Ehangodd Prifysgol Caerdydd faes sgiliau digidol ac arloesi yn 2023 drwy gynnal digwyddiadau allgymorth llwyddiannus

Mae'r Sefydliad Arloesi er Trawsnewid Digidol ym Mhrifysgol Caerdydd wedi cynnal cyfres o ddigwyddiadau allgymorth yn llwyddiannus, gan ganolbwyntio ar feithrin sgiliau digidol, hyrwyddo prosiectau arloesi ac entrepreneuriaeth, a chodi ymwybyddiaeth am yrfaoedd ym meysydd gwyddor data, dadansoddeg a seiberddiogelwch sy'n prysur ehangu.

Mae'r sefydliad, a lansiwyd yn swyddogol yn 2023, wedi bod ar flaen y gad o ran y digwyddiadau hyn sy’n mynd i'r afael â’r bwlch yn y sgiliau digidol y tynnodd partneriaid byd diwydiant sylw atyn nhw. Eu ffocws oedd cefnogi talent carfanau o bobl ifanc drwy ymgysylltu â nhw a'u hysbrydoli drwy roi gwybod iddyn nhw am yrfaoedd digidol. Y gobaith wedyn fyddai cynyddu nifer y bobl ifanc sy’n troi eu sylw at entrepreneuriaeth ddigidol.

Dyma a ddywedodd Dr Yulia Cherdantseva, Cyd-gyfarwyddwr y Sefydliad Arloesi er Trawsnewid Digidol a Chyfarwyddwr Canolfan Rhagoriaeth Academaidd er Addysg Seiberddiogelwch y Brifysgol: "Ar draws yr holl ddigwyddiadau ymgysylltu â phob sector diwydiannol a gynhaliwyd gan y Sefydliad Arloesi er Trawsnewid Digidol yn ystod ei flwyddyn gyntaf, daeth un her gyffredin i’r amlwg. Boed y sector trafnidiaeth, gofal iechyd, neu logisteg, mae'r diffyg sgiliau digidol, mae'r angen am ragor o weithwyr proffesiynol â chymwysterau gwell yn amlwg."

Grymuso Entrepreneuriaid Digidol:

Bu’r sefydliad yn cydweithio â'r Ysgol Cyfrifiadureg a Gwybodeg i drefnu digwyddiad allgymorth ar entrepreneuriaeth ddigidol yn Abacws. Dan arweiniad y myfyrwyr PhD Iryna Bernyk a Sanyam Vyas, cymerodd myfyrwyr Blwyddyn 8 o Ysgol Westbourne ran yn y digwyddiad. Cafodd y myfyrwyr eu cyflwyno i wahanol gyfleoedd gyrfaol ym maes technoleg, gan bwysleisio bod trawsnewid digidol yn ymestyn y tu hwnt i godio a thechnoleg, ac estynnwyd croeso i’r rheini sydd â diddordeb mewn entrepreneuriaeth ac astudiaethau busnes chwarae rhan ganolog ym maes arloesi digidol yn y dyfodol.

Dyma a ddywedodd Mr Vyas: "Gwnaeth ymroddiad diwyro'r myfyrwyr i ehangu gorwelion eu gwybodaeth argraff fawr arna i, wrth iddyn nhw fwrw syniadau am syniadau busnes newydd sy'n gysylltiedig â maes technoleg a diogelwch sy'n prysur ddatblygu, sef meysydd sy'n cael eu trafod a'u rhoi ar waith yn gyffredin yn y prifysgolion hynny sy'n canolbwyntio ar ymchwil. Rwy'n annog yr ysgolion a’r colegau i gymryd rhan mewn gweithdai a gweithgareddau a drefnir gan brifysgolion sy'n canolbwyntio ar ymchwil, gan y bydd ymgysylltu felly yn codi ymwybyddiaeth ac yn meithrin chwilfrydedd ymhlith eu myfyrwyr i ddewis llwybrau gyrfaol yn y dyfodol."

Anturwyr Cyber First:

Mewn partneriaeth â Chanolfan Rhagoriaeth Academaidd er Addysg Seiberddiogelwch y Brifysgol, cynhaliodd y sefydliad a thîm rhanbarthol CyberFirst, dan arweiniad Holly Lidbury, "Anturwyr Cyber First" yn Abacws. Diben y digwyddiad, a anelwyd at fyfyrwyr Blwyddyn 7 ac 8, yn enwedig merched, oedd trefnu gweithgareddau fel cracio codau a dylunio 3D, gan feithrin felly ddiddordeb a sgiliau ym maes seiberddiogelwch.

