Gwobr T. S. Eliot 2023

Bardd a darlithydd ym maes Ysgrifennu Creadigol ar y rhestr fer ar gyfer y wobr fawreddog

Mae Abigail Parry sy’n ddarlithydd ym maes Ysgrifennu Creadigol yn Yr Ysgol Saesneg, Cyfathrebu ac Athroniaeth wedi cael ei henwi ar restr fer gwobr T.S^. Eliot 2023, gwobr sydd yn 30 oed eleni, a hynny am ei hail gasgliad I Think We're Alone Now.

Cyrhaeddodd casgliad cyntaf Abigail Parry, Jinx (Bloodaxe Books, 2018), restr fer y Forward Prize ar gyfer y Casgliad Cyntaf Gorau a Gwobr Seamus Heaney ar gyfer y Casgliad Cyntaf Gorau, ac roedd yn un o Lyfrau’r Flwyddyn yn y New Statesman, The Telegraph a’r Morning Star. Mae hi wedi ennill nifer o wobrau a chydnabyddiaethau am ei gwaith, gan gynnwys Gwobr Ballymaloe a Gwobr Eric Gregory.

Dewiswyd y rhestr gan y beirniaid Paul Muldoon, Sasha Dugdale a Denise Saul o blith 186 casgliad o farddoniaeth a gyflwynwyd gan gyhoeddwyr Prydain ac Iwerddon, ac ymhlith y casgliadau ar y rhestr mae dau gasgliad cyntaf, dau ail gasgliad, cyn-enillydd a dau fardd sydd wedi cyrraedd y rhestr fer yn flaenorol.

Wedi’i threfnu gan Sefydliad T.S. Eliot, Gwobr T.S Eliot yw'r wobr fwyaf ei maint ym maes barddoniaeth Brydeinig, gyda gwobr o £25,000, a £1,500 i feirdd ar y rhestr fer. Mae'r panel beirniadu yn chwilio am y casgliad o farddoniaeth newydd gorau yn y Saesneg sydd wedi’i chyhoeddi yn y DU neu Iwerddon. Dyma'r unig brif wobr barddoniaeth sydd yn cael ei beirniadu gan feirdd sefydledig yn unig.

Dywedodd Cadeirydd y beirniaid Paul Muldoon:

“Rydym yn hyderus bod pob un o'r deg teitl ar y rhestr fer nid yn unig yn bodloni'r safonau uchel y maent yn eu gosod ar eu cyfer eu hunain ond yn trin a thrafod y moment dan sylw ac yn ymateb iddo, yn y modd mwyaf effeithiol. Os oes un gair sy’n gysylltiedig â’r moment hwn 'rhwygiadau' yw hwnnw, ac mae pob un o’r beirdd hyn yn adlewyrchu'r rhwygo hwn yn ddi-os. Mae delweddau o alar, ymfudo, a gwrthdaro wedi’u gwau drwy’r gweithiau hyn, ond maent serch hynny yn gasgliadau llawn egni a llawenydd hefyd. Bydd enwau rhai beirdd yn gyfarwydd, eraill yn llai felly; bydd pob un yn mynnu lle yn eich meddwl a'ch calon.”

Rhestr Fer Gwobr T. S. Eliot 2023

Mae’r deg bardd sydd ar y rhestr fer yn hanu o'r DU, Iwerddon, Jamaica, Hong Kong ac UDA:

Jason Allen-Paisant, Self-Portrait as Othello (Carcanet Press)

Joe Carrick-Varty, More Sky (Carcanet Press)

Jane Clarke, A Change in the Air (Bloodaxe Books)

Kit Fan, The Ink Cloud Reader (Carcanet Press)

Katie Farris, Standing in the Forest of Being Alive (Pavilion Poetry / Liverpool University Press)

Ishion Hutchinson, School of Instructions (Faber & Faber)

Fran Lock, Hyena! (Poetry Bus Press)

Eiléan Ní Chuilleanáin, The Map of the World (Gallery Press)

Sharon Olds, Balladz (Cape Poetry)

Abigail Parry, I Think We’re Alone Now (Bloodaxe Books)

Cyhoeddir enw enillydd Gwobr T.S. Eliot 2023 yn Neuadd Ŵyl Frenhinol Canolfan Southbank ar 15 Ionawr 2024, yn dilyn Darlleniadau oddi ar y Rhestr Fer ar 14 Ionawr.

Mae I Think We're Alone Now gan Abigail Parry wedi’i gyhoeddi gan Bloodaxe Books.