Prifysgol Caerdydd yn lansio MSc newydd Dadansoddeg Busnes i fynd i’r afael a’r galw cynyddol yn y diwydiant
13 Mawrth 2025
Mae Ysgol Busnes Caerdydd a'r Ysgol Mathemateg wedi dod at ei gilydd i lansio MSc newydd Dadansoddeg Busnes i roi’r sgiliau i fyfyrwyr drawsnewid data i benderfyniadau busnes effeithiol.
Mae'r rhaglen hon yn rhoi'r adnoddau a'r arbenigedd i fyfyrwyr ymdrin â data mawr, dysgu rhagor a chael effaith go iawn yn y gymdeithas a’r maes busnes. Mae’r cwricwlwm yn cynnwys dysgu peirianyddol, darogan, rheoli risgiau ac ymchwil weithredol. Bydd myfyrwyr yn dysgu i feddwl yn ddadansoddol, y mae galw mawr amdano ymhlith cyflogwyr.
Dywedodd Dr Laura Purvis o Ysgol Busnes Caerdydd:
"Mewn oes sy'n seiliedig ar ddata, mae busnesau angen gweithwyr proffesiynol medrus sy’n gallu gwneud data cymhleth yn gipolygon strategol. Mae'r rhaglen hon yn rhoi arbenigedd dadansoddol a phrofiad ymarferol i fyfyrwyr lwyddo mewn marchnad fyd-eang sy’n tyfu’n gyflym."
Bydd myfyrwyr yn cael eu haddysgu gan arbenigwyr blaenllaw o Ysgol Busnes Caerdydd a’r Ysgol Mathemateg, ac yn archwilio i’r datblygiadau arloesol diweddaraf ym maes dadansoddeg busnes wrth roi eu gwybodaeth ar waith mewn sefyllfaoedd y byd go iawn. Mae'r rhaglen yn cynnwys systemau efelychu uwch, i roi’r cyfle i fyfyrwyr gael gwybodaeth ymarferol a mynd i’r afael â heriau busnes cymhleth.
Dywedodd yr Athro Paul Harper, arweinydd y rhaglen o'r Ysgol Mathemateg:
"Mathemateg yw sylfaen dadansoddeg busnes. Gan roi technegau gwyddor data uwch ar waith, rydyn ni’n cynnig cyfle i fyfyrwyr sydd â sgiliau meddwl yn ddadansoddol a datrys problemau gael gwybodaeth werthfawr gan setiau data cymhleth.’’
Dyma gyfle perffaith i’r rhai sy’n dilyn gyfra ym maes dadansoddeg, rheoli data, ymgynghoriaeth a thu hwnt. Bydd graddedigion yn barod i wneud effaith sylweddol mewn oes sy’n dod yn fwyfwy seiliedig ar ddata.
Mae’r cyfnod ymgeisio i ddechrau astudio ym mis Medi 2025 ar agor.
Dewch o hyd i ragor o wybodaeth am y rhaglen Dadansoddeg Busnes (MSc)
