Chwalu rhwystrau amgylcheddol drwy waith celf
8 Mai 2024
Bu i’r gymuned noddfa leol, sy’n cynnwys ceiswyr lloches a ffoaduriaid, gydweithio ag academyddion yn ein hysgol ac artistiaid lleol i godi ymwybyddiaeth o’r materion amgylcheddol mwyaf dybryd sy’n ein wynebu.
Ffocws prosiect 'Elevate' oedd y cynnydd yn nifer yr achosion o drawiadau lluched, sy’n cael eu hachosi gan gynhesu byd-eang, a'r effaith y maen nhw’n ei chael ar y blaned, sy’n cynnwys y mellt atmosfferig a ddarganfuwyd yn ddiweddar.
Dan arweiniad Dr Phillip Lugg-Widger, nod Elevate oedd sbarduno sgyrsiau traws-ddiwylliannol ynghylch yr heriau amgylcheddol sy’n ein hwynebu, a hyn oll tra'n annog cynwysoldeb a dealltwriaeth ddiwylliannol. Drwy weithdai a gynhaliwyd yn ein hysgol, daeth ymchwilwyr, darlithwyr, artistiaid a'r gymuned ynghyd i gydweithio ar greu gwaith celf ar y cyd.
Rhoddwyd cyhoeddusrwydd i’r prosiect hwn yn ystod ein digwyddiad Amgueddfa Gyda’r Hwyr ar 14 Chwefror, 2024, lle cafodd y gwaith celf a’r fideo ar y thema mellt eu harddangos i'r cyhoedd mewn profiad rhyngweithiol a difyr. Bellach, mae'r gwaith celf hwn wedi’i osod yn barhaol yn Adeilad y Frenhines Prifysgol Caerdydd, ac adeilad Oasis yng Nghaerdydd, er mwyn ceisio codi ymwybyddiaeth amgylcheddol yn ei gylch yn barhaus.
Meddai Phillip Lugg-Widger, Darlithydd ac arweinydd y prosiect Elevate: "Mae nifer yr achosion o ffurfio lleched naturiol yn cynyddu o ganlyniad i gynhesu byd-eang, ac mae angen inni ddeall yr effaith y mae’n ei chael ar ein byd, gan gynnwys y mellt atmosfferig sydd newydd wedi’i ddarganfod. Roedd y prosiect hwn yn gyfle i ysgogi trafodaethau traws-ddiwylliannol ar faterion amgylcheddol, yn ogystal â rhoi gwell dealltwriaeth inni o’r rhwystrau sy’n atal cynhwysiant a phrofiadau diwylliannol ehangach, sydd oll yn eu tro, yn atgyfnerthu ein hymchwil at y dyfodol.
Drwy ymgysylltu â'r cyhoedd mewn digwyddiadau megis Amgueddfa Gyda’r Hwyr, y bwriad oedd anelu at hysbysu a chodi ymwybyddiaeth o'r amgylchedd a Chydraddoldeb, amrywiaeth a chynhwysiant (EDI) fel ei gilydd, gan dynnu sylw at feysydd ar gyfer newid.
"Bydd y gwaith celf hwn yn cael ei ddefnyddio yn rhan o'n rhaglen allgymorth ehangach, ac edrychwn ymlaen yn eiddgar at weithio gydag Oasis Caerdydd a'r gymuned ehangach ar brosiectau eraill yn y dyfodol."
Ymhlith yr unigolion nodedig a gymerodd ran yn y prosiect roedd Debbie Syrop (Swyddog Ymgysylltu â'r Cyhoedd), Daniel Mitchard (Darlithydd), Chantal Williams (Cynhyrchydd), Gareth Leaman (Fideograffydd), Naz Syed (celf fosaig a chreadigol), ac Andy O'Rourke (ffotograffiaeth lwybrau golau).
Ariannwyd y prosiect Elevate gan Gyngor Ymchwil yr Amgylchedd Naturiol (NERC), a hynny’n rhan o'r cynllun peilot Growing Roots. Rydyn ni’n hynod ddiolchgar i Oasis Caerdydd am ei gefnogaeth ac am drefnu cyfranogwyr yn y gymuned i gymryd rhan, a hefyd i Amgueddfa Genedlaethol Caerdydd am gynnal yr arddangosfa.