Myfyriwr sy'n entrepreneur yn ennill lle ar raglen Cyflymu Rhagoriaeth Llywodraeth Cymru
26 Chwefror 2021
![Young man outdoors wearing t-shirt and jacket](https://cardiff.imgix.net/__data/assets/image/0006/2502447/Olli-Smith-wearing-Solus-Supply-t-shirt.jpg?w=570&h=321&fit=crop&q=60&auto=format)
Mae myfyriwr israddedig ym Mhrifysgol Caerdydd a sefydlodd siop ailwerthu ar-lein a brand dillad stryd cynaliadwy pan oedd yn 14 oed wedi sicrhau lle ar y rhaglen Cyflymu Rhagoriaeth a gyllidir gan Lywodraeth Cymru.
Mae Olli Smith, myfyriwr BSc Rheoli Busnes ar ei flwyddyn olaf, yn un o dri ar hugain o bobl ifanc (18 i 25 oed), menywod, aelodau o'r gymuned BAME a phobl anabl, a fydd yn cymryd rhan yn y rhaglen sy'n hyrwyddo amrywiaeth yn nhirwedd busnesau newydd Cymru.
Bydd y rhaglen rithwir hefyd yn helpu cyfranogwyr i oresgyn yr heriau busnes yn sgil pandemig coronafeirws (COVID-19).
Gan ddod â phobl ynghyd o’r grwpiau hynny sydd wedi profi mwy o effaith economaidd o ganlyniad i COVID, bydd y rhaglen yn cynorthwyo cyfranogwyr i ddychmygu, dechrau a meithrin mentrau newydd neu, yn achos Olli, cynyddu un sy’n bodoli eisoes.
Dros gyfnod o 12 wythnos, bydd cyfranogwyr yn:
- Mynychu cyfres o weminarau a dosbarthiadau meistr, mentora a hyfforddi arbenigol un i un, gyda siaradwyr ysbrydoledig, modelau rôl ac arbenigwyr tyfu busnes.
- Mynd ar daith busnes cam wrth gam, o'r syniad hyd at gwsmeriaid sy'n talu
- Rhoi modelau busnes cynaliadwy ar waith
- Datblygu sgiliau busnes craidd a 'meddylfryd llwyddiant'.
Dechreuodd Olli Solus Supply yn 2013, ar ôl llwyddiant cychwynnol yn rhedeg cwmni dosbarthu ar gyfer busnesau yn Bournemouth a'r cyffiniau lle cafodd ei fagu.
Cael effaith cadarnhaol
![Solus Supply t-shirt collection](https://cardiff.imgix.net/__data/assets/image/0009/2502459/Solus-Supply-t-shirt-collection.jpg?w=575&ar=16:9)
Ar ôl symud i Gaerdydd i astudio, aeth Solus Supply o nerth i nerth ar Facebook, Instagram ac eBay ac, yn fwyaf diweddar, trwy wefan y cwmni ei hun.
Mae eu siop ar-lein yn gwerthu crysau t, dillad fleece, siacedi byr a siwmperi gan gwmnïau fel Marino Morwood, Nike, Patagonia, heb sôn am ddillad brand Solus Supply ei hun.
Dywedodd Olli: “Rydyn ni'n defnyddio cynhyrchion cotwm organig a deunydd pecynnu ac arferion cynaliadwy lle bynnag y gallwn ni, er mwyn sicrhau ein bod ni'n lleihau ein hôl troed carbon oherwydd dwyf i ddim am i fy musnes wneud pethau'n waeth i'r amgylchedd. Rwyf i hefyd am ddechrau gwneud mwy dros elusen gyda fy musnes, drwy roi canran o'r refeniw blynyddol a chefnogi sefydliadau lleol a rhyngwladol drwy ryddhau dillad...”
“Rwyf i'n ffodus iawn i gael fy newis ar gyfer y rhaglen Cyflymu Rhagoriaeth. Mae'r cyfleoedd rhwydweithio mor werthfawr, ac rwyf i eisoes wedi cyfarfod â phobl fusnes wych o bob math o ddiwydiannau ar y cynllun. Fy ngobaith yw y bydd y rhaglen yn helpu i ddatrys rhai o'r heriau rwy'n eu hwynebu gyda Solus, yn enwedig o ran cynhyrchu a chaffael cyflenwyr a llif arian hefyd.”
“Yn y pen draw fy uchelgais tymor hir yw gweithio ar fy liwt fy hun a chael effaith gadarnhaol ar y byd. Rwyf i am wella bywydau, ac nid gwneud elw yn unig.”
Cyflwynir y rhaglen Cyflymu Rhagoriaeth fel rhan o Raglen Cyflymu Twf Busnes Cymru, a gyllidir yn rhannol gan Gronfa Datblygu Ranbarthol Ewrop drwy Lywodraeth Cymru.
Dywedodd y Gweinidog dros yr Economi, Trafnidiaeth a Gogledd Cymru, Ken Skates: “Hoffwn longyfarch y sylfaenwyr busnes hyn ar gael eu dewis i gymryd rhan yn y Rhaglen Cyflymu Rhagoriaeth gyntaf. Rydym ni'n cydnabod nad oes cynrychiolaeth ddigonol o blith menywod, pobl ifanc, pobl o gefndir BAME a phobl sy'n byw ag anabledd o ran cychwyn busnesau yng Nghymru, ac rydym ni am helpu i newid hynny.
“Mae'r Rhaglen hon yn rhan o'n buddsoddiad o £40m i gyflawni ein 'Ymrwymiad COVID'. Mae'r cyllid ar gael i sicrhau y gall unrhyw un dros 16 oed yng Nghymru gael cyngor a chefnogaeth i ddod o hyd i waith neu fynd yn hunangyflogedig. Bydd annog a chefnogi entrepreneuriaeth yn rhan fawr o'r ymrwymiad hwn, felly bydd y rhaglen yn helpu entrepreneuriaid sydd â photensial twf uchel i gael gafael ar yr arbenigedd angenrheidiol i godi eu cwmnïau i'r lefel nesaf...”
“Mae hwn yn gyfle gwych i’r 23 entrepreneur sy’n cymryd rhan, fydd yn derbyn cefnogaeth arbenigol i ddatblygu model busnes cynaliadwy, cadarn. Bydd y rhaglen yn cynnig cysylltiadau amhrisiadwy â rhwydwaith o fentoriaid a chyfoedion profiadol, fydd yn gweithio gyda nhw i ddatblygu cynllun twf clir.”
Bydd Olli a gweddill y garfan yn gorffen y rhaglen gyda digwyddiad gwobrwyo ym mis Ebrill 2021, fydd yn cynnig cyfleoedd gwych ar gyfer codi proffil a chysylltiadau cyhoeddus Solus Supply a'r cwmnïau eraill sy'n cymryd rhan.
Rhagor o wybodaeth am Solus Supply.
Lle bynnag ydych chi ar eich taith entrepreneuraidd, gall Tîm Mentro a Dechrau Busnesau Prifysgol Caerdydd eich cefnogi wrth i chi ddatblygu sgiliau ar gyfer dechrau busnes, hunangyflogaeth ac arloesi.