Ali Abdi, rheolwr Partneriaethau Porth Cymunedol yn cael medal BEM

Yr wythnos diwethaf, cafodd rheolwr partneriaethau Porth Cymunedol, Ali Abdi Fedal Ymerodraeth Brydeinig (BEM) gan gynrychiolydd Ei Mawrhydi y Frenhines, Arglwydd Raglaw De Morgannwg Mrs Morfudd Meredith ac ym mhresenoldeb Arglwydd Faer Dinas Caerdydd Rod McKerlich.

Ymunodd Ali â thîm prosiect y Porth Cymunedol yn 2015 ac mae wedi chwarae rhan allweddol yn y gwaith o ddatblygu perthynas hirhoedlog, buddiol ac ystyrlon rhwng Prifysgol Caerdydd a chymunedau yn Grangetown a'r cyffiniau. Mae hefyd wedi tyfu rhwydwaith cryf ar draws yr holl Golegau a’r Gwasanaethau Proffesiynol ym Mhrifysgol Caerdydd, cynrychiolwyr y Llywodraeth, sefydliadau'r trydydd sector, ac aelodau o'r gymuned.

Derbyniodd Ali Fedal yr Ymerodraeth Brydeinig am ei wasanaeth i'r gymuned Pobl Ddu, Asiaidd a Lleiafrifoedd Ethnig yng Nghaerdydd. Cyhoeddodd Swyddfa'r Cabinet y newyddion yn swyddogol ar ran EM y Frenhines yn rhestr Anrhydeddau'r Flwyddyn Newydd 2019 ond gohiriwyd y seremoni gyflwyno oherwydd y pandemig parhaus.

Wrth dderbyn ei Fedal Ymerodraeth Brydeinig dywedodd Ali:

"Braint ac anrhydedd o’r mwyaf yw derbyn y wobr hon am rywbeth rwy’ wrth fy modd yn ei wneud bob dydd. Mae fy nheulu'n falch iawn o'r hyn rwy’ wedi'i gyflawni, a phan ddywedais wrth fy rhieni roeddynt wrth eu bodd. Rwy’ mor falch fy mod mewn sefyllfa bob dydd i wasanaethu fy nghymuned a rhoi cymorth i bobl pan yn aml, does neb arall ganddynt i droi ato. Mae'n fraint cael fy anrhydeddu ar lefel genedlaethol."

Llongyfarchiadau Ali!