Tsieinëeg yn agor drysau prifysgol i ddysgwyr ifanc

Bydd tri disgybl o Ysgol Dosbarth Confucius Ysgol Aberconwy yn dechrau astudio Tsieinëeg ym mhrifysgolion gorau'r DU o fis Medi ymlaen.

O dan arweiniad a chefnogaeth Jie Chen, tiwtor Sefydliad Confucius Caerdydd (CCI), mae'r myfyrwyr Blwyddyn 13 yn gobeithio adeiladu ar eu sgiliau mewn Tsieinëeg hyd at lefel gradd ym mhrifysgolion Bangor, Caeredin a Manceinion.

Dechreuodd Erin Hughes ac Eleanor McNab astudio Tsieinëeg yn yr ysgol ym mlwyddyn 8, a dechreuodd Lara Kerr ym mlwyddyn 9. Ar y dechrau roedd Erin yn aelod o'r clwb Tsieinëeg ar ôl ysgol ac aeth iddo ‘dim ond i roi cynnig ar rywbeth newydd". Yna yn 2017, cafodd gyfle i ymuno â thaith i Tsieina drwy CCI, "profiad anhygoel" a sbardunodd ei chariad at bopeth Tsieineaidd.

"Pan glywais i am daith i Tsieina gyda'r ysgol, roeddwn i'n gwybod bod yn rhaid i mi ddechrau cael gwersi fel y byddwn i'n gallu cymryd rhan yn y profiad anhygoel yma. Fe wnes i basio arholiadau mewn Tsieinëeg i ddechreuwyr [Llwybrau Iaith mewn Mandarin (QCF gynt) lefelau 1 a 3] ac yn 2019, roeddwn i'n ddigon ffodus i fynd ar y daith ysgol i Xiamen a Shanghai am bythefnos!" meddai.

Dechreuodd Eleanor ddysgu Tsieinëeg am y tro cyntaf hefyd oherwydd ei bod o’r farn y byddai'n her. Dechreuodd ym mlwyddyn 8 ac yn fuan y gwelodd ei bod yn ei hoffi lawer mwy nag yr oedd hi'n disgwyl y byddai! Dyma a ddywedodd hi: "Dw i wedi mwynhau'r gwersi yn fawr a dwi'n meddwl mod i wedi elwa ar astudio'r iaith mewn dosbarth bach, lle mae Jie bob amser yn hapus i egluro'n dda iawn yr atebion i unrhyw gwestiynau sydd gen i. Rhan fawr o pam dw i wedi mwynhau'r gwersi gymaint yw bod Jie yn amlwg yn frwdfrydig dros addysgu ac yn hapus i helpu."

Mae Lara wedi bod yn “angerddol” am ddiwylliant Tsieina er pan oedd yn ifanc. Roedd hi am fanteisio ar y dosbarthiadau a roddwyd ar gael yn yr ysgol, a phasiodd ddau arholiad Llwybr Iaith galwedigaethol yn ystod ei chyfnod yno. Fodd bynnag, taith Lara i Tsieina drwy Sefydliad Confucius ym mlwyddyn 11 a gadarnhaodd ei chariad tuag at yr iaith a’r diwylliant. " Roeddwn i'n gweld bod Tsieinëeg mor wahanol gyda'r hen gelf a phensaernïaeth" meddai.

Mae'r tri disgybl yn gobeithio parhau i ddatblygu eu sgiliau iaith Tsieinëeg a'u gwybodaeth am y diwylliant wrth iddynt symud ymlaen i'r brifysgol. Mae Lara yn bwriadu mynd i Brifysgol Bangor i ddilyn gradd mewn Ieithyddiaeth a Tsieinëeg, mae Eleanor yn bwriadu astudio Mandarin ar y cyd â Ffiseg yng Nghaeredin, ac mae Erin yn gobeithio astudio Tsieinëeg a Ffrangeg ym Mhrifysgol Manceinion.

Oherwydd cefnogaeth yr ysgol a CCI, mae Erin ac Eleanor wedi pasio eu harholiadau HSK 1 a HSK 2 mewn Tsieinëeg Mandarin yn y ddwy flynedd ddiwethaf. Er nad yw cymwysterau HSK yn rhoi pwyntiau UCAS, roedd y ddwy yn teimlo eu bod yn help mawr i'w ceisiadau i’r brifysgol gan eu bod yn dangos eu parodrwydd a’u diddordeb yn yr iaith, ac yn dangos ymdrech i astudio ar gyfer y profion.

Dywedodd Eleanor "Pe na chaem yr opsiwn i gymryd gwersi Mandarin yn yr ysgol, mae’n rhywbeth na fyddwn i erioed wedi ystyried ei wneud, gan y gall dysgu iaith fel Mandarin ymddangos fel tasg frawychus iawn, ond mae'r gwersi yr wyf wedi eu cymryd wedi rhoi'r opsiwn i mi ddechrau Mandarin ar lefel ganolradd yn y brifysgol, cyfle rwy'n ddiolchgar iawn amdano."

Ychwanegodd Erin "Mae'r gwersi Tsieinëeg yn yr ysgol wedi agor drysau i gymaint o gyfleoedd ac wedi dangos beth sy’n angerddol i mi a byddaf yn mynd ymlaen i astudio mewn addysg uwch. Ar ôl y brifysgol fe faswn i wir yn hoffi mynd i Tsiena eto i weithio, efallai hyd yn oed byw yno!"

Mae Ysgol Aberconwy yn ysgol uwchradd yng Nghonwy, Gogledd Cymru. Mae’r ysgol yn Ystafell Ddosbarth Confucius gyda Sefydliad Confucius Caerdydd ers 2011 gan roi statws arbennig a chyllid iddi ar gyfer addysgu'r iaith a'r diwylliant Tsieinëeg, a thiwtor penodol i’w dysgu.