Recriwtio gyda gweledigaeth 20/20
30 Ionawr 2020
Cynhaliwyd y digwyddiad hwn cyn pandemig COVID-19.
Mae Gweithwyr Proffesiynol Gyrfaoedd a Chyflogadwyedd o Brifysgol Caerdydd wedi arwain sesiwn ryngweithiol ar y gweithlu graddedigion yn y sesiwn ddiweddaraf yng Nghyfres Hysbysu dros Frecwast Ysgol Busnes Caerdydd.
Ar ôl cyflwyno'r panel o siaradwyr, agorodd Megan Jenkins, Dirprwy Bennaeth Gyrfaoedd a Chyflogadwyedd Prifysgol Caerdydd, y digwyddiad gyda phleidlais fyw a oedd yn gofyn i’r rhai a oedd yn bresennol asesu sgiliau myfyriwr graddedig nodweddiadol.
Esboniodd y byddai'r data hwn yn cael ei ddefnyddio'n ddiweddarach yn y cyflwyniad.
Yn dilyn cyflwyniad Megan, rhannodd Llinos Carpenter, Rheolwr Ymgysylltu â Chyflogwyr ym Mhrifysgol Caerdydd, gyfres o fewnwelediadau ystadegol i'r farchnad lafur i raddedigion.
Chwalu’r chwedlau
Esboniodd fod llawer o dybiaethau am y farchnad lafur i raddedigion yn y DU, a'r hyn y mae graddedigion yn ei wneud pan fyddant yn gadael y brifysgol.
Meddai: “Un o'r tybiaethau mawr hynny yw bod myfyrwyr yn gadael y brifysgol 'en masse' ac yn teithio i Lundain lle mae'r holl swyddi. Er gwaethaf y rhethreg hon bod yr holl gyfleoedd lefel graddedig wedi'u crynhoi ym mhrifddinas Lloegr, y realiti yw nad yw'r rhan fwyaf o raddedigion ac, yn wir, y rhan fwyaf o bobl byth yn gweithio yn Llundain.”
Gyda data ategol a gasglwyd o ddadansoddiad Dr Charlie Ball o arolwg Cyrchfannau Ymadawyr Addysg Uwch (HESA) 2016-17, aeth Llinos ymlaen i chwalu camsyniadau eraill gan gynnwys bod graddedigion dim ond eisiau gweithio i fusnesau mawr, yn hytrach na mwynhau'r cyfleoedd sydd ar gael mewn busnesau bach a chanolig.
Ar ôl chwalu’r chwedlau hyn, canolbwyntiodd Llinos ar y farchnad lafur i raddedigion yn Ne Cymru gan amlinellu nifer y graddedigion sydd naill ai'n aros yn yr ardal ar ôl bod yn y brifysgol neu'n teithio i'r rhanbarth o fannau eraill, cyflogau cyfartalog graddedigion fesul sector a'r math o waith sydd ar gael i raddedigion.
“Yr hyn rwy'n gobeithio eich bod yn dechrau ei gydnabod, yw bod cronfa dalent enfawr ar garreg eich drws a all dyfu a diogelu eich busnes yn y dyfodol. Mae’r boblogaeth amrywiol a thalentog o fyfyrwyr sydd yma ym Mhrifysgol Caerdydd yn un o’r rhai y mae cyflogwyr o'r radd flaenaf yn chwilio amdanynt fwyaf.”
Daeth ei chyflwyniad i ben drwy amlinellu rhai o nodweddion a dyheadau'r graddedigion cyfoes, neu’r 'Genhedlaeth Z' fel y cyfeirir atynt erbyn hyn.
Yn dilyn cyflwyniad Llinos, symudodd Kirsty McCaig, Rheolwr Profiad Gwaith ym Mhrifysgol Caerdydd, ffocws y sesiwn hysbysu i'r gwahanol gyfleoedd allgyrsiol sydd ar gael i fyfyrwyr.
Fel Llinos, soniodd Kirsty am rai o'r camsyniadau ynghylch profiad gwaith myfyrwyr, gan gynnwys swyddi di-dâl ac ymgeiswyr sydd heb gymhelliant.
Y bwlch sgiliau
Ar y pwynt hwn yn ei chyflwyniad, cymharodd Kirsty ymatebion y gynulleidfa i'r bleidlais fyw ar ddechrau'r sesiwn hysbysu gyda data gan y Sefydliad Cyflogwyr Myfyrwyr(ISE).