Diwrnod Ymwybyddiaeth Gyrfaoedd ym maes Seiberddiogelwch:

Ochr yn ochr â'r Canolfannau Rhagoriaeth Academaidd er Addysg Seiberddiogelwch, trefnodd y Sefydliad Ddiwrnod Ymwybyddiaeth Gyrfaoedd Seiberddiogelwch yn sbarc/spark. Yn y digwyddiad roedd siaradwyr gwadd o sefydliadau blaenllaw megis y Cydbwyllgor Systemau Gwybodaeth, Y Ganolfan Arloesi Seiber, a'r Ysgol Cyfrifiadureg a Gwybodeg. Gan dargedu myfyrwyr Safon Uwch a myfyrwyr Colegau AB, canolbwyntiodd y diwrnod ar gyfleu cymhlethdod ac aml-ddisgyblaethedd seiberddiogelwch, gan gwmpasu pynciau megis seicoleg seiber, seiberddiogelwch sy'n canolbwyntio ar bobl, a llywodraethu, rheoli ac asesu risgiau. Cafodd y sawl a gymerodd ran y cyfle i gerdded o amgylch sbarc/spark a RemakerSpace, gan bwysleisio'r economi gylchol ac ailddefnyddio deunyddiau.

Yn y Ganolfan Arloesi Seibr, y mae ei phencadlys yn sbarc/spark cafwyd trosolwg rhagorol o’r ystod eang o gyfleoedd gyrfaol sydd ar gael ym maes seiberddiogelwch, ac amlinellwyd y sgiliau allweddol y mae byd diwydiant yn chwilio amdanyn nhw.  Mae'r Ganolfan yn cynnig sesiynau hyfforddi ar ffurf bŵtcamp seiberddiogelwch yng Nghymru i greu carfan barhaus ac amrywiol o weithwyr diogelwch proffesiynol yn y wlad. Tynnodd y digwyddiad sylw’r bobl ifanc a oedd yn cymryd rhan at y cyfleoedd cyffrous a’r gefnogaeth y mae'r Ganolfan yn eu rhoi i bobl ifanc yng Nghymru ym maes entrepreneuriaeth seiber o ran ei chenhadaeth i greu cynnyrch seiberddiogelwch a busnesau newydd sydd o safon fyd-eang ac yn hynod lwyddiannus.

Deall Cryptoarian:

Estynnodd y sefydliad wahoddiad agored i'r holl fyfyrwyr a’r ysgolion lleol gymryd rhan mewn digwyddiad cryptoarian a gynhaliwyd gan Gabriela Filipkowska, myfyrwraig PhD yn yr Ysgol Mathemateg dan oruchwyliaeth Dr Anqi Lin a'r Athro Maggie Chen. Amlygodd y digwyddiad lawer o'r dadleuon ynghylch defnyddio mathau o gryptoarian gan gynnwys y rheini sy'n ymwneud ag enillion ariannol cyflym, technoleg arloesol, marchnadoedd hynod gyfnewidiol a’r potensial ar gyfer twyll. Mae'n cynnwys gemau, cyflwyniadau ar bynciau megis technoleg blockchain a chloddio bitcoin, a chyfleoedd ar gyfer profiad ymarferol drwy chwarae gêm a ddatblygwyd gan Ms Filipkowska.

Dyma a ddywedodd Ms Filipkowska: "Er bod cwmnïau wedi dechrau cofleidio'r dechnoleg newydd hon, mae llawer o bobl yn anghyfarwydd â hi a'i hystyr. Dyma bwnc cymhleth, ac felly aethon ni ati i ddylunio cyflwyniadau, gemau digidol a bwrdd yn ofalus, fel bod y myfyrwyr a oedd yn cymryd rhan yn gallu ymgolli’n frwd ym myd crypto a'i dechnoleg yn ogystal ag ennill gwobrau crypto cyffrous. Rwy'n hapus i weld ein bod wedi cyflawni ein nod, sef lledaenu ymwybyddiaeth o'r dechnoleg newydd hon, yn ogystal â'r manteision a'r bygythiadau yn y maes hwn."

Cymerwch ran

Drwy gydol y digwyddiadau hyn, pwysleisiodd y Sefydliad Arloesi er Trawsnewid Digidol yr angen dybryd am sgiliau digidol, arloesi ac entrepreneuriaeth. Mae'r sefydliad yn annog ysgolion lleol i fynegi eu diddordeb mewn cymryd rhan mewn digwyddiadau yn y dyfodol, gan feithrin deialog barhaus gyda'r sefydliad i fynd i'r afael â thrawsnewidiadau digidol sy’n prysur ddatblygu.

Cysylltwch â Dr Yulia Cherdantseva gan ebostio CherdantsevaYV@caerdydd.ac.uk i wybod rhagor.