Gweithio gyda sefydliadau, ble bynnag y maent yn y byd
19 Chwefror 2025
Mae ein gwaith yn ystwyth iawn, sy’n ein galluogi i gydweithio â sefydliadau ar draws y byd.
Yn rhan o'n hadolygiad o 2024, rydyn ni’n edrych yn ôl ar brosiectau a rhaglenni Datblygiad Proffesiynol Parhaus (DPP) sydd wedi'u cynllunio ar gyfer cynulleidfa ryngwladol.
Yn 2024, gwelsom atgyfodiad cryf rhaglenni rhyngwladol wyneb-yn-wyneb, gan dynnu sylw at werth parhaus dysgu ac ymgysylltu wyneb-yn-wyneb. Fodd bynnag, hyd yn oed yn ystod adegau eithriadol o heriol, rydym bob amser yn dod o hyd i ffyrdd o gyflwyno rhaglenni, fel y mae ein gwaith gyda British Council Wcráin yn ei ddangos.
Byddwn ni’n mabwysiadu agwedd fyd-eang ac yn ymdrechu i sefydlu partneriaethau rhyngwladol sy'n wirioneddol weithio i’r ddwy ochr. Byddwn ni’n wynebu’r dyfodol, yn paratoi ar ei gyfer ac yn mynd ati i’w lywio ym mhopeth rydyn ni’n ei wneud. Yn ein huno fydd cenhadaeth i ail-lunio, trawsnewid ac adfywio’r hyn sy’n bosibl, nid yn unig ar gyfer yfory, ond ymhell y tu hwnt i hynny.
Yn 2024, gwnaethom groesawu sawl dirprwyaeth ryngwladol, gan atgyfnerthu partneriaethau hirsefydlog y Brifysgol â sefydliadau dethol ledled y byd. Mae cydweithio â’n partner strategol, Prifysgol Xiamen, yn enghraifft o atgyfnerthu ein partneriaethau. Gweithiodd yr Uned Datblygiad Proffesiynol Parhaus yn agos gyda Chyfarwyddwr Rhaglen MBA Ysgol Busnes Caerdydd, Dr Saloomeh Tabari, i gynllunio a chynnal Ysgol Haf Addysg Weithredol unigryw ar gyfer myfyrwyr MBA Prifysgol Xiamen.
Cafodd amgylchedd dysgu deinamig ei greu gennym, lle gallai gweithwyr proffesiynol o wahanol gefndiroedd ddod ynghyd i ddysgu, rhwydweithio a rhannu profiadau. Cawsant eu hannog i bontio’r bwlch rhwng theori academaidd a defnyddio gwybodaeth/sgiliau yn y byd go iawn wrth ddychwelyd i’w rolau proffesiynol yn Tsieina.
Gan adeiladu ar lwyddiant Ysgol Haf Addysg Weithredol, rydym yn edrych ymlaen at lansio rhaglen agored, a fydd yn cael ei chyflwyno ym mis Mehefin 2025. Bydd y fenter newydd hon yn canolbwyntio ar arwain drwy arloesi, gan ystyried themâu trawsnewidiol megis arweinyddiaeth, entrepreneuriaeth, marchnata, deallusrwydd artiffisial ac arloesedd digidol a hefyd arferion busnes cynaliadwy.
Gwnaethom gynllunio model yr Ysgol Haf fel bod modd ei ddefnyddio mewn disgyblaethau eraill. Ar hyn o bryd, rydym yn gweithio gyda’r Sefydliad Arloesi er Trawsnewid Digidol i ddatblygu rhaglen debyg wythnos o hyd sy’n trin a thrafod deallusrwydd artiffisial, datblygiadau technolegol arloesol ac arweinyddiaeth.
Dilynodd prosiectau rhyngwladol pellach, ac ymwelodd dirprwyaeth o Ganolfan Wasanaethau BBaChau Shanghai â ni ym mis Rhagfyr. Tynnodd y rhaglen bwrpasol hon, a gafodd ei llunio ar y cyd ag Ysgol Busnes Caerdydd, ar bynciau y mae gwahanol raglenni MSc yn ymdrin â nhw. Ymgollodd y cynrychiolwyr yn ecosystem cymorth busnes ac entrepreneuriaeth gyffrous de Cymru, a chafodd syniadau ac arfer gorau eu rhannu rhwng ein dau ranbarth.
Mae ein gwaith rhyngwladol yn ymestyn i raglenni ar-lein sy’n rhoi hyfforddiant dan arweiniad arbenigwyr ar sail ymchwil academaidd i wella sgiliau ymarferol, gallu a gwybodaeth. Darllenwch ragor am effaith ein cwrs blaenllaw Cyflwyniad i Ddermosgopi a’r rhaglen PgDip Dermatoleg Ymarferol (y ddau’n cael eu cyflwyno gan yr Ysgol Meddygaeth), yn dilyn ein cyfweliad gyda Dr Pippa Bowes. Esboniodd Pippa ei rhesymau dros ddewis gwneud y cwrs Datblygiad Proffesiynol Parhaus ac ym mha ffyrdd y mae’r cwrs wedi cael effaith ar ei hymarfer proffesiynol.
Roedd y cwrs Cyflwyniad i Ddermosgopi yn ddefnyddiol iawn ac yn fuddiol; Fe wnaeth wella fy hyder a'm sgiliau gan ddefnyddio dermatosgop wrth wirio briwiau croen mewn cleifion. Fe wnaeth hyn wella'r gofal roeddwn i'n gallu ei gynnig i'm cleifion - roeddwn i'n gallu tawelu meddwl cleifion am friwiau diniwed yn gyflym a gyda hyder, gan leihau biopsïau diangen. Byddwn ni’n argymell y cwrs hwn i unrhyw feddyg neu nyrs arbenigol sy'n gweld cleifion â briwiau croen yn rheolaidd.
Yng Ngholeg y Gwyddorau Ffisegol a Pheirianneg (ABCh), rydyn ni wedi ehangu ymhellach ein cydweithrediad â chwmni mwyngloddio aur byd-eang blaenllaw, gan wella cyrhaeddiad ac effaith ein cyrsiau ar-lein llwyddiannus, Daeareg Strwythurol ar gyfer Archwilio a Mwyngloddio a Chyflwyniad i Dechnegau GIS.
Mewn ymateb i adborth cleientiaid, rydyn ni wedi bod yn gweithio drwy gydol 2024 i ailbecynnu'r rhaglenni hyn yn gyrsiau asyncronig ar-alw. Mae'r dull hwn yn ein galluogi i greu deunyddiau dysgu amlbwrpas y gellir eu cyrchu ar unwaith a'u hastudio ar gyflymder a lle sy'n rhoi hyblygrwydd llwyr i ddysgwyr ledled y byd.
Cysylltu â ni
Oes gennych chi ddiddordeb mewn sut gallwn ni greu DPP ymarferol, seiliedig ar ymchwil ar gyfer eich sefydliad? Cysylltwch â'n tîm cyfeillgar am sgwrs gychwynnol.
