Yr Athro Caroline Lear yn cael ei phenodi i Bwyllgor Gwyddoniaeth Cyngor Ymchwil yr Amgylchedd Naturiol

Llongyfarchiadau cynnes i'r Athro Caroline Lear, Deon Ymchwil ac Arloesedd Coleg y Gwyddorau Ffisegol a Pheirianneg, ar ei phenodiad llwyddiannus i Bwyllgor Gwyddoniaeth Cyngor Ymchwil yr Amgylchedd Naturiol (NERC).

Cyngor Ymchwil yr Amgylchedd Naturiol (NERC) sy’n ysgogi buddsoddiad yn y gwyddorau amgylcheddol yn y DU. Trwy fuddsoddi arian cyhoeddus i wyddoniaeth sy'n arwain y byd trwy seilwaith, ymchwil a hyfforddiant, nod NERC yw ein helpu ni i gynnal ein hadnoddau naturiol, ac i elwa ohonyn nhw, gan ragweld ac ymateb i beryglon naturiol a newid yn yr amgylchedd. Y Pwyllgor Gwyddoniaeth yw prif ffynhonnell NERC ar faterion gwyddonol.

A hithau’n aelod o Bwyllgor Gwyddoniaeth NERC, bydd yr Athro Lear yn cefnogi rhagoriaeth a chynaliadwyedd ymhlith cymuned wyddoniaeth y DU, gan fanteisio ar gyfleoedd i wthio ffiniau gwybodaeth. Wedi'i lywio gan flaenoriaethau strategol NERC, bydd yr Athro Lear yn comisiynu ac yn gwerthuso perfformiad ymchwil ac arloesedd, hyfforddiant ôl-raddedig, partneriaethau, ymgysylltu â'r cyhoedd, a gallu cenedlaethol.

Mae gan NERC bum thema allweddol wrth wraidd eu strategaeth pum mlynedd:

• adeiladu dyfodol gwyrdd,

• sicrhau byd diogel a gwydn,

• creu cyfleoedd a gwella canlyniadau i gymunedau,

• sicrhau iechyd, heneiddio a lles gwell i bawb

• mynd i'r afael â haint.

Ar hyn o bryd mae'r Pwyllgor Gwyddoniaeth yn cynnwys 13 aelod o brifysgolion ledled y DU sy'n dod â safbwyntiau strategol eang er mwyn cyflawni'r nodau hyn.

Ochr yn ochr â bod yn Deon Ymchwil ac Arloesi Coleg y Gwyddorau Ffisegol a Pheirianneg, mae'r Athro Lear hefyd yn athro Hinsoddau’r Gorffennol a Newidiadau i Systemau'r Ddaear, ac yn Hyrwyddwr Cydraddoldeb, Amrywiaeth a Chynhwysiant (EDI) yn Ysgol Gwyddorau'r Ddaear a'r Amgylchedd. Ymhlith ei diddordebau ymchwil y mae hinsoddau’r gorffennol, newidiadau i systemau'r Ddaear, dirprwyon geocemegol, a palaeoeigioneg Cenozoig.