Feed, Food & Future yn ffit naturiol i Medicentre Caerdydd

Medicentre Caerdydd wedi croesau’r arloeswyr ym meysydd bwyd-amaeth a’r gwyddorau bywyd Feed, Food & Future i’w chymuned sy’n tyfu o arbenigwyr

Mae Feed, Food & Future, a gafodd ei sefydlu yn 2017 gan y gwyddonydd a’r arbenigwr mewn materion rheoleiddio Dr Naheeda Portocarero, yn mynd i’r afael â heriau cymdeithasol mawr, sy’n cynnwys mynd i’r afael ag ymwrthedd i wrthfiotigau, lleihau effaith ffermio ar yr amgylchedd, gwella diogelwch bwyd a dylanwadu ar iechyd defnyddwyr drwy’r gadwyn fwyd-amaeth. Mae’n weithgar yn y sector bwyd anifeiliaid ac yn gweithio gyda nifer o gorfforaethau byd-eang mawr. Mae hefyd yn neilltuo adnoddau i gwmnïau llai sydd â syniadau uchelgeisiol.

Mae’r cwmni wedi cymryd unedau meithrin celloedd a microbioleg ar wahân ym Medicentre Caerdydd, yn ogystal â buddsoddi mewn offer o’r radd flaenaf a sicrhau gallu Bioddiogelwch Lefel 2 i hwyluso ei ymchwil a’i waith datblygu, sy’n cynnwys datblygu atebion gwrthfeirol a mireinio ei waith ar atebion gwrthfacterol.

Mae’r enw Feed, Food & Future yn cyfeirio at dri maes gwaith y cwmni: gwasanaethau bwyd anifeiliaid – mae’n cynnig arbenigedd technegol a gwasanaethau ymgynghori ar faterion rheoleiddio a marchnata, gan sicrhau bod syniadau’n cael eu datblygu a’u lansio; gwasanaethau bwyd – mae’n cynnig gwasanaeth ymgynghori sy’n ychwanegu gwerth at fusnesau, yn sicrhau eu bod yn gweithredu ag uniondeb ac yn sicrhau bod modd ymddiried ynddyn nhw, a hynny drwy hyrwyddo maeth a bwyd diogel; a’r dyfodol – mae’n datblygu arloesedd gwreiddiol sy'n seiliedig ar y farchnad a gwyddoniaeth, ar y cyd weithiau â thrydydd partïon.

Dechreuodd y fenter ar ffurf prosiect PhD ym Mhrifysgol De Cymru, ac mae wedi tyfu’n grŵp ymchwil arbenigol sy’n canolbwyntio ar nodweddion gwrthfacterol a gwrthfeirol cynhwysion actif, gan gynnwys moleciwlau naturiol a modiwlau seiliedig ar blanhigion. Mae cynlluniau hefyd i ehangu’r tîm ymhellach, drwy gyfrwng rhaglen PhD newydd sy’n cael ei thrafod.

Dywedodd Dr Portocarero: “Rydyn ni eisoes wedi ennill ein plwyf yn arweinwyr yn y diwydiant. Mae gennym ni bortffolio cryf, ac rydyn ni hefyd yn ystyried heriau mawr eraill, yn enwedig effeithiau ffermio a diogelu bwyd ar yr amgylchedd. Bydd hyn yn golygu ehangu mewn ffordd strwythuredig a recriwtio’r gwyddonwyr gorau.”

Dywedodd Rhys Pearce-Palmer , Rheolwr Gweithrediadau Arloesedd Prifysgol Caerdydd: “Pleser yw croesawu Feed, Food & Future i Medicentre Caerdydd er mwyn symud y gwaith hollbwysig ar ddatblygu atebion gwrthfeirol yn ei flaen. Bydd ein tîm yn helpu’r cwmni i gysylltu â chymuned y gwyddorau bywyd a gofal iechyd yma ym Medicentre Caerdydd ac ym mhob rhan o’r Brifysgol a’r Bwrdd Iechyd.”