“Roedd cael diddordeb personol yn fy ymchwil wedi gwneud i mi eisiau llwyddo mwy fyth”
16 Gorffennaf 2024
Mae Felix Shi yn gobeithio y bydd ei waith i ddeall profiadau pobl anabl yn rhoi llais i'r rhai sydd â llai o gynrychiolaeth yn y byd academaidd.
Mae’r gŵr 30 oed, sydd â nam ar y golwg, yn graddio â PhD o Ysgol Busnes Caerdydd ac eisoes wedi dechrau swydd academaidd ym Mhrifysgol Bangor, yn ddarlithydd mewn rheolaeth.
Cynhaliodd Felix, sy’n hanu o Tsieina, waith maes yn ei famwlad ar gyfer ei draethawd ymchwil, The Transition to a State Led Market Economy in China: the Impact of Social Change and the Commodification on Disabled People.
Mae profiad bywyd yn bwysig iawn i academydd i gael rheswm personol dros barhau i ymrwymo â’r gwaith. Nid yn unig y mae wedi rhoi pwrpas ymchwil clir i mi, ond mae hefyd wedi fy ngalluogi i fynd i'r afael â phwnc sy'n aml yn cael ei anwybyddu.
“Mae marchnad lafur Tsieina wedi cael ei drawsnewid mewn ffordd enfawr,” meddai. “Ond doedd hi ddim yn glir sut roedd y newidiadau hynny wedi effeithio ar weithwyr anabl. Es i ati i gyfweld â 48 o bobl yn rhan o fy ngwaith, gan siarad â phobl ag ystod amrywiol o namau.
“Roedd llawer o’r bobl y siaradais i â nhw yn byw mewn ardaloedd gwledig anghysbell iawn. Roedd yn werth chweil clywed eu straeon. Cyn gwneud yr ymchwil hwn doeddwn i ddim wedi sylweddoli effaith cefndir economaidd-gymdeithasol person ar eu profiad bywyd yn berson anabl.
“Wrth dyfu i fyny, roeddwn i’n byw mewn dinas gymharol gyfoethog ar Arfordir Dwyrain Tsieina. Roedd llawer o seilwaith yno i'm cefnogi ac roedd gen i hawl i grantiau i'm helpu gyda fy astudiaethau. Doedd llawer o'r bobl roeddwn i wedi cyfweld â nhw ddim yn ymwybodol o'r cymorth hwn na sut i fanteisio arno.
“Ar y cyfan, roedd yn brofiad gwerth chweil dros ben. Rwyf wedi dysgu ohono, ond rwy hefyd wedi cael y cyfle i gyfrannu fy nealltwriaeth ddamcaniaethol at lenyddiaeth academaidd.”
Mae Felix yn cynnal ymchwil pellach ym maes anabledd a chyflogaeth. Mae wedi bod yn weithgar iawn yn ymgyrchu dros faterion anabledd yng Nghymru ac mae'n aelod o fwrdd Anabledd Cymru.
Mae cael PhD yn fy rhoi mewn gwell sefyllfa i siarad ar ran eraill. Mae'n rhoi cyfle i mi wneud newid cadarnhaol. Dyna’r fraint o fod yn academydd y bydda i’n ei drysori’n fawr wrth edrych tua’r dyfodol.
