Mae Ysgol Pensaernïaeth Cymru wedi’i chymeradwyo gan Fwrdd Ymweld Sefydliad Brenhinol Penseiri Prydain (RIBA)

Fe wnaeth Sefydliad Brenhinol Penseiri Prydain (RIBA) ymweld ag Ysgol Pensaernïaeth Cymru yr wythnos diwethaf i gynnal ei hasesiad pum mlynedd o raglenni achrededig yr Ysgol.

Archwiliodd Bwrdd Ymweld RIBA dair o raglenni'r Ysgol; BSc Astudiaethau Pensaernïol, Meistr mewn Pensaernïaeth (MArch), a Diploma Ôl-raddedig mewn Ymarfer Proffesiynol (DPP, Rhan 3) ac o ganlyniad cawson nhw eu dilysu am bum mlynedd arall yn ddiamod.

Fe wnaeth y Bwrdd gymeradwyo’r Ysgol o ran:

• Rhaglen Rhan 3 ar gyfer ei synthesis o drylwyredd ac ymarfer academaidd;
• ethos cynaliadwyedd amgylcheddol a chymdeithasol, sy'n flaengar ac yn eang ei agwedd ac y mae tystiolaeth ohono drwyddi draw; a
• natur golegol ac ymrwymiad yr holl staff i brofiad y myfyrwyr.

Dywedodd Pennaeth yr Ysgol, yr Athro Chris Tweed: “Rwy’n ddyledus iawn i’m cydweithwyr a ddangosodd cymaint o frwdfrydedd, ac a weithiodd yn ddiwyd ac yn llawn egni wrth baratoi ar gyfer yr ymweliad. Mae'r dilysiad wrth gwrs yn cydnabod penllanw blynyddoedd lawer o waith caled nid yn unig gan staff Gwasanaethau Proffesiynol ac academaidd yr Ysgol, ond gan yr holl diwtoriaid allanol sy'n ein cefnogi i ddarparu addysg a phrofiad o'r radd flaenaf i'n myfyrwyr.”

Canmolwyd y DPP yn arbennig gan y Bwrdd Ymweld. Mae’r rhaglen Rhan 3 hon wedi’i chynllunio i’w chwblhau tra bod ei myfyrwyr yn gweithio ac mae’n eu helpu i ddatblygu dealltwriaeth drylwyr o'r agweddau cyfreithiol ac economaidd ar ymarfer pensaernïol a chaffael gwaith adeiladu, yn ogystal â’r sgiliau perthnasol sy'n angenrheidiol ar gyfer ymarfer yn effeithiol wrth ddechrau ar yrfa ym maes pensaernïaeth.

Dywedodd Arweinydd Rhaglen y DPP, yr Athro Sarah Lupton:

“Rydym wedi gweithio'n galed i ddatblygu a rhedeg y rhaglen hon i sicrhau'r cydbwysedd gorau posibl o theori ac egwyddorion sylfaenol, a sut y maen nhw’n cael eu cymhwyso i’r gwaith a phrosiectau. Rwy'n falch iawn felly bod y cyflawniad hwn wedi'i gydnabod gan Fwrdd Ymweld RIBA.’

I ddarganfod mwy am y rhaglenni astudio sydd ar gael yn Ysgol Pensaernïaeth Cymru ewch i wefan yr Ysgol.