Cymdeithaseg ym Mhrifysgol Caerdydd ymhlith 100 rhaglen orau’r byd
3 Ebrill 2025
Mae Prifysgol Caerdydd wedi’i chydnabod yn un o’r canolfannau gorau yn y byd ym maes cymdeithaseg.
Mae Cymdeithaseg yn safle 86 yn nhabl cynghrair dylanwadol Rhestr QS o Brifysgolion Gorau'r Byd yn ôl Pwnc.
Mae’n darparu dadansoddiad cymharol annibynnol o berfformiad mwy na 18,300 o raglenni prifysgol unigol ledled y byd, ar draws 55 o ddisgyblaethau academaidd.
Yn ôl Dr Kate Moles, Darllenydd Cymdeithaseg, “Mae gan Gymdeithaseg ym Mhrifysgol Caerdydd hanes maith o gydweithio rhyngwladol ac effaith mewn ymchwil empirig ac arloesedd methodolegol.
Yn y cyfnod anodd hwn yn lleol ac yn fyd-eang, mae’n hyfryd gweld ymdrechion a rhagoriaeth cydweithwyr ym maes addysgu ac ymchwil yn cael eu cydnabod yn Rhestr QS.
“Rydyn ni’n edrych ymlaen at barhau i gydweithio i gyfrannu’n gadarnhaol at fywydau ein myfyrwyr ac i ymateb yn feirniadol ac yn ofalus i’r ystod o heriau y mae cymdeithas yn eu hwynebu ar hyn o bryd.”
Mae QS yn defnyddio pum metrig allweddol i restru pynciau. Mae dangosyddion enw da yn seiliedig ar ymatebion mwy na 240,000 o gyflogwyr ac academyddion i arolygon QS, tra bod Nifer y Cyfeiriadau fesul Erthygl a Mynegai H yn mesur effaith ymchwil a chynhyrchiant. Caiff y Rhwydwaith Ymchwil Ryngwladol (IRN) ei ddefnyddio i asesu cydweithio trawsffiniol ar ymchwil.
Rhagor o wybodaeth am gymdeithaseg yn Ysgol y Gwyddorau Cymdeithasol