Hanfodion Synthesis Tystiolaeth

Mae Canolfan Cymru ar gyfer Gofal sy'n Seiliedig ar Dystiolaeth (WCEBC) wedi darparu dau ddiwrnod o hyfforddiant arbenigol i glinigwyr ac academyddion o Urdd Nyrsys, Bydwragedd a Chynorthwywyr Meddygol, Cangen Bucharest (OAMGMAMR), Rwmania, fel rhan o gytundeb mentora ffurfiol rhwng WCEBC a Chanolfan Ymchwil Nyrsio Rwmania.

Gofynnodd Canolfan Rwmania i WCEBC gyflwyno'r hyfforddiant hwn wyneb yn wyneb.

Y rhaglen

Mae gan WCEBC dros 10 mlynedd o brofiad o ddarparu hyfforddiant adolygu systematig cynhwysfawr JBI a gweithdai adolygu cwmpasu a gydnabyddir yn rhyngwladol. Yn ogystal, mae tîm WCEBC wedi datblygu cyrsiau hyfforddi ar-lein ac wyneb yn wyneb llwyddiannus ar gyfer myfyrwyr ôl-raddedig, academyddion a chlinigwyr

Roedd hanfodion synthesis tystiolaeth yn cynnwys datblygu cwestiynau, strategaethau chwilio, chwilio'r llenyddiaeth, rheoli cyfeiriadau, ac offer adolygu systematig.

Nod y cwrs oedd

• dysgu cyfranogwyr sut i ddatblygu cwestiwn ymchwil ar gyfer adolygiad systematig
• galluogi cyfranogwyr i lunio strategaethau chwilio ar draws ystod o gronfeydd data
• arwain cyfranogwyr i gynnal chwiliadau llenyddiaeth trylwyr a systematig ar draws sawl platfform
• galluogi cyfranogwyr i ddefnyddio meddalwedd rheoli cyfeiriadau ar gyfer trefnu, dyfynnu a rheoli cyfeiriadau drwy gydol y broses adolygu
• rhoi cyfle i gyfranogwyr ddod yn gyfarwydd â meddalwedd adolygu systematig ar gyfer sgrinio dyfyniadau

Cyflwynwyd y cwrs gan Dr Deborah Edwards a Liz Gillen o WCEBC. Cyflwynwyd yr addysgu trwy gymysgedd o gyflwyniadau, trafodaethau grŵp a sesiynau ymarferol gyda chymorth cyfieithu ar y pryd gan ddefnyddio cyfieithwyr ar y pryd lleol.

Gwerthuso

Rydym wedi derbyn yr adborth canlynol gan gynrychiolwyr

Diolch o waelod fy nghalon am y cwrs a gynhaliwyd gennych. Roedd yn brofiad dysgu hynod werthfawr, a gwnaethoch chi roi set gadarn o wybodaeth i mi. Roedd y ffordd y gwnaethoch gyflwyno’r deunydd a’r dystiolaeth a gyflwynwyd gennych o’r safon uchaf, gan gyfrannu’n sylweddol at fy nealltwriaeth o’r pwnc. Roedd y dogfennau a'r adnoddau a ddarparwyd gennych yn hynod ddefnyddiol ac wedi'u strwythuro'n dda, gan hwyluso'r broses ddysgu. Gwerthfawrogais yn arbennig eich amynedd a'ch ymroddiad wrth ateb pob cwestiwn ac egluro unrhyw ansicrwydd. Rwy’n ddiolchgar am yr holl ymdrech a wnaethoch ac am y cyfraniad sylweddol a wnaethoch i’m datblygiad proffesiynol a phersonol. Gyda pharch a diolch, Corina Gagiu - Cyfarwyddwr Nyrsio yn ”Ysbyty Seiciatreg Prof. Dr. Alexandru Obregia"

Roedd y cwrs a hwyluswyd gan Deborah a Liz nid yn unig yn addysgiadol ond hefyd yn hynod ysbrydoledig. Mae'r sgiliau a'r syniadau a gafwyd yma wedi agor cyfleoedd newydd i mi. Gwerthfawrogais y ffordd yr oeddent yn cyfuno theori ag enghreifftiau ymarferol perthnasol. Gadewais gyda dealltwriaeth ddofn a chymwys o'r pwnc. Rwy’n ddiolchgar am eu hymroddiad a’u proffesiynoldeb. Rwy'n argymell y cwrs hwn yn fawr i unrhyw un sydd am wella eu sgiliau wrth ddatblygu adolygiadau systematig! Mariana Zazu, Ymchwilydd Gwyddonol - Canolfan Rwmania ar gyfer Ymchwil Nyrsio - Cangen Bucharest OAMGMAMR

Cefais y fraint o fynychu’r cwrs hwn, a gallaf ddweud yn hyderus ei fod yn brofiad hynod werthfawr ac yn agoriad llygad. Llwyddodd y cwrs hwn i gyfuno theori ag ymarfer mewn ffordd eithriadol. Roedd deunyddiau'r cwrs wedi'u strwythuro'n dda, yn gyfredol, ac yn berthnasol, gan hwyluso dysgu systematig ac effeithlon a dyfnhau gwybodaeth. Agwedd a werthfawrogwyd yn arbennig oedd ansawdd ac arbenigedd yr hyfforddwyr. Roeddent yn dangos gwybodaeth ddofn am y maes ac roeddent bob amser ar gael i ateb cwestiynau a rhoi esboniadau ychwanegol. Trwy drafodaethau rhyngweithiol ac enghreifftiau wedi’u llunio’n dda, cefais y cyfle i gymhwyso’r cysyniadau a addysgwyd yn ymarferol a datblygu fy sgiliau wrth chwilio cronfeydd data amrywiol. Diolch, Deborah a Liz! Daniela

Cysylltu â ni

Os hoffech drafod sut gallem weithio gyda'ch sefydliad i greu rhaglen ddatblygu broffesiynol bwrpasol neu sydd wedi'i theilwra, cysylltwch â'n tîm cyfeillgar yn: