Ymchwilwyr a phobl ifanc yn gweithio gyda’i gilydd ar astudiaeth flaenllaw canolfan ymchwil
10 Chwefror 2025
Yn ddiweddar, cynhaliodd tîm Astudiaeth Sgiliau er Lles Pobl Ifanc (SWELL) sesiwn ddiddorol a llawn gwybodaeth gyda Grŵp Cynghori Ieuenctid Canolfan Wolfson (YPAG).
Nod yr astudiaeth SWELL yw profi a all rhaglen ar-lein therapi ymddygiad gwybyddol (CBT) mewn grŵp ar gyfer pobl ifanc helpu i’w hamddiffyn rhag iselder a gwella ansawdd eu bywyd.
Mae Grŵp Cynghori Ieuenctid Canolfan Wolfson (YPAG) wedi chwarae rhan bwysig wrth lunio cynlluniau ymchwil presennol y ganolfan. Roedd y sesiwn ar y cyd hon yn cynnwys trafodaeth bellach rhwng ymchwilwyr a phobl ifanc. Roedd hefyd yn gyfle i'r tîm ymchwil rannu gyda'r cynghorwyr ieuenctid yr effaith a gafodd eu barn ar gynlluniau'r astudiaeth a chynnig cyngor i'r rhai sydd â diddordeb mewn dilyn gyrfaoedd clinigol yn y dyfodol.
Dechreuodd y digwyddiad gyda "chlinig gyrfaoedd" bach dan arweiniad Dr Jac Airdrie ac Emily Barnacle, a rannodd eu teithiau amrywiol i seicoleg glinigol.
"Diolch yn fawr iawn i Jac ac Emily am gychwyn y flwyddyn gymryd rhan mewn steil! Roedd eu cyfraniadau yn rhoi cipolygon gyrfa gwerthfawr ac hefyd yn atgyfnerthu pwysigrwydd cael pobl ifanc i gymryd rhan wrth lunio ymchwil iechyd meddwl."
Gyda dau ddarpar seicolegydd yn y grŵp, rhoddodd y sesiwn gipolwg diddorol, gan ysgogi cwestiynau meddylgar gan y bobl ifanc oedd yn bresennol. Roedd y drafodaeth yn ymdrin ag amrywiaeth o lwybrau i seicoleg glinigol, gan dynnu sylw at brofiadau academaidd a chlinigol fel cyfleoedd i gamu ymlaen i'r maes.
Yn dilyn y clinig gyrfaoedd, rhoddodd Jac ac Emily ddiweddariad i’r Grŵp ar sut mae eu hadborth wedi llywio’r gwaith o ddatblygu’r ymyriad therapi ymddygiad gwybyddol (CBT) ar-lein mewn grŵp sy’n rhan o’r astudiaeth SWELL. Roedd aelodau'r Grŵp yn gwerthfawrogi gweld eu cyfraniadau ar waith, gydag un aelod yn dweud, "Mae mor braf gweld cynnydd yr ymchwil i'r pwynt hwn."
Rhannodd person ifanc o'r YPAG ei farn ar y digwyddiad:
"A minnau’n ddarpar seicolegydd clinigol, cynigiodd cyfarfod y Grŵp gyda'r tîm SWELL gyfleoedd rhwydweithio gwerthfawr i mi a gwell dealltwriaeth o wahanol lwybrau i symud ymlaen tuag at yrfa mewn seicoleg.
Rhoddodd yr ymchwilwyr gipolwg ar y gwahanol lwybrau y maen nhw wedi'u cymryd i seicoleg glinigol, gyda rhai'n canolbwyntio mwy ar y byd academaidd ac ymchwil ac eraill yn pwysleisio profiad clinigol. Roedd y cyfarfod yn ddiddorol iawn, ac fe wnaeth fy annog i edrych ar rolau ymchwil yng Nghanolfan Wolfson ym Mhrifysgol Caerdydd nad oeddwn i wedi'u hystyried o'r blaen.
Fe wnes i fwynhau cael y cyfle i ofyn cwestiynau yn ystod ac ar ôl y cyfarfod ac rwy wedi cael y cyfle i roi adborth am glinigau gyrfaoedd hoffwn i eu gweld yn cael eu trefnu yn y dyfodol.”
"Roedd cynnal fy sesiwn YPAG gyntaf yn bleser. Roedd yn wych cael cyfarfod â grŵp oedd wedi ymgysylltu’n fawr y gwnaeth eu cwestiynau diddorol ein helpu i ystyried y ffordd orau o gefnogi pob person ifanc a llunio ymchwil yn y dyfodol."
Dysgwch ragor am sut mae Canolfan Wolfson yn cynnwys y cyhoedd a sicrhau bod lleisiau pobl ifanc yn parhau i fod wrth wraidd eu hymchwil.