Symposiwm yn meithrin cydweithio traws-sector ar faterion caethwasiaeth fodern
8 Awst 2024
![The symposium group lined up together](https://cardiff.imgix.net/__data/assets/image/0005/2834078/Modern-slavery-symposium-2.jpg?w=570&h=321&fit=crop&q=60&auto=format)
Cynhaliodd y Grŵp Ymchwil Caethwasiaeth Fodern a Chynaliadwyedd Cymdeithasol ei ail symposiwm ar gyfer 2024 ym mis Gorffennaf, gyda chyfranogwyr amrywiol o fusnesau, cyrff anllywodraethol, Llywodraeth Cymru, a sefydliadau academaidd.
Cafodd y symposiwm ei agor gan y cyd-gyfarwyddwyr, Dr Maryam Lotfi o Ysgol Busnes Caerdydd a Dr Anna Skeels o sbarc|spark. Fe wnaethon nhw bwysleisio ymrwymiad Prifysgol Caerdydd i ymchwil arloesol a'i chydweithio â phartneriaid anacademaidd. Roedden nhw wedi amlygu gwerth adeiladu cymuned gefnogol gyda rhanddeiliaid fel Byddin yr Iachawdwriaeth, yr Human Trafficking Foundation, a Gofal Cymdeithasol Cymru.
“Mae dod â safbwyntiau amrywiol o’r byd academaidd, busnesau, cyrff anllywodraethol ac asiantaethau’r llywodraeth ynghyd yn caniatáu i ni fynd i’r afael â chaethwasiaeth fodern mewn modd cyfannol, gan sbarduno ymchwil sy’n gwneud gwahaniaeth a meithrin cymuned gefnogol trwy’r Grŵp.”
Rhoddodd panel o arbenigwyr gipolygon beirniadol am gymhlethdodau caethwasiaeth fodern. Y cyntaf i siarad oedd Josh Vuglar, Pennaeth Caethwasiaeth Fodern a Hawliau Gweithwyr Llywodraeth Cymru, a bwysleisiodd yr heriau presennol wrth fynd i’r afael â chaethwasiaeth fodern, gan nodi ei dirywiad yn flaenoriaeth wleidyddol. Siaradodd am effaith bosibl deddfwriaeth newydd Llywodraeth y DU, megis y Ddeddf Ymfudo Anghyfreithlon a’r Ddeddf Cenedligrwydd a Ffiniau. Amlinellodd fentrau Llywodraeth Cymru i fynd i'r afael â'r materion hyn.
Tynnodd Anthony Hanley, Uwch Is-lywydd Cydymffurfiaeth Cadwyn Gyflenwi Alcumus, sylw at y ffaith fod cyfreithiau presennol i helpu busnesau i frwydro yn erbyn caethwasiaeth fodern yn annigonol. Galwodd am newid cyfeiriad a phwysleisiodd yr angen am ôl-effeithiau cryfach i dorri’r gylchred ddifaterwch mewn datganiadau caethwasiaeth fodern.
Bu Paska Moore, Arweinydd Ymchwil Gwrth-fasnachu a Chaethwasiaeth Fodern Byddin yr Iachawdwriaeth, yn trafod y defnydd cynyddol o dechnoleg ar gyfer camfanteisio a graddau cynhwysiant digidol. Rhybuddiodd am y risgiau bod caethwasiaeth fodern yn cael ei chuddio o dan ein trwynau trwy rwydweithiau ar-lein a thynnodd sylw at yr angen i gydweithio er mwyn mynd i’r afael â’r heriau hyn, gyda gwaith gwirio yn chwarae rhan hanfodol.
“Dangosodd y symposiwm ymhellach ba mor unigryw yw ein grŵp ymchwil – er enghraifft, dod ag arbenigwyr ym maes ymchwil cyfranogol a’r rheini sydd wedi goroesi caethwasiaeth fodern ynghyd â’r rheini sy’n mynd i’r afael â rheoli risg caethwasiaeth fodern mewn cadwyni cyflenwi – a’n hymdrechion i greu diwylliant ymchwil cadarnhaol, rhagweithiol, cynhwysol, a chydweithredol wrth ymdrin â chaethwasiaeth fodern a chynaliadwyedd cymdeithasol.” Dr Anna Skeels, Cymrawd Ymchwil, sbarc|spark
Roedd sesiynau'r prynhawn yn cynnwys trafodaethau grŵp ar gyfeiriadau'r grŵp ymchwil yn y dyfodol. Rhoddodd y rhai a oedd yn bresennol adborth cadarnhaol, gan werthfawrogi rôl y symposiwm wrth hwyluso sgyrsiau ar draws sectorau amrywiol a chynhyrchu syniadau newydd ar gyfer brwydro yn erbyn caethwasiaeth fodern.
![The panel of experts speaking to each other and a room of people](https://cardiff.imgix.net/__data/assets/image/0003/2834085/Modern-slavery-symposium.jpg?w=575&ar=16:9)