Llwyddiant i Gwmni Biodechnoleg
20 Rhagfyr 2016
Mae cwmni biodechnoleg a gafodd ei feithrin yng nghanolfan Medicentre Caerdydd, ar fin graddio.
Mae Indoor Biotechnologies yn arbenigo mewn cynnyrch a gwasanaethau arloesol ar gyfer ansawdd aer o dan do, gwasanaethau amgylcheddol, alergedd ac asthma.
Mae cynnyrch y cwmni yn helpu i ganfod achosion o alergeddau, gan gynnwys y rhai sy’n dod o baill, bwyd, anifeiliaid a gwiddon.
Cafodd Indoor ei lansio bedair blynedd yn ôl ac mae bellach yn dîm o saith gwyddonydd imiwnoleg sy'n ymchwilio ac yn datblygu cynnyrch newydd.
Bydd y cwmni yn symud i labordy a swyddfa newydd yn nwyrain Caerdydd. Graddio yw'r enw ar y broses hon.
Dywedodd Dr James Hindley, Cyfarwyddwr Gweithredol Indoor, "Mae'r cyfnod yr ydym wedi'i dreulio yn Medicentre Caerdydd wedi ein rhoi yn y sefyllfa orau bosibl i ddechrau'r ail gam yn natblygiad Indoor.
"Mae'r gefnogaeth yr ydym wedi ei chael gan dîm Medicentre a'u cysylltiadau wedi ein galluogi i ennill ein plwyf yn Ewrop a thu hwnt. Rydym wedi creu cysylltiadau hynod werthfawr gydag ymchwilwyr lleol, cynrychiolwyr o'r llywodraeth a darparwyr gwasanaethau proffesiynol. Rydym hefyd wedi gallu recriwtio talent eithriadol yn ne Cymru."
Mae Indoor Biotechnologies yn masnachu mewn dros 50 o wledydd ac £1.4m yw ei drosiant disgwyliedig ar gyfer 2016, ac allforion sydd i'w cyfrif am 90% ohono. Mae'n cael ei ystyried yn un o ddarparwyr cynnyrch a gwasanaethau mwyaf blaenllaw'r byd ym maes alergedd, ac fe agoron nhw gyfleuster newydd yn India yn gynharach eleni.
Mae'r cwmni yn graddio ar adeg arwyddocaol i Medicentre Caerdydd. Medicentre oedd y ganolfan meithrin busnes gyntaf o'i math yn y DU ac mae'n edrych ymlaen at ei phen-blwyddyn yn 25 oed.
Meddai Robyn Davies, Rheolwr Medicentre Caerdydd: "Rydym wedi cael sawl llwyddiant yn Medicentre, ac rydym yn hynod falch o'r datblygiad diweddaraf hwn. Mae bob amser yn werth chweil gweld ein tenantiaid yn graddio o'r ganolfan, a dymunwn bob llwyddiant i James a'i dîm yn y dyfodol. "
Mae Medicentre Caerdydd erbyn hyn yn berchen i Brifysgol Caerdydd, y prif gyfranddaliwr, a Bwrdd Iechyd Prifysgol Caerdydd a’r Fro.
