Prif Weinidog Cymru a busnesau Cymru yn dod at ei gilydd i archwilio llwybrau cyflogaeth ffoaduriaid arloesol

Mynychodd Prif Weinidog Cymru Mark Drakeford a busnesau Cymreig fforwm newydd yn Ysgol Busnes Caerdydd i drafod sut y gall sefydliadau a ffoaduriaid weithio mewn partneriaeth ar gyfer cyflogaeth gynaliadwy.

Amlygodd y gynhadledd, Gwaith Sy’n Gweithio i Bawb, a gynhaliwyd gan yr Athro Tim Edwards yn y Ganolfan Addysgu Ôl-raddedig ym Mhrifysgol Caerdydd, heriau cyflogaeth ffoaduriaid yng Nghymru a’r awydd i fod yn wlad groesawgar i weithio a byw ynddi.

Agorodd y Dirprwy Is-Ganghellor a Phennaeth Coleg y Celfyddydau, Dyniaethau a Gwyddorau Cymdeithasol Urfan Khaliq y sgyrsiau gydag anerchiad i’w groesawu.

Trafododd yr her i gwmnïau nad ydynt yn gyfarwydd ag anghenion a gofynion y rhai sy'n newydd i'r wlad tra'n profi caledi.

Yna gosododd Mr Drakeford y cefndir trwy dynnu sylw at yr heriau y mae pawb yn eu hwynebu, “Mae cythrwfl enfawr yn economi’r DU nawr a gallem fod mewn oes lle bydd y rhai sydd â’r lleiaf yn cael eu gadael â hyd yn oed llai.

“Mae’n gyd-destun llwm i’r hyn y gallwn fod yn ei wynebu yma yng Nghymru. Mae'n mynd i fod yn aeaf hynod heriol i gynifer o bobl ac yn gefndir anochel i drafodaethau yn y fforwm hwn.

“Mae heriau ymarferol i wneud i waith weithio i bawb, fodd bynnag, rydym am i Gymru fod yn lle y bydd ffoaduriaid o amgylchiadau eithriadol yn cael eu croesawu a’u dathlu.

“Mae eu presenoldeb yng Nghymru yn rhodd i ni.”

Bu cynrychiolwyr o sefydliadau yng Nghymru a’r DU yn trafod yr heriau sy’n gysylltiedig â chyflogi ffoaduriaid.

Siaradodd y bragwr o Gasnewydd Tiny Rebel Beccy Legge, Pennaeth Pobl am y cyfleoedd a gollwyd o ran cyflogi ffoaduriaid oherwydd y rhwystrau sydd ar waith.

Dywedodd, “Mae yna gronfa o dalent heb ei chyffwrdd a all ychwanegu cymaint at eich busnes fel ei bod yn ymddangos yn wirion i beidio â chael hynny yn ein strategaeth recriwtio.”

Fodd bynnag, tynnodd Allyn Burford, Rheolwr Pobl a Diwylliant Grŵp IKEA, sylw at y llwyddiannau y gellir eu cael mewn cyflogaeth ffoaduriaid, “Mae IKEA yn profi cyfradd cadw o 95% o ffoaduriaid cyflogedig gyda datblygiad sgiliau o fewn ein cwmni yn cael ei werthfawrogi.”

Ychwanegodd y Swyddog Cyswllt Cyflogwyr Joe Cicero yng Nghyngor Caerdydd, “I lawer ohonom, ni allwn ond dychmygu sut brofiad fyddai cael ein gorfodi i adael ein cartrefi, ein teuluoedd a’n gyrfaoedd heb unrhyw fai arnom ni a gorfod dechrau eto.

“Rwy’n falch iawn ein bod ni i gyd yma heddiw i fod yn rhan o’r daith gythryblus honno i ddod o hyd i atebion ymarferol.”

Mae'r Cyngor ar hyn o bryd yn treialu rhaglen i gael ffoaduriaid i gyflogaeth drwy greu llwybrau i waith.

Mae llawer o ffoaduriaid yn dod i Gymru gyda phrofiad, cymwysterau a sgiliau blaenorol ond eto'n canfod rhwystrau i gyflogaeth.

Gall ffoaduriaid ddod â gwerth sylweddol i fusnesau, gan fynd i'r afael â bylchau sgiliau, meithrin gweithle amrywiol a chynhwysol a gwella effaith gymdeithasol trwy ddatrys rhwystrau i gyflogaeth.

Bydd y brifysgol yn defnyddio'r digwyddiad fel sbringfwrdd i weithio gyda busnesau ledled Cymru i ddod o hyd i atebion i rwystrau recriwtio ffoaduriaid.