Cydymaith ymchwil yn ennill Gwobr Ddoethurol fawreddog y Gymdeithas Ymchwil Weithredol

Mae Dr Elizabeth Williams wedi ennill Gwobr Doethuriaeth y Gymdeithas Ymchwil Weithredol (OR) ar gyfer 2023 am y traethawd doethurol a gyflawnodd yn ystod ei PhD yn yr Ysgol Mathemateg.

Enillodd traethawd ymchwil Elizabeth ar 'Gysylltu dadansoddeg ragfynegol a rhagnodol ar gyfer modelu gwasanaethau gofal iechyd ar gyfer cleifion bregus ac oedrannus,' o blith rhestr fer gystadleuol o wyth yn y rownd derfynol.

“Mae derbyn y wobr hon yn anrhydedd. Roedd fy nhraethawd ymchwil yn canolbwyntio ar ddatblygu dulliau dadansoddol arloesol i wella effeithlonrwydd ac effeithiolrwydd gwasanaethau gofal iechyd i gleifion bregus ac oedrannus. Drwy gyfuno gwahanol fathau o ddadansoddiadau, mae modd rhagweld anghenion cleifion yn well a chynllunio gwasanaethau’n fwy effeithiol, gan sicrhau bod y gofal cywir ar gael ar yr amser cywir."

Mae'r gamp hon yn garreg filltir arwyddocaol i Brifysgol Caerdydd, gan fod myfyrwyr PhD o Grŵp Ymchwil Weithredol yr ysgol bellach wedi ennill Gwobr Ddoethurol y Gymdeithas Ymchwil Weithredol dair gwaith yn y 15 mlynedd diwethaf. Mae'r wobr hon yn agored i fyfyrwyr PhD o brifysgolion ledled y DU.

Mae’r llwyddiant hwn yn dilyn yn ôl-troed enillwyr blaenorol Prifysgol Caerdydd, gan gynnwys Dr Geraint Palmer, a enillodd yn 2018, a Dr Richard Wood, a dderbyniodd yr anrhydedd yn 2011.

Derbyniodd Elizabeth y wobr yn ystod Darlith Blackett y Gymdeithas Ymchwil Weithredol ar 5 Rhagfyr 2024, yn y Gymdeithas Frenhinol yn Llundain.