Cyllid a ddyfarnwyd ar gyfer rhaglen feistr yng Ngwyddoniaeth Farnwrol Kenya

Bydd athro yn y gyfraith o Brifysgol Caerdydd yn allweddol wrth ddatblygu cwricwlwm Gwyddoniaeth Farnwrol arloesol yn Affrica yn dilyn cyllid a dderbyniwyd gan y Gronfa Partneriaethau Gwyddoniaeth Ryngwladol (ISPF).

Mae'r Gronfa Partneriaethau Gwyddoniaeth Ryngwladol yn rhoi ymchwil ac arloesi wrth wraidd perthnasau rhyngwladol y DU, gan gefnogi ymchwilwyr ac arloeswyr y DU i weithio gyda chyfoedion ledled y byd ar brif themâu ein hoes: y blaned, iechyd, technoleg a thalent.

Bydd yr Athro Ambreena Manji, sy'n Athro Cyfraith Tir yn Ysgol y Gyfraith a Gwleidyddiaeth ac yn Ddeon Rhyngwladol dros Affrica ym Mhrifysgol Caerdydd, yn gweithio mewn partneriaeth ag Ysgol y Gyfraith Kabarak Kenya, Academi Farnwriaeth Kenya a Sefydliad Katiba i greu cwricwlwm newydd mewn Gwyddoniaeth Farnwrol.

Mae Gwyddoniaeth Farnwrol yn canolbwyntio ar astudio a chymhwyso egwyddorion sy'n gysylltiedig â'r system gyfreithiol a barnwriaeth. Gall meysydd astudio gynnwys prosesau barnwrol a sut maen nhw’n gweithio, theori gyfreithiol, cyfraith gyfansoddiadol, annibyniaeth farnwrol, moeseg a hyfforddiant cyfreithiol.

Bydd yr Athro Manji yn gweithio gyda barnwriaeth Kenya a chydag ysgolheigion cyfreithiol i ddatblygu rhaglen feistr sydd â’r nod o hyfforddi gweithwyr cyfreithiol proffesiynol yn y dyfodol a helpu barnwyr presennol i weithredu’r gwerthoedd cyfansoddiadol o heddwch, llywodraethu da, cynhwysiant a rheolaeth y gyfraith. Bydd y prosiect yn creu ac yn profi deunyddiau cwrs newydd a'i nod yw lansio'r cwricwlwm ym mlwyddyn academaidd 2027-2028, gan ddechrau ym mis Ionawr.

Meddai'r Athro Manji, "Mae barnwriaeth Kenya yn cael ei hystyried yn un o'r sefydliadau mwyaf diwygiedig yn y wlad, yn enwedig ers Cyfansoddiad 2010, sy'n rhoi ystod eang o gyfrifoldebau iddi i sicrhau hawliau cymdeithasol ac economaidd i gynnal annibyniaeth farnwrol. Mae barnwriaeth Kenya, gan gynnwys ei Goruchaf Lys newydd, wedi dod yn bwysig mewn astudiaethau cyfansoddiadol byd-eang felly mae cael yr arbenigedd hwn yn natblygiad ein rhaglen feistr yn gyflawniad go iawn."

Mae’r rhaglen feistr yn parhau’r cydweithio â Barnwriaeth Kenya a ymwelodd â Phrifysgol Caerdydd i drafod cyfleoedd ar gyfer hyfforddiant, ymchwil ac addysg ym mis Medi 2023.

Cefnogwyd yr ymchwil hon gan Raglen Ymchwil ar y Cyd y Cyngor Prydeinig, yn rhan o'r Gronfa Partneriaethau Gwyddoniaeth Ryngwladol (ISPF).