Rhaglenni BA ac MA Athroniaeth newydd ac arloesol wedi’u lansio

Mae athroniaeth bob amser wedi rhoi sylw i’r problemau mawr sy’n ymwneud â natur ddynol a'n lle yn y byd. Mae rhaglenni newydd yr Ysgol Saesneg, Cyfathrebu ac Athroniaeth yn cyfeirio'r pwnc hynafol a pharhaus hwn yn uniongyrchol at y problemau y mae cymdeithas yn eu hwynebu heddiw.

Yn ogystal â chanolbwyntio’n draddodiadol ar y problemau craidd sy'n diffinio'r ddisgyblaeth a sut mae'r meddyliau gorau wedi mynd i'r afael â nhw, bydd myfyrwyr Athroniaeth yn yr ysgol yn dysgu sut i gyfleu syniadau cymhleth mewn amrywiaeth o wahanol fformatau. Byddan nhw hefyd yn trin a thrafod sut y gall athroniaeth lywio penderfyniadau ar y cyd mewn busnesau, mewn elusennau ac yn y llywodraeth.

Dywedodd Dr Anneli Jefferson, Cyfarwyddwr Astudiaethau Athroniaeth: "Rydyn ni’n edrych ymlaen at gynnig rhaglenni sy'n cyfuno’r broses o astudio cwestiynau athronyddol yn drylwyr â’r broses o ddefnyddio meddwl a syniadau athronyddol yn y byd go iawn. Mae hyn yn amrywio o ddatblygu'r gallu i ysgrifennu'n effeithiol ar gyfer cynulleidfaoedd gwahanol i feddwl am argymhellion ar gyfer polisïau sy’n mynd i’r afael â phroblemau cymdeithasol presennol."

Mae Prifysgol Caerdydd yn cynnig pum rhaglen Athroniaeth israddedig. Yn ogystal â'r rhaglen Athroniaeth (BA) anrhydedd sengl, mae pedair rhaglen gydanrhydedd ar gael: Llenyddiaeth Saesneg ac Athroniaeth (BA); Athroniaeth ac Ieithyddiaeth (BA); Athroniaeth a Gwleidyddiaeth (BA); Crefydd, Athroniaeth a Moeseg (BA); a Chymraeg ac Athroniaeth (BA).

Mae'r pum rhaglen yn fodd i ymarfer a chael hyfforddiant ar wahanol fathau o gyfathrebu, gwneud penderfyniadau ar y cyd a defnyddio sgiliau a gwybodaeth athronyddol i lywio penderfyniadau strategol a pholisi. Mae pob un yn croesawu ceisiadau gan fyfyrwyr ar hyn o bryd, gyda'r carfannau cyntaf yn dechrau ym mis Medi 2025.

Mae’r myfyrwyr yng ngharfan gyntaf y rhaglen meistr newydd yn canolbwyntio ar fireinio eu gwybodaeth a'u sgiliau athronyddol. Y semester nesaf, ochr yn ochr ag astudio gwaith cyfoes ym maes athroniaeth, byddan nhw’n dysgu sut i gynnwys athronwyr academaidd mewn trafodaethau cydweithredol ag aelodau o broffesiynau eraill i fynd i'r afael â phryderon cyffredin.

Meddai Dr Lucy Osler, Cyfarwyddwr Athroniaeth (MA): "Mae ein rhaglen MA yn pwysleisio mai ymdrech ar y cyd yw athroniaeth sy'n cysylltu ein myfyrwyr â'i gilydd a'r byd y tu hwnt i'r byd academaidd. Rwy'n edrych ymlaen at weithio gyda'n myfyrwyr y tymor nesaf ar eu syniadau ar gyfer digwyddiadau gyda phartneriaid allanol, gan drin a thrafod sut y gallwn ni roi athroniaeth ar waith."