Clinig cyngor cyfraith sy’n rhad ac am ddim yn agor i’r cyhoedd

Mae aelodau o’r cyhoedd sydd angen cymorth gyda materion cyfreithiol bellach yn gallu cael cyngor rhad ac am ddim o ganlyniad i gynllun pro bono newydd sy’n cael ei gynnig gan Ysgol y Gyfraith a Gwleidyddiaeth.

O fis Tachwedd 2024, bydd myfyrwyr y gyfraith yn gwirfoddoli yng Nghlinig y Gyfraith Prifysgol Caerdydd yng Nghanolfan Cyfiawnder Sifil a Theulu Caerdydd, gan gynnig cyngor am ddim i aelodau'r cyhoedd sydd angen cymorth ar achosion tai a chyfraith teulu. Bydd cyngor yn cael ei roi yn dilyn apwyntiad wyneb yn wyneb gyda myfyrwyr y gyfraith a fydd yn cael eu goruchwylio gan Krista Robinson, cyfreithiwr sy’n meddu ar dros 20 mlynedd o brofiad ym maes cyfraith ac ymarfer tai.

Esboniodd Krista, “Gall y gost o gyfarwyddo cyfreithiwr fod yn ddrud iawn gan nad yw cymorth cyfreithiol wedi bod ar gael i raddau helaeth ers 2012. Mae hyn yn golygu bod nifer y bobl heb gynrychiolaeth yn y system llysoedd wedi cynyddu'n sylweddol. Mae pobl yn aml yn teimlo'n unig, wedi'u gorlethu ac ar eu gwanaf. Nod Clinig y Gyfraith yw gwella mynediad at gyfiawnder drwy gynnig y cyfle iddyn nhw siarad â’n cynghorwyr myfyrwyr.”

“Rydyn ni’n gobeithio bydd y gwasanaeth hwn yn arbed amser a chostau i’r unigolyn a’r llysoedd ac yn mynd i’r afael â phroblemau cyn iddyn nhw waethygu. Ar ôl cael eu cynghori, bydd cleientiaid mewn gwell sefyllfa i wneud penderfyniadau gwybodus ynglŷn â’u hachosion.”

Bydd cleientiaid yn cael eu cyfeirio at y clinig gan Cymorth Trwy’r Llys, elusen cymorth cyfreithiol sy'n gweithredu o'r Ganolfan Cyfiawnder Teulu a Sifil ac sy'n cynnig cefnogaeth emosiynol ac ymarferol i bobl sy'n wynebu'r llys ar eu pennau ei hunain. Fel arfer, bydd cyngor ysgrifenedig yn cael ei roi ymhen pythefnos i'r apwyntiad gyda Chlinig y Gyfraith. Ni all Cymorth Trwy’r Llys na Chlinig y Gyfraith gynrychioli cleientiaid yn y llys.

Bydd clinig y gyfraith yn rhoi cyfleoedd i’n myfyrwyr ymarfer cyfweld, ymchwilio, ysgrifennu cyfreithiol ac ysgrifennu llythyrau cyngor mewn iaith glir a hygyrch. Bydd myfyrwyr hefyd yn dysgu sgiliau allweddol megis sefydlu perthynas, sut i ofyn cwestiynau, gwrando gweithredol a chynnal cofnodion cywir. Mae angen y sgiliau hyn yn rheolaidd gan gyfreithiwr a byddan nhw’n rhoi sylfaen dda i'n myfyrwyr pe baen nhw’n penderfynu dilyn gyrfa ym maes y gyfraith.