GW4 yn lansio uwchgyfrifiadur cyntaf o'i fath yn y byd mewn arddangosfa genedlaethol
30 Mawrth 2017
![Man inspecting of supercomputers](https://cardiff.imgix.net/__data/assets/image/0018/690012/Man-inspecting-of-supercomputers.jpg?w=570&h=321&fit=crop&q=60&auto=format)
Mae Cynghrair GW4 wedi dadorchuddio uwchgyfrifiadur ARM cyntaf y byd yn lansiad EPSRC heddiw yn amgueddfa wyddoniaeth Thinktank yn Birmingham.
Cafodd Cynghrair GW4, ynghyd â Cray Inc. a'r Swyddfa Dywydd, £3m gan EPSRC i gyflenwi gwasanaeth cyfrifiadura perfformiad uchel Haen 2 newydd a fydd o fudd i wyddonwyr ledled y DU.
Mae'r uwchgyfrifiadur, a elwir 'Isambard' ar ôl y peiriannydd enwog o Oes Victoria, Isambard Kingdom Brunel, yn galluogi ymchwilwyr i ddewis y system caledwedd orau ar gyfer eu problem wyddonol benodol, gan arbed amser ac arian.
![Brunel in front of chains](https://cardiff.imgix.net/__data/assets/image/0005/690089/Brunel-in-front-of-chains-Crop.jpg?w=575&ar=16:9)
Mae Isambard yn gallu gwneud cymhariaeth systemau ar gyflymder uchel am ei fod yn cynnwys mwy na 10,000 o unedau prosesu 64-did ARM – un o'r peiriannau mwyaf o'i fath unrhywle yn y byd.
Credir y gallai'r uwchgyfrifiadur, sydd eisoes wedi cael canmoliaeth ledled y byd, gynnig templed ar gyfer cenhedlaeth newydd o wasanaethau yn seiliedig ar dechnoleg ARM.
Mae Isambard yn cael ei adeiladu yn ei gartref newydd, y Swyddfa Dywydd, lle bydd yn rhoi cyfle i wyddonwyr hinsawdd weld yn uniongyrchol a oes angen addasu eu modelau tywydd i gyd-fynd â saernïaethau cyfrifiadurol newydd.
Dywedodd yr Athro Roger Whitaker, Deon Ymchwil yng Ngholeg y Gwyddorau Ffisegol a Pheirianneg, ac Athro Cyfrifiadura Symudol a Biogymdeithasol ym Mhrifysgol Caerdydd: "Bydd y cyfleuster Haen 2 hwn yn galluogi ymchwilwyr i arbrofi â saernïaethau newydd a datblygu dealltwriaeth uniongyrchol o broblemau perfformiad cymhleth..."
![](https://cardiff.imgix.net/__data/assets/image/0006/2713425/118176-1680294194227.jpeg?w=100&h=100&auto=format&crop=faces&fit=crop)
“Mae hwn yn gam mawr ymlaen ar gyfer y DU. Mae'r gallu i ddefnyddio uwchgyfrifiaduron ar gyfer y math hwn o waith yn hanfodol i gefnogi strategaeth ddiwydiannol y DU a'n cystadleurwydd ar lefel ryngwladol.”
![Supercomputer Isambard delivery to Met Office](https://cardiff.imgix.net/__data/assets/image/0003/691329/Supercomputer-Isambard-delivery-to-Met-Office.jpg?w=575&ar=16:9)
Dywedodd yr Athro Martyn Guest, Cyfarwyddwr Uwchgyfrifiadura ar gyfer Ymchwil ym Mhrifysgol Caerdydd: "Mae'r newid presennol mewn saernïaethau cyfrifiadura yn cynnig cyfle cyffrous i fyd gwyddoniaeth – cyfle y gellir ei lywio drwy asesu'r effaith y mae saernïaeth yn ei chael ar berfformiad codau cymhwysiad allweddol..."
![](https://cardiff.imgix.net/__data/assets/image/0009/424089/MartynGuest.jpg?w=100&h=100&auto=format&crop=faces&fit=crop)
"Rydym yn teimlo'n gyffrous iawn ynglŷn â'r syniad o berfformiad a thrwybwn gwell ym maes gwyddoniaeth, ac ynglŷn â chynnig gwasanaeth i'r gymuned sy'n hwyluso datblygiad algorithmau, a throsglwyddo ac optimeiddio codau gwyddonol o feysydd megis cemeg gyfrifiadurol, deunyddiau a pheirianneg."
Meddai'r Athro Nick Talbot, Cadeirydd Bwrdd Cynghrair GW4 a Dirprwy Is-Ganghellor Ymchwil ac Effaith ym Mhrifysgol Caerwysg: "Mae wedi bod yn bleser gweithio gyda'n partneriaid, Cray Inc a'r Swyddfa Dywydd, ar y prosiect hwn, sydd wedi dangos sut gall ethos cydweithredol ein galluogi i arwain y byd yn y maes hwn..."
"Mae Isambard yn enghraifft o arbenigedd ein rhanbarth mewn peirianneg uwch ac arloesedd digidol, a gobeithio y bydd hyn yn cynnig glasbrint ar gyfer oes newydd o uwchgyfrifiadura ledled y byd."
Sefydlwyd GW4 yn 2013 ac mae'n dod â phedair prifysgol ymchwil-ddwys flaenllaw ynghyd: Caerfaddon, Bryste, Caerdydd a Chaerwysg. Ei nod yw cryfhau'r economi ar draws y rhanbarth drwy gynnal ymchwil arloesol gyda phartneriaid ym myd diwydiant.