Dr Maryam Lotfi yn cael ei dewis ar gyfer rhaglen fawreddog Crwsibl Cymru

Mae Dr Maryam Lotfi, Uwch Ddarlithydd mewn Rheoli’r Gadwyn Gyflenwi Gynaliadwy yn Ysgol Busnes Caerdydd, wedi ennill lle nodedig yng Nghrwsibl Cymru 2024, sef rhaglen ddatblygu ar gyfer arweinwyr ymchwil y dyfodol.

Rhaglen uchel ei pharch yw Crwsibl Cymru i arweinwyr ymchwil y dyfodol yng Nghymru ddatblygu’n bersonol ac yn broffesiynol a meithrin eu sgiliau arwain. Bellach yn dathlu ei degfed flwyddyn, mae’r rhaglen yn hyrwyddo arloesi a ysgogwyd gan ymchwil a chydweithio traws-ddisgyblaethol.

Bob blwyddyn, mae 30 o ymchwilwyr rhagorol o bob rhan o Gymru yn cael eu dewis i gymryd rhan mewn cyfres o weithdai preswyl trochi - neu - labordai sgiliau. Mae’r sesiynau hyn yn gyfle unigryw i ymchwilwyr gydweithio ar draws disgyblaethau, gwella effaith eu gwaith a meithrin gyrfaoedd ymchwil rhyngwladol.

Cynhelir y labordai eleni yng Nghaerdydd, Gogledd Cymru ac Abertawe. Bydd y labordy cyntaf yng Nghaerdydd yn cynnwys sesiwn ysbrydoledig gyda’r Athro Wendy Larner, Is-ganghellor Prifysgol Caerdydd, ymhlith y siaradwyr, a Derek Walker, Comisiynydd Cenedlaethau’r Dyfodol dros Gymru, ymhlith y gwesteion.

Maes ymchwil Dr Lotfi yw cadwyni cyflenwi cynaliadwy, gyda ffocws ar faterion cymdeithasol gan gynnwys caethwasiaeth plant, caethwasiaeth fodern, hawliau gweithwyr, materion yn ymwneud â rhywedd a gwaith gweddus. Hi hefyd yw cyd-sylfaenydd a chyd-gyfarwyddwr y Grŵp Ymchwil Caethwasiaeth Fodern a Chynaliadwyedd Cymdeithasol.

Mae Crwsibl Cymru yn fenter gydweithredol a ariennir gan gonsortiwm o sefydliadau addysg uwch yng Nghymru a Chyngor Cyllido Addysg Uwch Cymru.