Ceisiadau ar agor ar gyfer Ysgol Haf newydd mewn ymchwil iechyd meddwl ieuenctid

Bydd Canolfan Wolfson ar gyfer Iechyd Meddwl Pobl Ifanc yn cynnal ei Hysgol Haf rithwir gyntaf ym mis Gorffennaf eleni.

Cynhelir y cwrs tri diwrnod ar-lein rhwng 18 a 20 o Orffennaf, yng ngofal y tîm rhyngddisgyblaethol arbenigol yng Nghanolfan Wolfson ar gyfer Iechyd Meddwl Pobl Ifanc ym Mhrifysgol Caerdydd.

Dr Vicky Powell a Dr Chris Eaton o Ganolfan Wolfson sy'n arwain ar raglen yr Ysgol Haf.

Dywedodd Dr Powell: "Rydym ar ben ein digon i fod yn trefnu'r Ysgol Haf gyntaf un ar ran Canolfan Wolfson. Nod ein rhaglen ar-lein yw rhoi sylfaen i ddarpar ymchwilwyr o gefndiroedd clinigol ac anghlinigol mewn ymchwil iechyd meddwl ieuenctid, gan ganolbwyntio'n bennaf ar y gwaith eang a wnawn yn y ganolfan.”

Ychwanegodd Dr Eaton: “Bydd yr ysgol haf yn cael ei chyflwyno gan ymchwilwyr o'r radd flaenaf, a fydd yn cynnig cyflwyniadau a gweithdai yn eu meysydd arbenigedd. Byddant yn canolbwyntio ar ddeall achosion problemau iechyd meddwl y glasoed a all lywio ffyrdd effeithiol newydd o gynnig cymorth ymarferol i bobl ifanc.

Bydd y rhaglen amrywiol yn canolbwyntio ar amrywiaeth o bynciau ym maes dulliau a chanfyddiadau ymchwil iechyd meddwl ieuenctid, gan ddefnyddio disgyblaethau epidemioleg, geneteg, niwrowyddoniaeth a datblygu ymyriadau.

Mae'r ysgol haf hefyd yn cynnwys gweithdai rhyngweithiol ar bynciau sy’n cynnwys cyngor ar yrfa ymchwil, pwysigrwydd cynnwys y cyhoedd mewn ymchwil, a sut gall ymchwilwyr helpu i sicrhau bod canfyddiadau'n cael eu trosi'n bolisi i'r llywodraeth. Bydd cyfle hefyd i rwydweithio’n rhithiwr gyda phobl eraill a fydd yn bresennol a chyda siaradwyr.

Mae’n rhad ac am ddim i fynychu’r ysgol haf ac mae wedi’i hanelu at wyddonwyr ymchwil (Meistr, PhD, Ôl-ddoethurol, neu i unrhyw un sydd wedi cwblhau gradd israddedig) a hyfforddeion clinigol (Hyfforddiant Sylfaen/Craidd/Arbenigedd) sydd â diddordeb mewn symud i ymchwil iechyd meddwl ieuenctid, neu’r rhai sydd am gael cyflwyniad i’r maes.

I gloi, dywedodd Dr Eaton: "Rydym yn edrych ymlaen at agor drysau rhithwir Canolfan Wolfson yr haf hwn a chroesawu hyfforddeion ac ymchwilwyr newydd i ddysgu mwy am ein gwaith. Mae’r ceisiadau yn cau ar 27 o Fehefin 2022 ac edrychwn ymlaen at glywed gennych yn fuan!”

Sut i wneud cais

I wneud cais i fynychu Ysgol Haf Canolfan Wolfson mewn Ymchwil Iechyd Meddwl Ieuenctid, llenwch y ffurflen gais ar-lein.

Gallwch gael rhagor o wybodaeth drwy fynd i wefan yr Ysgol Haf.