Partneriaeth KTP yn cael ei galw'n 'rhagorol'
21 Ionawr 2016
![Nicole Ayiomamitou](https://cardiff.imgix.net/__data/assets/image/0008/191258/Nicole-Ayiomamitou.jpg?w=570&h=321&fit=crop&q=60&auto=format)
Mae partneriaeth ym Mhrifysgol Caerdydd wedi cael ei disgrifio fel un 'rhagorol' ar ôl helpu cwmni logisteg ac anfon nwyddau byd-eang Panalpina i ddatblygu ffyrdd arloesol o helpu cwsmeriaid ragweld galw yn y gadwyn gyflenwi
Dair blynedd yn ôl, daeth Panalpina ac Ysgol Busnes Caerdydd ynghyd i geisio creu rhestrau stoc mwy effeithlon. Cymaint fu llwyddiant y Bartneriaeth Trosglwyddo Gwybodaeth (KTP), mae bellach wedi'i hadnewyddu a'i hehangu i ganolbwyntio ar dechnolegau gweithgynhyrchu newydd fel rhestrau y gellir eu hailgyflenwi drwy ddull argraffu 3D.
Mae Panalpina wedi dyblu eu buddsoddiad yn y prosiect dwy flynedd, a'i nod yw helpu eu cwsmeriaid i nodi'r cynnyrch cywir er mwyn newid i dechnegau gweithgynhyrchu megis argraffu 3D.
Yn ddiweddar, disgrifiodd Innovate UK y bartneriaeth bresennol fel un "rhagorol". Mae prif ymchwilydd y prosiect, Nicole Ayiomamitou, hefyd wedi ymuno â Panalpina o Brifysgol Caerdydd i gyflwyno'r rhaglen argraffu 3D yn fyd-eang.
Dywedodd Nicole: "Mae'r bartneriaeth wedi rhoi rhai canlyniadau hynod gyffrous. Rydym wedi cymryd data o restrau stoc go iawn a datblygu algorithm cylch bywyd unigryw yn seiliedig ar gysyniadau mathemategol cyfoes. O ganlyniad, mae gennym bellach raglen newydd sy'n ein galluogi i ragweld y galw am gynnyrch y cwmni a llunio ei rhestr stoc yn unol â hynny."
Dywedodd Paul Thomas, Rheolwr Busnes yn y Gwasanaethau Ymchwil, Arloesedd a Menter ym Mhrifysgol Caerdydd: "Rydym wrth ein boddau bod KTP Panalpina a Phrifysgol Caerdydd yn "Rhagorol" yn ôl Innovate UK. Rydym yn hen law ar gydweithio'n llwyddiannus â chwmnïau drwy gynllun KTP. Dros y 40 mlynedd ddiwethaf, mae'r Brifysgol wedi creu dros 200 o bartneriaethau gyda sefydliadau bach a byd-eang, gan ychwanegu gwerth gwirioneddol at ddiwydiant ac economi'r DU."
Erbyn hyn, mae Panalpina wedi dechrau cynnig ei galluoedd rhagweld newydd i gwsmeriaid a bydd yn parhau i fireinio'r model wrth i'r gronfa ddata sydd ar gael am restrau stoc barhau i gynyddu'n barhaus.
Dywedodd yr Athro Martin Kitchener, Deon Ysgol Busnes Caerdydd: "Rydym wedi meithrin perthynas hynod gref gyda Panalpina dros y blynyddoedd drwy bartneriaethau KTP a dyfarniadau nawdd rhagoriaeth Panalpina i fyfyrwyr. Mae'r bartneriaeth yn cynnig manteision o ran nawdd ac arian yn ogystal â thrwy gynnig astudiaethau achos 'go iawn'. Caiff y rhain eu defnyddio yn ein cyrsiau ôl-raddedig gan gynnig blas i fyd busnes i ymchwilwyr.