Myfyrwyr Caerdydd yn cael llwyddiant yng Ngholocwiwm BCSWomen Lovelace

Mae Colocwiwm Lovelace yn gynhadledd genedlaethol ar gyfer menywod israddedig ac MSc a myfyrwyr anneuaidd mewn cyfrifiadura.

Cafodd Geneve Purayil a Lakshmi Sikha o’r Ysgol Cyfrifiadureg a Gwybodeg eu dewis ar gyfer y rownd derfynol yn eu grwpiau blwyddyn ddetholus ar gyfer y digwyddiad a gynhaliwyd ym Mhrifysgol Lerpwl ar 4 Ebrill.

Aeth Geneve, myfyrwraig BSc Cyfrifiadureg ymlaen i ennill y wobr gyntaf yng nghategori'r Ail Flwyddyn am ei phoster, 'AI-lluminating Drug Discovery: Shedding Light on AI's Impact in Pharma.’

Archwiliodd poster Geneve y posibiliadau o ddefnyddio Deallusrwydd Artiffisial wrth ddarganfod cyffuriau a goblygiadau datblygiadau mewn Deallusrwydd Artiffisial ar y diwydiant fferyllol/microbioleg yn y dyfodol agos.

Dywedodd Geneve: "Roedd ennill y wobr gyntaf wedi rhoi gymaint o hyder i fi i ymchwilio ac egluro pynciau cyfrifiadura cymhleth mewn modd creadigol, ond hefyd y dilysiad mae pobl yn cael yn y maes rwy'n angerddol amdano, gan ddefnyddio data a chyfrifiadureg.

"Fodd bynnag, yr hyn a gafodd yr effaith fwyaf arna i oedd siarad â chystadleuwyr eraill am eu gwaith, yn enwedig myfyrwyr trydedd flwyddyn a myfyrwyr meistr a gweld yr hyn roedden nhw’n gallu ei gyflawni yn eu traethodau hir ac fe wnaeth hyn i mi edrych ymlaen at ddechrau fy ngwaith fy hun y flwyddyn nesaf."

Cyflwynodd Lakshmi, myfyriwr BSc Cyfrifiadureg yn ei blwyddyn gyntaf, boster o'r enw ‘Self Aware AI: Pro or Con', a oedd yn archwilio'r syniad o sefydlu fframweithiau rheoleiddio er mwyn lliniaru risgiau a berir gan ddatblygiadau mewn Deallusrwydd Artiffisial.

Dywedodd Lakshmi: "Roedd y profiad ges i yn y Colocwiwm yn anhygoel. Mae bod yn fyfyriwr Cyfrifiadureg blwyddyn gyntaf a bod yn rhan o ddigwyddiad a ddaeth â mwy na 100 o ymgeiswyr talentog ynghyd o wahanol brifysgolion ledled y DU yn foment arbennig i mi gan fy mod yn gorfod dysgu llawer am gyfleoedd technoleg a’i datblygiad, dyfodol roboteg a galluoedd menywod mewn technoleg.

"Hoffwn i longyfarch Geneve ar ennill y wobr gyntaf yn y categori Ail Flwyddyn. Roedd gweld cydweithiwr yn dod yn fuddugol a chynrychioli ein prifysgol yn foment i fod yn falch ohoni.

"Fe wnaeth y cyfle hwn fy nysgu i ehangu fy ngorwelion a'm helpu i ddarganfod fy niddordebau ynglŷn â thechnoleg. Rwy'n gobeithio bod ein profiadau yn ysgogi'r myfyrwyr eraill ac rydyn ni’n medru cynrychioli Prifysgol Caerdydd gyda grŵp llawer mwy y flwyddyn nesaf yn Glasgow."

Dechreuodd Colocwiwm BCSWomen Lovelace yn 2008 gyda'r nod o gefnogi ac annog menywod a myfyrwyr anneuaidd mewn cyfrifiadura a phynciau cysylltiedig. Nod y gynhadledd flynyddol yw darparu fforwm lle gall y myfyrwyr rannu eu syniadau a rhwydweithio, yn ogystal â chynnal sgyrsiau gan fenywod a phobl anneuaidd mewn cyfrifiadura, yn y byd academaidd a diwydiant.

Bydd y Colocwiwm BCSWomen Lovelace nesaf yn cael ei gynnal ar 16 Ebrill 2025 yn Glasgow a bydd cyflwyno crynodebau yn agor yn ddiweddarach eleni.