Meddai: “Os edrychwn ar eich ymatebion chi, maen nhw wedi dilyn patrwm tebyg i ymatebion ISE. A hynny oherwydd bod pethau fel gwydnwch, rheoli amser, datrys problemau a gwaith tîm i gyd yn sgorio'n eithaf uchel fel sgiliau y byddech yn disgwyl i raddedigion eu cael...”
“Er bod rhinweddau fel delio â gwrthdaro a chyfathrebu sy'n briodol i fusnesau yn is oherwydd efallai na fyddant yn dysgu'r rhain yn y brifysgol. Y ffordd y gallant ennill y sgiliau hyn, a bod yn raddedigion sy'n barod i weithio, yw drwy wneud rhywfaint o brofiad gwaith a dysgu ochr yn ochr â'u hastudiaethau academaidd.”
Daeth Kirsty â’i chyflwyniad i ben drwy rannu rhai llwyddiannau ar y gweill o ran talent sy'n gysylltiedig â Chynllun Interniaeth Santander Prifysgol Caerdydd. Rhannodd adnoddau a chysylltiadau gan Cysylltiadau ar gyfer y Dyfodol, GO Wales, Ysgol Busnes Caerdydd a'r Academi Feddalwedd Genedlaethol gyda’r rheiny a oedd yn bresennol yn y sesiwn hysbysu, a'u hannog i gysylltu i siarad am weithredu'r mathau hyn o gyfleoedd profiad gwaith yn eu sefydliadau nhw.
Gan nodi pwynt olaf Kirsty, rhannodd Elisabeth Rilatt a Ceryn Lawless eu profiadau o bartneriaeth cyflogwr Escentual â Phrifysgol Caerdydd.
Cyflogwr o ddewis
Ar ôl cyflwyno eu rolau yn gweithio fel Gweithwyr Cyfathrebu Proffesiynol yn un o e-fanwerthwyr harddwch hynaf y DU, fe wnaeth Ceryn olrhain y berthynas yn ôl i hysbyseb a osododd y sefydliad ar fwrdd swyddi'r Brifysgol.
“Daeth yn eithaf amlwg ein bod yn colli allan ar y boblogaeth myfyrwyr yma yng Nghaerdydd yn ogystal â staff a rhanddeiliaid allweddol eraill.”
Cyn bo hir, daeth Escentual yn gyflogwr o ddewis i fyfyrwyr a graddedigion Caerdydd, gan ddod i ffeiriau gyrfaoedd, cynnal gweithdai i fyfyrwyr a chyfleoedd profiad gwaith yn dilyn eu digwyddiad 'y tu ôl i'r llen'.
Meddai Ceryn: “Roedd y digwyddiad tu ôl i'r llen yn llwyddiant ysgubol. Ac o ganlyniad mae gennym ni lawer iawn o fyfyrwyr yn gofyn am gyfleoedd graddedig gydag Escentual, sydd wedi helpu i godi ymwybyddiaeth o’n brand.
“Elfen gadarnhaol arall oedd yr effaith a gafodd ar ein gweithwyr. Roedd yn gyfle i'n rheolwyr a'n timau ddod ynghyd a gweiddi mewn balchder am yr hyn sydd gennym i'w gynnig a'r pethau rydym ni’n eu gwneud i wthio'r ffiniau yn y farchnad fanwerthu ar-lein.”
Daeth Elisabeth â'r sesiwn i ben drwy rannu dwy ffilm a oedd yn arddangos myfyrwyr Prifysgol Caerdydd, Katie Goddard a Lily Cai, a ymunodd â'r cwmni o ganlyniad i'r bartneriaeth cyflogwr.
Dysgwch ragor am Wasanaethau Gyrfa a Chyflogadwyedd Prifysgol Caerdydd i fyfyrwyr ac i sefydliadau.
Mae cyfres Sesiynau Hysbysu dros Frecwast Ysgol Busnes Caerdydd yn galluogi pobl yn y byd masnachol i gael rhagor o wybodaeth am yr ymchwil a'r datblygiadau pwysig diweddaraf gan bartneriaid diwydiannol.
Os nad oeddech chi’n gallu bod yn bresennol, dyma fideo o'r cyfarfod.
