynnig rhywfaint o leoedd yn rhad ac am ddim fel rhan o #TîmCaerdydd i redwyr sy'n ymrwymo i godi o leiaf £150 (neu £100 i fyfyrwyr) i'n gwaith ymchwil ar ganser, niwrowyddoniaeth ac iechyd meddwl. Bydd pob ceiniog o'r arian a godir gan #TîmCaerdydd yn mynd i'r achos o'u dewis ym Mhrifysgol Caerdydd.